​തിരുവനന്തപുരം: കൃഷിവകുപ്പ് സ്പെഷ്യൽ സെക്രട്ടറി എൻ. പ്രശാന്ത് ഐഎഎസിനെതിരെ സർക്കാർ വീണ്ടും അച്ചടക്ക നടപടി ആരംഭിച്ചു. സർക്കാരിന്റെ മുൻകൂർ അനുമതിയില്ലാതെ മാധ്യമങ്ങളോട് സംസാരിച്ചതിനാണ് ചീഫ് സെക്രട്ടറി നോട്ടീസ് നൽകിയത്. സർവീസിൽ ഇരിക്കെ ഇത് എട്ടാമത്തെ തവണയാണ് പ്രശാന്തിനെതിരെ വകുപ്പുതല നടപടികൾ ഉണ്ടാകുന്നത്. നിലവിൽ സസ്പെൻഷനിലുള്ള ഇദ്ദേഹത്തിന്റെ സസ്പെൻഷൻ കാലാവധി നീട്ടുന്നതുമായി ബന്ധപ്പെട്ട് റിവ്യൂ കമ്മിറ്റി ചേരാനിരിക്കെയാണ് പുതിയ നടപടി.

​സീനിയർ ഐഎഎസ് ഉദ്യോഗസ്ഥനായ ഡോ. എ. ജയതിലകിനെതിരെ സോഷ്യൽ മീഡിയയിലൂടെ കടുത്ത ആരോപണങ്ങൾ ഉന്നയിച്ചതിനെ തുടർന്നാണ് 2024 നവംബർ 11-ന് പ്രശാന്തിനെ സർവീസിൽ നിന്ന് സസ്പെൻഡ് ചെയ്തത്. പ്രശാന്ത് ഉന്നയിച്ച ആരോപണങ്ങൾ സർവീസ് ചട്ടങ്ങളുടെ ലംഘനമാണെന്ന് സർക്കാർ കണ്ടെത്തിയിരുന്നു. സസ്പെൻഷൻ കാലയളവിലും ചട്ടങ്ങൾ ലംഘിച്ച് മാധ്യമങ്ങളിലൂടെ പ്രതികരിക്കുന്നത് തുടരുന്നതാണ് പുതിയ നോട്ടീസിന് ആധാരമായ സാഹചര്യം.

​കേരളത്തിന്റെ സിവിൽ സർവീസ് ചരിത്രത്തിൽ അത്യപൂർവ്വമായ നടപടികൾക്കാണ് കഴിഞ്ഞ നവംബർ മാസം സാക്ഷ്യം വഹിച്ചത്. മതപരമായ പേരിൽ വാട്‌സാപ്പ് ഗ്രൂപ്പ് ഉണ്ടാക്കിയ സംഭവത്തിൽ കെ. ഗോപാലകൃഷ്ണനെയും, ഐഎഎസ് പോരിന്റെ പശ്ചാത്തലത്തിൽ എൻ. പ്രശാന്തിനെയും ഒരേ ദിവസമാണ് സർക്കാർ സസ്പെൻഡ് ചെയ്തത്. സർക്കാരിന്റെ താക്കീതുകൾ അവഗണിച്ച് മാധ്യമങ്ങളിലൂടെയുള്ള പ്രത്യാക്രമണങ്ങൾ തുടരുന്നത് പ്രശാന്തിന്റെ സർവീസ് ഭാവിക്ക് കൂടുതൽ വെല്ലുവിളിയാകുമെന്നാണ് വിലയിരുത്തപ്പെടുന്നത്.