തിരുവനന്തപുരം: കോൺഗ്രസ് നിയമസഭാകക്ഷി നേതാവിനെ കണ്ടെത്താനുള്ള ചർച്ചകൾ നിർണ്ണായക ഘട്ടത്തിലേക്ക് കടക്കവെ, വി.ഡി. സതീശൻ ക്യാമ്പിനെ സമ്മർദ്ദത്തിലാക്കുന്ന പ്രതികരണവുമായി മുൻ കെ.പി.സി.സി പ്രസിഡന്റ് കെ. സുധാകരൻ. കോൺഗ്രസിൽ ഒരു സതീശൻ മാത്രമല്ല, കഴിവുള്ള നിരവധി 'സതീശന്മാർ' ഉണ്ടെന്ന് അദ്ദേഹം വാർത്താ ഏജൻസിയായ എ.എൻ.ഐയോട് പറഞ്ഞു. മുഖ്യമന്ത്രി സ്ഥാനത്തേക്ക് ഒരു വ്യക്തിയുടെ പേരല്ല, മറിച്ച് ഒരു പ്രത്യേക 'ഫോർമുല'യാണ് താൻ നിരീക്ഷകർക്ക് മുന്നിൽ വെച്ചിട്ടുള്ളതെന്നും അത് പരസ്യപ്പെടുത്താൻ കഴിയില്ലെന്നും സുധാകരൻ വ്യക്തമാക്കി.

​മുഖ്യമന്ത്രിയാകുന്ന വ്യക്തിക്ക് എം.എൽ.എമാരുടെ വ്യക്തമായ പിന്തുണ ആവശ്യമാണെന്ന് സുധാകരൻ ഓർമ്മിപ്പിച്ചു. ഒരു പാർട്ടിയുടെ രാഷ്ട്രീയ അസ്തിത്വം എം.എൽ.എമാരാണ്. മുഖ്യമന്ത്രിയാകാൻ ആഗ്രഹിക്കുന്നവർ ഭൂരിപക്ഷം എം.എൽ.എമാരുടെ പിന്തുണ ഉറപ്പാക്കണം. എം.എൽ.എമാർ പിന്തുണച്ചാലേ പാർട്ടിക്ക് മുന്നോട്ടുപോകാൻ കഴിയൂ. തന്നെ പിന്തുണയ്ക്കുന്നവരെ താനും പിന്തുണയ്ക്കുമെന്ന പ്രഖ്യാപനത്തിലൂടെ പാർട്ടിയിലെ ഗ്രൂപ്പ് സമവാക്യങ്ങൾ മാറ്റിമറിക്കാനുള്ള നീക്കമാണ് സുധാകരൻ നടത്തുന്നതെന്ന് രാഷ്ട്രീയ നിരീക്ഷകർ കരുതുന്നു.

​എം.എൽ.എമാരുടെ ഭൂരിപക്ഷം മാത്രമല്ല, സാധാരണക്കാരായ പ്രവർത്തകരുടെ വികാരം കൂടി കണക്കിലെടുത്തായിരിക്കണം മുഖ്യമന്ത്രിയെ നിശ്ചയിക്കേണ്ടതെന്ന് അദ്ദേഹം കൂട്ടിച്ചേർത്തു. നിരീക്ഷകരായ അജയ് മാക്കൻ, മുകുൾ വാസ്നിക് എന്നിവരുമായി നടത്തിയ കൂടിക്കാഴ്ചയിൽ കേരളത്തിലെ യഥാർത്ഥ രാഷ്ട്രീയ സാഹചര്യം താൻ ബോധ്യപ്പെടുത്തിയിട്ടുണ്ട്. മുഖ്യമന്ത്രിയെ സംബന്ധിച്ച അന്തിമ തീരുമാനം പാർട്ടി കൈക്കൊള്ളട്ടെ എന്നും വ്യക്തിപരമായ താൽപ്പര്യങ്ങളേക്കാൾ പാർട്ടിയുടെ കെട്ടുറപ്പിനാണ് പ്രാധാന്യമെന്നും അദ്ദേഹം പറഞ്ഞു.