പാലക്കാട്: കൊല്ലങ്കോട് വീടിനുള്ളിൽ രഹസ്യ അറയുണ്ടാക്കി വൻതോതിൽ വിദേശമദ്യം സൂക്ഷിച്ച സ്ത്രീയെ എക്സൈസ് സംഘം പിടികൂടി. കൊല്ലങ്കോട് സ്വദേശിനിയായ ശശികലയെയാണ് (52) എക്സൈസ് ഇൻസ്‌പെക്ടർ തൻസിൽ താഹയുടെ നേതൃത്വത്തിലുള്ള സംഘം അറസ്റ്റ് ചെയ്തത്. ഇവരുടെ വീട്ടിൽ നടത്തിയ പരിശോധനയിൽ വിൽപനയ്ക്കായി സൂക്ഷിച്ച 124 ലിറ്റർ വിദേശമദ്യമാണ് ഉദ്യോഗസ്ഥർ കണ്ടെടുത്തത്.

​വീടിനുള്ളിൽ അതീവ രഹസ്യമായി നിർമ്മിച്ച അറയ്ക്കുള്ളിലായിരുന്നു മദ്യക്കുപ്പികൾ ഒളിപ്പിച്ചിരുന്നത്. അനധികൃതമായി മദ്യവിൽപന നടക്കുന്നുണ്ടെന്ന രഹസ്യവിവരത്തെ തുടർന്ന് എക്സൈസ് സംഘം വീട്ടിൽ മിന്നൽ പരിശോധന നടത്തുകയായിരുന്നു. ആദ്യഘട്ടത്തിൽ കണ്ടെത്താൻ പ്രയാസമായ രീതിയിലായിരുന്നു അറയുടെ സജ്ജീകരണം. എന്നാൽ വിശദമായ തിരച്ചിലിൽ രഹസ്യ അറ കണ്ടെത്തുകയും അതിനുള്ളിൽ അടുക്കിവെച്ച നിലയിൽ മദ്യശേഖരം പിടിച്ചെടുക്കുകയും ചെയ്തു.

​കൊല്ലങ്കോട് എക്സൈസ് റേഞ്ച് ഇൻസ്‌പെക്ടർ തൻസിൽ താഹയ്‌ക്കൊപ്പം ഗ്രേഡ് ഇൻസ്‌പെക്ടർ സിബി സിറിൽ, അസിസ്റ്റന്റ് ഗ്രേഡ് ഇൻസ്‌പെക്ടർമാരായ പി. ചെന്താമര, കെ. വെള്ളകുട്ടി, പ്രിവന്റീവ് ഓഫീസർ എസ്. നടേഷ് എന്നിവർ പരിശോധനയിൽ പങ്കെടുത്തു. സിവിൽ എക്സൈസ് ഓഫീസർമാരായ കെ. അഭിലാഷ്, എച്ച്. നൗഫൽ, ജി. വിജേഷ് കുമാർ, സി. രാധാകൃഷ്ണൻ എന്നിവരും വനിതാ ഓഫീസർമാരായ കെ.സി. സംഗീത, പി.വൈ. സീനത്ത്, സി. അഞ്ചു, വി. ഷീജ എന്നിവരടങ്ങുന്ന സംഘമാണ് പ്രതിയെ കസ്റ്റഡിയിലെടുത്തത്. കോടതിയിൽ ഹാജരാക്കിയ പ്രതിക്കെതിരെ അബ്കാരി നിയമപ്രകാരം കേസെടുത്തു.