വാഷിംഗ്ടൺ: അമേരിക്കയിൽ കുട്ടികളുടെ സംരക്ഷണത്തിനായി കോടതി ഉത്തരവിട്ട തുക (Child Support) നൽകാത്തവർക്കും, വ്യാജരേഖകളിലൂടെ പൗരത്വം നേടിയവർക്കുമെതിരെ കർശന നടപടികളുമായി ട്രംപ് ഭരണകൂടം മുന്നോട്ട്. ചൈൽഡ് സപ്പോർട്ട് ഇനത്തിൽ വലിയ തുക കുടിശ്ശികയുള്ള അമേരിക്കൻ പൗരന്മാരുടെ പാസ്‌പോർട്ടുകൾ റദ്ദാക്കുമെന്ന് സ്റ്റേറ്റ് ഡിപ്പാർട്ട്‌മെന്റ് അറിയിച്ചു. ഇതിനു പിന്നാലെ, നിയമവിരുദ്ധമായ മാർഗങ്ങളിലൂടെ പൗരത്വം നേടിയവരെ കണ്ടെത്തി അത് റദ്ദാക്കാനുള്ള (Denaturalization) നീക്കങ്ങൾ യുദ്ധകാലാടിസ്ഥാനത്തിൽ വർദ്ധിപ്പിക്കുമെന്ന് ആക്ടിംഗ് അറ്റോർണി ജനറൽ ടോഡ് ബ്ലാഞ്ചും മുന്നറിയിപ്പ് നൽകി.
 

മെയ് 7-ന് സ്റ്റേറ്റ് ഡിപ്പാർട്ട്‌മെന്റ് പുറത്തിറക്കിയ വാർത്താക്കുറിപ്പ് പ്രകാരം, ചൈൽഡ് സപ്പോർട്ട് ഇനത്തിൽ 2,500 ഡോളറിലധികം കുടിശ്ശികയുള്ള വ്യക്തികളുടെ പാസ്‌പോർട്ട് റദ്ദാക്കാൻ ഡിപ്പാർട്ട്‌മെന്റ് ഓഫ് ഹെൽത്ത് ആൻഡ് ഹ്യൂമൻ സർവീസസുമായി (എച്ച്എച്ച്എസ്) ചേർന്ന് വിപുലമായ പദ്ധതിയാണ് ആവിഷ്കരിച്ചിരിക്കുന്നത്. നിലവിലെ ഫെഡറൽ നിയമപ്രകാരം കുടിശ്ശികയുള്ളവർക്ക് പുതിയ പാസ്‌പോർട്ട് ലഭിക്കില്ലെങ്കിലും, നിലവിലുള്ള പാസ്‌പോർട്ടുകൾ കൂടി റദ്ദാക്കാനാണ് പുതിയ തീരുമാനം. ഇതോടെ ഇവർക്ക് അന്താരാഷ്ട്ര യാത്രകൾ നടത്താൻ സാധിക്കില്ല. അമേരിക്കൻ കുടുംബങ്ങളെ സംരക്ഷിക്കുന്നതിനും മാതാപിതാക്കൾ കുട്ടികളോടുള്ള സാമ്പത്തിക ഉത്തരവാദിത്തം കൃത്യമായി നിറവേറ്റുന്നു എന്ന് ഉറപ്പാക്കാനുമാണ് ഈ നടപടിയെന്ന് സ്റ്റേറ്റ് ഡിപ്പാർട്ട്‌മെന്റ് വ്യക്തമാക്കി. കുടിശ്ശിക തീർപ്പാക്കി രേഖകളിൽ നിന്ന് പേര് നീക്കം ചെയ്താൽ മാത്രമേ ഇവർക്ക് പാസ്‌പോർട്ട് ആനുകൂല്യങ്ങൾ തിരികെ ലഭിക്കൂ.

അതേസമയം, അമേരിക്കൻ പൗരത്വം നേടിയവരിൽ കൃത്രിമം കാണിച്ചവരെ കണ്ടെത്താനുള്ള നടപടികൾ ഡിപ്പാർട്മെന്റ് ഓഫ് ജസ്റ്റിസ് (ഡിഒജെ) അസാധാരണ വേഗത്തിൽ വർദ്ധിപ്പിക്കുകയാണ്. ഫീനിക്സിൽ നടന്ന ബോർഡർ സെക്യൂരിറ്റി എക്സ്‌പോയിൽ സംസാരിക്കവെ, ബൈഡൻ ഭരണകൂടം നാല് വർഷം കൊണ്ട് ഫയൽ ചെയ്ത പൗരത്വം റദ്ദാക്കൽ കേസുകളുടെ എണ്ണം തങ്ങൾ വെറും ഒരാഴ്ചയ്ക്കുള്ളിൽ മറികടക്കുമെന്ന് ആക്ടിംഗ് അറ്റോർണി ജനറൽ ടോഡ് ബ്ലാഞ്ച് പ്രഖ്യാപിച്ചു. തെറ്റായ മാർഗങ്ങളിലൂടെ പൗരത്വം കൈക്കലാക്കിയവർ ഭയപ്പെടേണ്ടതുണ്ടെന്നും അദ്ദേഹം കൂട്ടിച്ചേർത്തു. മുൻകാലങ്ങളിൽ ഭീകരവാദം, യുദ്ധക്കുറ്റങ്ങൾ തുടങ്ങിയ അതീവ ഗുരുതരമായ കേസുകളിൽ മാത്രം ഒതുങ്ങിനിന്നിരുന്ന പൗരത്വം റദ്ദാക്കൽ നടപടികൾ, ഇനിമുതൽ സാമ്പത്തിക കുറ്റകൃത്യങ്ങൾ ഉൾപ്പെടെയുള്ള വിവിധ തട്ടിപ്പുകളിലൂടെ പൗരത്വം നേടിയവരിലേക്കും വ്യാപിക്കും. നിയമവിരുദ്ധ കുടിയേറ്റക്കാരെ മാത്രമല്ല, നിയമപരമായ മാർഗങ്ങളിലൂടെ വന്ന് പിന്നീട് പൗരത്വ രേഖകളിൽ കൃത്രിമം കാണിച്ചവരെയും ട്രംപ് ഭരണകൂടത്തിന്റെ ഈ പുതിയ നീക്കം ബാധിക്കും.