ടെക്‌സാസ് : വടക്കന്‍ ടെക്‌സാസില്‍ വീശിയടിച്ച ശക്തമായ ടൊര്‍ണാഡോയില്‍ (ചുഴലിക്കാറ്റ്) രണ്ട് പേര്‍ കൊല്ലപ്പെട്ടു. ശനിയാഴ്ച രാത്രിയുണ്ടായ പ്രകൃതിക്ഷോഭത്തില്‍ നിരവധി വീടുകള്‍ തകരുകയും ഇരുപതോളം കുടുംബങ്ങള്‍ ഭവനരഹിതരാകുകയും ചെയ്തതായി അധികൃതര്‍ അറിയിച്ചു.

വൈസ് കൗണ്ടിയിലെ റണ്‍വേ ബേ , പാര്‍ക്കര്‍ കൗണ്ടിയിലെ സ്പ്രിംഗ്ടൗണ്‍  എന്നിവിടങ്ങളിലാണ് മരണം റിപ്പോര്‍ട്ട് ചെയ്തത്. വീണുകിടക്കുന്ന മരങ്ങളും വൈദ്യുതി ലൈനുകളും കാരണം രക്ഷാപ്രവര്‍ത്തനം തടസ്സപ്പെട്ടു.

മണിക്കൂറില്‍ ഏകദേശം 217 കിലോമീറ്റര്‍ (135 mph) വേഗതയുള്ള EF-2 വിഭാഗത്തില്‍പ്പെട്ട ടൊര്‍ണാഡോയാണ് റണ്‍വേ ബേയില്‍ ആഞ്ഞടിച്ചതെന്ന് നാഷണല്‍ വെതര്‍ സര്‍വീസ് സ്ഥിരീകരിച്ചു.

ടൊര്‍ണാഡോയെത്തുടര്‍ന്ന് മേഖലയില്‍ വ്യാപകമായ വൈദ്യുതി തടസ്സം നേരിടുന്നുണ്ട്. തകര്‍ന്നടിഞ്ഞ റോഡുകള്‍ പുനഃസ്ഥാപിക്കാനും വൈദ്യുതി ബന്ധം തിരികെ കൊണ്ടുവരാനുമുള്ള ശ്രമങ്ങള്‍ തുടരുകയാണ്.

ഫോര്‍ട്ട് വര്‍ത്തിന് വടക്കുപടിഞ്ഞാറുള്ള പ്രദേശങ്ങളിലാണ് നാശമുണ്ടായത്. അസ്ലെ (Azle) ഭാഗത്തും അപകടകാരിയായ ചുഴലിക്കാറ്റ് ദൃശ്യമായതായി കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിരുന്നു. തകര്‍ന്ന വീടുകളില്‍ ആരെങ്കിലും കുടുങ്ങിക്കിടക്കുന്നുണ്ടോ എന്നറിയാന്‍ രക്ഷാസേന തിരച്ചില്‍ തുടരുകയാണ്.