കോഴിക്കോട്: ചെറുവണ്ണൂരിൽ ഓടിക്കൊണ്ടിരുന്ന കാറിന് തീപിടിച്ച് ഏഴുമാസം ഗർഭിണിയായ യുവതി മരിച്ച സംഭവത്തിൽ ദുരൂഹതയാരോപിച്ച് കുടുംബം രംഗത്ത്. ഇതൊരു ആസൂത്രിത കൊലപാതകമാണെന്ന് സംശയിക്കുന്നതായി മരിച്ച യുവതിയുടെ ബന്ധുക്കൾ ആരോപിച്ചു. കഴിഞ്ഞ ദിവസം രാത്രി ഒമ്പത് മണിയോടെ ചെറുവണ്ണൂർ കക്കറമുക്ക് എന്ന സ്ഥലത്ത് വെച്ചായിരുന്നു നാടിനെ നടുക്കിയ ദുരന്തം സംഭവിച്ചത്. ചെറുവണ്ണൂർ പുത്തൻ ചാലിൽ രജിൻ ലാലിന്റെ ഭാര്യ സോനയാണ് (26) പൊള്ളലേറ്റ് മരിച്ചത്. അപകടത്തിൽ ഗുരുതരമായി പരിക്കേറ്റ രജിൻ ലാൽ നിലവിൽ കോഴിക്കോട് മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ ചികിത്സയിലാണ്.

​പൊലീസും മോട്ടോർ വാഹന വകുപ്പും വിശദമായ അന്വേഷണം നടത്തുന്നുണ്ടെങ്കിലും കാറിന് എങ്ങനെയാണ് തീപിടിച്ചതെന്ന് ഇതുവരെ വ്യക്തമായി കണ്ടെത്താൻ സാധിച്ചിട്ടില്ല. പ്രാഥമിക പരിശോധനയിൽ വാഹനത്തിന് ഷോർട്ട് സർക്യൂട്ട് ഉണ്ടായിട്ടില്ലെന്നാണ് മോട്ടോർ വാഹന വകുപ്പിന്റെ നിഗമനം. കാറിന്റെ വയറിങ്ങിന് തകരാറുകളോ ഇന്ധന ടാങ്കിന് ചോർച്ചയോ കണ്ടെത്താനായിട്ടില്ല എന്നത് ദുരൂഹത വർദ്ധിപ്പിക്കുന്നു. കാറിന്റെ പിൻവശത്ത് നിന്നാണ് തീ പടർന്നതെന്നാണ് നിലവിലെ കണ്ടെത്തൽ. തീപിടുത്തത്തിന്റെ യഥാർത്ഥ കാരണം പുറത്തുകൊണ്ടുവരാൻ ഫോറൻസിക് സംഘവും മോട്ടോർ വാഹന വകുപ്പും സംയുക്തമായി പരിശോധനകൾ തുടരുകയാണ്.

​അപകടത്തിൽപ്പെട്ട 2016 മോഡൽ പെട്രോൾ കാറിന്റെ പിൻഭാഗത്ത് നിന്ന് വലിയ ശബ്ദത്തോടെയാണ് തീ ഉയർന്നതെന്ന് ദൃക്‌സാക്ഷികൾ പറയുന്നു. കാറിന്റെ മുൻഭാഗത്തേക്ക് തീ കാര്യമായി പടർന്നിരുന്നില്ല. പെട്രോൾ ടാങ്കുമായി ബന്ധപ്പെട്ട എന്തെങ്കിലും തരത്തിലുള്ള തകരാറോ ലീക്കോ ആകാം അപകട കാരണമെന്നാണ് മോട്ടോർ വാഹന വകുപ്പിന്റെ ആദ്യഘട്ട അനുമാനമെങ്കിലും, കുടുംബത്തിന്റെ പരാതിയുടെ പശ്ചാത്തലത്തിൽ വിശദമായ അന്വേഷണം വേണമെന്നാണ് അധികൃതർ വ്യക്തമാക്കുന്നത്. കത്തിയ കാറിൽ നിന്നും ഫോറൻസിക് സംഘം സാമ്പിളുകൾ ശേഖരിച്ചിട്ടുണ്ട്. രാസപരിശോധനാ ഫലം പുറത്തുവരുന്നതോടെ മാത്രമേ അപകടത്തിന് പിന്നിലെ യഥാർത്ഥ കാരണം വ്യക്തമാകൂ എന്ന് പൊലീസ് അറിയിച്ചു.