കുംഭമേളയിലൂടെ വൈറലായ തരുണിയുടെ വിവാദ വിവാഹവുമായി ബന്ധപ്പെട്ട അന്വേഷണം മധ്യപ്രദേശ് പോലീസ് ഊർജ്ജിതമാക്കുന്നു. പെൺകുട്ടിയുടെ മൊഴി രേഖപ്പെടുത്തുന്നതിനായി അന്വേഷണ സംഘം വീണ്ടും കേരളത്തിലെത്തും. വിവാഹത്തിൽ നിയമപരമായ വീഴ്ചകളില്ലെന്നും പെൺകുട്ടിയുടെ പ്രായം തെളിയിക്കുന്ന രേഖകൾ കൃത്യമാണെന്നുമാണ് കേരള പോലീസിന്റെ നിലപാട്. എന്നാൽ, പെൺകുട്ടിയുടെ മൊഴി രേഖപ്പെടുത്താൻ നേരത്തെ നടത്തിയ ശ്രമങ്ങൾ പരാജയപ്പെട്ടതായും കൂടുതൽ അന്വേഷണം ആവശ്യമാണെന്നും മധ്യപ്രദേശ് പോലീസ് കമ്മീഷനെ അറിയിച്ചു.

 അന്വേഷണ പുരോഗതിയിൽ അതൃപ്തി രേഖപ്പെടുത്തിയ പട്ടികവർഗ കമ്മീഷൻ, ഇരു സംസ്ഥാനങ്ങളിലെയും ഉന്നത പോലീസ് ഉദ്യോഗസ്ഥരോട് റിപ്പോർട്ട് സമർപ്പിക്കാൻ നിർദ്ദേശിച്ചിട്ടുണ്ട്.

പെൺകുട്ടിയുടെ മാതാപിതാക്കൾ നൽകിയ പരാതിയിൽ ഭർത്താവ് ഫർമാനെതിരെ തട്ടിക്കൊണ്ടുപോകലിന് നേരത്തെ കേസെടുത്തിരുന്നു. ഈ കേസിൽ ഫർമാന് കേരള ഹൈക്കോടതി മുൻകൂർ ജാമ്യം അനുവദിച്ചിട്ടുണ്ട്. കേരള പോലീസിൽ നിന്ന് ആവശ്യമായ രേഖകൾ ലഭിക്കാത്തതും മൊഴി രേഖപ്പെടുത്താൻ സാധിക്കാത്തതുമാണ് അന്വേഷണത്തിന് തടസ്സമാകുന്നതെന്ന് മധ്യപ്രദേശ് പോലീസ് വാദിക്കുന്നു. വരും ദിവസങ്ങളിൽ മൊഴി രേഖപ്പെടുത്തുന്നതോടെ കേസിൽ കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്.