​കോൺഗ്രസിലെ മുഖ്യമന്ത്രി സ്ഥാനത്തെച്ചൊല്ലി സാമൂഹിക മാധ്യമങ്ങളിൽ നടക്കുന്ന പ്രചാരണങ്ങൾക്ക് പിന്നിൽ സിപിഎം ആണെന്ന് എം.എൽ.എ മാത്യു കുഴൽനാടൻ ആരോപിച്ചു. കോഴിക്കോട്ട് മാധ്യമങ്ങളോട് സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്. തിരഞ്ഞെടുപ്പ് കാലത്ത് ഇടതുപക്ഷത്തിന് വേണ്ടി സജീവമായി പ്രവർത്തിച്ച സൈബർ അക്കൗണ്ടുകളാണ് ഇപ്പോൾ കോൺഗ്രസിനെതിരെ ഇത്തരം തെറ്റായ പ്രചാരണങ്ങൾ അഴിച്ചുവിടുന്നതെന്ന് അദ്ദേഹം കുറ്റപ്പെടുത്തി.

​സർക്കാരിലെ ചില ഉദ്യോഗസ്ഥർ ഇപ്പോഴും ഇടതുപക്ഷത്തിന്റെ 'ബാധ'യിൽ നിന്ന് മുക്തരല്ലെന്ന് അദ്ദേഹം പരിഹസിച്ചു. വടകരയിൽ പ്രസവിച്ചുകിടക്കുന്ന സ്ത്രീയുടെ വീട്ടിൽ നടന്ന പൊലീസ് റെയ്ഡ് ഇതിന് വ്യക്തമായ ഉദാഹരണമാണെന്ന് കുഴൽനാടൻ പറഞ്ഞു. ഉദ്യോഗസ്ഥരുടെ ഇത്തരം നടപടികൾ സർക്കാരിന്റെ യഥാർത്ഥ മുഖമാണ് പുറത്തുകൊണ്ടുവരുന്നത്. പല കാര്യങ്ങളിലും ഇപ്പോൾ സർക്കാരിന്റെ തനിനിറം വ്യക്തമായിക്കൊണ്ടിരിക്കുകയാണെന്നും അദ്ദേഹം കൂട്ടിച്ചേർത്തു.

​2019-ലെ പ്രളയം മനുഷ്യനിർമിതമാണെന്ന തന്റെ പഴയ ആരോപണത്തെ സാധൂകരിക്കുന്നതാണ് സർക്കാരിൽ പ്രവർത്തിച്ചിരുന്ന ഉദ്യോഗസ്ഥൻ ബിജു പ്രഭാകറിന്റെ പുസ്തകമെന്ന് മാത്യു കുഴൽനാടൻ ചൂണ്ടിക്കാട്ടി. ഇക്കാര്യത്തിൽ സർക്കാർ ഇനിയെങ്കിലും സത്യം വെളിപ്പെടുത്താൻ തയ്യാറാവണം. ഒരു മന്ത്രി തന്നെ മൊഴിമാറ്റിപ്പറഞ്ഞതടക്കമുള്ള സംഭവങ്ങൾ സർക്കാരിന്റെ അവസാന നാളുകളിൽ അസ്വസ്ഥതകൾ വർധിപ്പിക്കുന്നുണ്ടെന്നും അദ്ദേഹം പറഞ്ഞു.