കൊച്ചി: നിയമസഭാ തെരഞ്ഞെടുപ്പിലെ യുഡിഎഫ് തരംഗത്തിൽ കേരളത്തിലെ പരമ്പരാഗത ജാതി-സമുദായ സമവാക്യങ്ങൾ അപ്രസക്തമായി. തെരഞ്ഞെടുപ്പ് കാലത്ത് രാഷ്ട്രീയ പാർട്ടികളുടെ വിധി നിർണ്ണയിക്കാറുള്ള എൻഎസ്എസ്, എസ്എൻഡിപി നേതൃത്വങ്ങളുടെ നിലപാടുകൾക്ക് ഇത്തവണ വോട്ടർമാരുടെ ഇടയിൽ കാര്യമായ സ്വാധീനം ചെലുത്താനായില്ലെന്നാണ് ഫലങ്ങൾ സൂചിപ്പിക്കുന്നത്. പ്രമുഖ സമുദായ സംഘടനകൾ സ്വീകരിച്ച രാഷ്ട്രീയ നിലപാടുകളെ മറികടന്നുകൊണ്ട് വലിയൊരു ജനവിഭാഗം യുഡിഎഫിന് വോട്ട് ചെയ്തത് രാഷ്ട്രീയ കേരളത്തിൽ പുതിയ ചർച്ചകൾക്ക് വഴിയൊരുക്കുകയാണ്.

​കോൺഗ്രസിന്റെ മുഖ്യമന്ത്രി സ്ഥാനാർത്ഥികളായി ഉയർത്തിക്കാട്ടപ്പെട്ട മൂന്ന് പേരും നായർ സമുദായത്തിൽ നിന്നുള്ളവരായിരുന്നിട്ടും എൻഎസ്എസ് നേതൃത്വം യുഡിഎഫുമായി അകൽച്ചയിലായിരുന്നു. 2025-ൽ ഇടതു സർക്കാർ സംഘടിപ്പിച്ച ആഗോള അയ്യപ്പ സംഗമത്തോട് സഹകരിക്കാനുള്ള എൻഎസ്എസിന്റെ തീരുമാനം സമുദായത്തിനുള്ളിൽ നിന്നുതന്നെ വലിയ വിമർശനങ്ങൾക്കിടയാക്കിയിരുന്നു. നായർ സമുദായത്തിന് നിർണ്ണായക സ്വാധീനമുള്ള വട്ടിയൂർക്കാവ്, നേമം, ഹരിപ്പാട്, പുതുപ്പള്ളി തുടങ്ങിയ 20-ഓളം മണ്ഡലങ്ങളിൽ സമുദായ നേതൃത്വത്തിന്റെ താൽപ്പര്യങ്ങളല്ല, മറിച്ച് രാഷ്ട്രീയ തരംഗമാണ് പ്രതിഫലിച്ചത്.

​സമാനമായ സ്ഥിതിതന്നെയാണ് ഈഴവ സമുദായ വോട്ടുകളുടെ കാര്യത്തിലും പ്രകടമായത്. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ മുഖ്യമന്ത്രിയുടെ ഔദ്യോഗിക വാഹനത്തിൽ അയ്യപ്പ സംഗമ വേദിയിലെത്തിയത് ഇടതുപക്ഷത്തോടുള്ള അദ്ദേഹത്തിന്റെ അനുഭാവത്തിന്റെ വ്യക്തമായ സൂചനയായിരുന്നു. എന്നാൽ, 45 മണ്ഡലങ്ങളിൽ മേധാവിത്വമുള്ള ഈഴവ സമുദായത്തിലെ വോട്ടർമാർ നേതൃത്വത്തിന്റെ ഈ പരസ്യനിലപാടിനെ പൂർണ്ണമായും ഉൾക്കൊണ്ടില്ലെന്നാണ് വിലയിരുത്തൽ. ആലപ്പുഴ, ചേർത്തല, മണലൂർ, വൈക്കം തുടങ്ങിയ മണ്ഡലങ്ങളിലെ വോട്ട് നില ഇതിന് അടിവരയിടുന്നു.

​മുസ്ലീം, ക്രിസ്ത്യൻ തുടങ്ങിയ ന്യൂനപക്ഷ വിഭാഗങ്ങൾ യുഡിഎഫിനെ വൻതോതിൽ പിന്തുണച്ചപ്പോൾ, ഹിന്ദു സമുദായ വോട്ടുകൾ പലയിടത്തും ചിതറിപ്പോയതായാണ് കണക്കുകൾ വ്യക്തമാക്കുന്നത്. തെക്കൻ കേരളത്തിൽ എൽഡിഎഫ് നേരിട്ട വലിയ തിരിച്ചടി, സമുദായ സംഘടനകളുടെ നേതൃത്വത്തിന് അണികൾക്കിടയിലുള്ള സ്വാധീനം കുറയുന്നതിന്റെ ലക്ഷണമായി രാഷ്ട്രീയ നിരീക്ഷകർ കാണുന്നു. സമുദായ നേതാക്കളുടെ താത്പര്യങ്ങൾക്കപ്പുറം ജനകീയ വിഷയങ്ങളും ഭരണവിരുദ്ധ വികാരവുമാണ് ഇത്തവണ ജനവിധിയെ സ്വാധീനിച്ച പ്രധാന ഘടകങ്ങൾ.