ലോസ് ആഞ്ചലസ് :ലോസ് ആഞ്ചലസ് മേയര്‍ സ്ഥാനത്തേക്ക് വീണ്ടും മത്സരിക്കുന്ന കാരന്‍ ബാസിനെ പിന്തുണച്ച് മുന്‍ അമേരിക്കന്‍ വൈസ് പ്രസിഡന്റ് കമല ഹാരിസ്. ജൂണ്‍ 2-ന് നടക്കുന്ന പ്രൈമറി തെരഞ്ഞെടുപ്പിന് മുന്നോടിയായാണ് ഔദ്യോഗിക പിന്തുണ പ്രഖ്യാപിച്ചത്.

കാരന്‍ ബാസിന്റെ ഭരണകാലത്ത് നഗരത്തിലെ കുറ്റകൃത്യങ്ങളുടെ നിരക്ക് 1960-കള്‍ക്ക് ശേഷമുള്ള ഏറ്റവും കുറഞ്ഞ നിലയിലെത്തിയെന്നും ഭവനരഹിതരുടെ എണ്ണത്തില്‍ ഗണ്യമായ കുറവുണ്ടായെന്നും കമല ഹാരിസ് പ്രശംസിച്ചു.

ജീവിതച്ചെലവ് കുറയ്ക്കുക, നഗരത്തിലെ അടിസ്ഥാന സൗകര്യങ്ങള്‍ വികസിപ്പിക്കുക, പൊതുസുരക്ഷ ഉറപ്പാക്കുക എന്നിവയിലാണ് തന്റെ രണ്ടാം ഊഴത്തിലും ശ്രദ്ധ കേന്ദ്രീകരിക്കുന്നതെന്ന് ബാസ് വ്യക്തമാക്കി.

കമല ഹാരിസിന് പുറമെ മുന്‍ ഹൗസ് സ്പീക്കര്‍ നാന്‍സി പെലോസി, സെനറ്റര്‍ ആദം ഷിഫ് എന്നിവരും ബാസിന് പിന്തുണ പ്രഖ്യാപിച്ചിട്ടുണ്ട്.

പ്രമുഖരായ നിരവധി നേതാക്കളുടെ പിന്തുണ ബാസിനുണ്ടെങ്കിലും, ഫണ്ട് സമാഹരണത്തില്‍ റിയാലിറ്റി ഷോ താരം സ്‌പെന്‍സര്‍ പ്രാറ്റ്, കൗണ്‍സില്‍ വുമണ്‍ നിത്യ രാമന്‍ എന്നിവരാണ് നിലവില്‍ മുന്നില്‍ നില്‍ക്കുന്നത്.

തന്റെ മൂല്യങ്ങള്‍ക്കായി പോരാടുന്ന, സുരക്ഷിതമായ ലോസ് ആഞ്ചലസ് കെട്ടിപ്പടുക്കാന്‍ ബാസിന്റെ നേതൃത്വം അനിവാര്യമാണെന്ന് കമല ഹാരിസ് പ്രസ്താവനയില്‍ പറഞ്ഞു.