ഇസ്ലാമാബാദ്: പശ്ചിമേഷ്യൻ സംഘർഷം ലഘൂകരിക്കാനുള്ള നയതന്ത്ര നീക്കങ്ങളിൽ നിർണ്ണായക വഴിത്തിരിവ്. വാഷിംഗ്ടണും ടെഹ്‌റാനും തമ്മിൽ പാകിസ്താൻ വഴി നടത്തുന്ന പരോക്ഷ ചർച്ചകളിൽ ശുഭസൂചനകൾ തെളിയുന്നതായി അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു. ദീർഘനാളായി നിലനിന്നിരുന്ന നയതന്ത്ര സ്തംഭനാവസ്ഥയ്ക്ക് പരിഹാരമാകുമെന്ന പ്രതീക്ഷയിലാണ് ഇസ്ലാമാബാദിലെ നയതന്ത്ര വൃത്തങ്ങൾ.
 

സമാധാന ചർച്ചകളിൽ പ്രോത്സാഹനജനകമായ സൂചനകൾ ദൃശ്യമായിത്തുടങ്ങിയിരിക്കുന്നു എന്ന് പാകിസ്താൻ മാധ്യമമായ എ.ആർ.വൈ (ARY) ന്യൂസ് ചെയർമാൻ കമ്രാൻ ഖാൻ എക്സിലൂടെ  വെളിപ്പെടുത്തി. ഹോർമുസ് കടലിടുക്ക് തുറന്നു നൽകുന്നതിനും യുദ്ധം അവസാനിപ്പിക്കുന്നതിനും ഇറാൻ സമർപ്പിച്ച പുതിയ നിർദ്ദേശങ്ങളാണ് ഈ ശുഭപ്രതീക്ഷയ്ക്ക് ആധാരം. ആണവ ചർച്ചകൾ പിന്നീട് നടത്താമെന്നും പകരമായി സമുദ്രപാതയിലെ നാവിക ഉപരോധം നീക്കണമെന്നുമാണ് ഇറാന്റെ പുതിയ പാക്കേജിലുള്ളത്.

സംഘർഷം അവസാനിപ്പിക്കാൻ ഇറാൻ തയ്യാറാണെങ്കിൽ വാഷിംഗ്ടണുമായി ഫോണിലൂടെ ചർച്ചയാവാമെന്ന് പ്രസിഡന്റ് ഡൊണാൾഡ് ട്രംപ് പ്രതികരിച്ചു.  അമേരിക്കൻ ജനതയുടെ താല്പര്യം സംരക്ഷിക്കുന്ന കരാറുകളിൽ മാത്രമേ ഒപ്പിടൂ എന്നും ഇറാനെ ഒരിക്കലും ആണവായുധം നിർമ്മിക്കാൻ അനുവദിക്കില്ലെന്നും വൈറ്റ് ഹൗസ് വക്താവ് ഒലീവിയ വെയ്ൽസ് ആവർത്തിച്ചു.

ഇറാന്റെ വിദേശകാര്യമന്ത്രി അബ്ബാസ് അരാഗ്ചി പാകിസ്താൻ വഴി നൽകിയ ലിഖിത സന്ദേശങ്ങളിൽ ഹോർമുസ് കടലിടുക്കിനെ സംബന്ധിച്ച ഇറാന്റെ 'റെഡ് ലൈനുകൾ' വ്യക്തമാക്കിയതായാണ് വിവരം. യാത്രയ്ക്കായി സമയം കളയാതെ ഫോണിലൂടെയുള്ള ചർച്ചകൾക്ക് ട്രംപ് മുൻഗണന നൽകുന്നത് സമാധാന നീക്കങ്ങൾ വേഗത്തിലാക്കാൻ സഹായിക്കുമെന്നാണ് കരുതപ്പെടുന്നത്. ഫെബ്രുവരി 28-ലെ സൈനിക നീക്കത്തിന് ശേഷം ഉടലെടുത്ത ആഗോള ഊർജ്ജ പ്രതിസന്ധിക്കും വിപണിയിലെ അസ്ഥിരതയ്ക്കും ഈ ചർച്ചകൾ വിജയകരമായാൽ അറുതിയാകും.