ചെന്നൈ: തമിഴ്‌നാട്ടിലെ കന്നി തെരഞ്ഞെടുപ്പില്‍ നടന്‍ വിജയ്യുടെ ടിവികെ (TVK) പ്രതീക്ഷിച്ചതിലും മികച്ച പ്രകടനം കാഴ്ചവെക്കുമെന്ന് എക്സിറ്റ് പോളുകള്‍ പ്രവചിച്ചതിന് പിന്നാലെ, വിജയ്യെ പ്രശംസിച്ച് ഭരണകക്ഷിയായ ഡിഎംകെയുടെ സഖ്യകക്ഷിയായ എംഡിഎംകെ തലവന്‍ വൈകോ. വിജയ്യുടെ പാര്‍ട്ടി വലിയൊരു രാഷ്ട്രീയ ശക്തിയായി മാറുമെന്നാണ് വൈകോയുടെ പ്രസ്താവന.

ടിവികെ നിര്‍ണായകമായ സീറ്റുകള്‍ നേടാന്‍ സാധ്യതയുണ്ടെങ്കിലും, ഡിഎംകെ വീണ്ടും അധികാരത്തില്‍ വരുമെന്നാണ് ഭൂരിഭാഗം സര്‍വ്വേകളും വ്യക്തമാക്കുന്നത്. യുവാക്കള്‍ക്കായി നല്‍കിയ വാഗ്ദാനങ്ങളും ഉയര്‍ന്ന പോളിങ് ശതമാനവും വിജയ്ക്ക് അനുകൂലമാകുമെന്നാണ് റിപ്പോര്‍ട്ടുകള്‍ വിലയിരുത്തുന്നത്.

ടിവികെ അവഗണിക്കാന്‍ കഴിയാത്ത ഒരു ശക്തിയാണ്, അത് അത്ഭുതകരമായ ചില ഫലങ്ങള്‍ നല്‍കിയേക്കാം, പക്ഷേ, ദ്രാവിഡ പ്രസ്ഥാനം തമിഴ്‌നാട് രാഷ്ട്രീയത്തില്‍ ശാശ്വതമായ ശക്തിയായി തുടരും.' അദ്ദേഹം പറഞ്ഞു. പ്രവചനങ്ങളെല്ലാം എം.കെ. സ്റ്റാലിന്‍ അധികാരത്തില്‍ തിരിച്ചെത്താനുള്ള സാധ്യതയെയാണ് ശരിവെക്കുന്നത്.

തമിഴ്‌നാട് നിയമസഭാ തെരഞ്ഞെടുപ്പില്‍ വിജയ്യുടെ പാര്‍ട്ടി ഗണ്യമായ സീറ്റുകള്‍ നേടി കിങ് മേക്കറായി മാറിയേക്കുമെന്ന്എക്സിറ്റ് പോളുകളും പ്രവചിക്കുമ്പോള്‍, 234-ല്‍ 98-120 സീറ്റുകള്‍ വരെ നേടി പുതിയ പാര്‍ട്ടി ഡിഎംകെയെ അട്ടിമറിക്കാന്‍ സാധ്യതയുണ്ടെന്നാണ് ആക്സിസ് മൈ ഇന്ത്യയുടെ (Axis My India) പ്രവചനം.