ബീജിംഗ്: ആഗോള രാഷ്ട്രീയം ഉറ്റുനോക്കിയ ട്രംപ് - ഷി ജിന്‍പിംഗ് ഉച്ചകോടിക്ക് പിന്നാലെ ഇറാന്‍ വിഷയത്തില്‍ നിര്‍ണ്ണായക വെളിപ്പെടുത്തലുമായി യുഎസ് വിദേശകാര്യ സെക്രട്ടറി മാര്‍ക്കോ റൂബിയോ. ഇറാനെ നിയന്ത്രിക്കാന്‍ അമേരിക്കയ്ക്ക് ചൈനയുടെ സഹായം ആവശ്യമില്ലെന്നും ഈ പ്രതിസന്ധി ഒറ്റയ്ക്ക് കൈകാര്യം ചെയ്യാന്‍ തങ്ങള്‍ക്ക് സാധിക്കുമെന്നും അദ്ദേഹം വ്യക്തമാക്കി.

ഇറാന്‍ വിഷയത്തില്‍ ചൈനയുടെ മധ്യസ്ഥത അമേരിക്ക തേടിയെന്ന വാര്‍ത്തകള്‍ റൂബിയോ നിഷേധിച്ചു. പശ്ചിമേഷ്യയിലെ സമാധാനത്തെക്കുറിച്ച് ചര്‍ച്ച ചെയ്‌തെങ്കിലും, പരിഹാരത്തിനായി അമേരിക്കയ്ക്ക് കൃത്യമായ പദ്ധതികളുണ്ടെന്ന് അദ്ദേഹം പറഞ്ഞു.

ബീജിംഗില്‍ നടന്ന ഉച്ചകോടിയില്‍ വ്യാപാര കരാറുകള്‍ക്കാണ് മുന്‍ഗണന നല്‍കിയത്. അമേരിക്കന്‍ ഉല്‍പ്പന്നങ്ങള്‍ കൂടുതല്‍ വാങ്ങാന്‍ ചൈന സമ്മതിച്ചത് ട്രംപ് ഭരണകൂടത്തിന്റെ വിജയമായി കണക്കാക്കുന്നു.

രാഷ്ട്രീയവും വ്യാപാരവും വേറിട്ടു കാണാനാണ് ട്രംപ് ആഗ്രഹിക്കുന്നത്. ഹോര്‍മുസ് കടലിടുക്കിലെ സുരക്ഷയില്‍ ഇരുരാജ്യങ്ങള്‍ക്കും താല്പര്യമുണ്ടെങ്കിലും, സൈനികമായ നീക്കങ്ങളില്‍ ചൈനയെ പങ്കാളിയാക്കില്ല.

ചൈന മധ്യസ്ഥതയ്ക്ക് തയ്യാറാണെന്ന സൂചന നല്‍കിയെങ്കിലും അത് നിരസിച്ചതിലൂടെ അന്താരാഷ്ട്ര തലത്തില്‍ തങ്ങളുടെ കരുത്ത് തെളിയിക്കാനാണ് ട്രംപ് ശ്രമിക്കുന്നത്.

ഇറാന്‍ മേല്‍ കടുത്ത ഉപരോധങ്ങള്‍ ഏര്‍പ്പെടുത്തിക്കൊണ്ട് തന്നെ അവരെ ചര്‍ച്ചയുടെ മേശയിലേക്ക് എത്തിക്കാന്‍ അമേരിക്കയ്ക്ക് സാധിക്കുമെന്നാണ് വൈറ്റ് ഹൗസിന്റെ വിലയിരുത്തല്‍.