വാഷിംഗ്ടൺ ഡി.സി: വാഷിംഗ്ടൺ ഡി.സിയിലെ ഹിൽട്ടൺ ഹോട്ടലിൽ നടന്ന വാർഷിക വൈറ്റ് ഹൗസ് കറസ്‌പോണ്ടന്റ്‌സ് ഡിന്നറിനിടെയുണ്ടായ വെടിവെപ്പ് സംഭവത്തിൽ നിന്ന് പ്രസിഡന്റ് ഡൊണാൾഡ് ട്രംപും പ്രഥമ വനിത മെലാനിയ ട്രംപും അത്ഭുതകരമായി രക്ഷപ്പെട്ടു. ശനിയാഴ്ച രാത്രി മാധ്യമപ്രവർത്തകരും രാഷ്ട്രീയ പ്രമുഖരും ഒത്തുചേർന്ന ചടങ്ങിനിടെയാണ് വെടിവെപ്പുണ്ടായതും പരിഭ്രാന്തി പടർന്നതും. സംഭവസ്ഥലത്തുണ്ടായിരുന്ന സീക്രട്ട് സർവീസ് ഉദ്യോഗസ്ഥർ ഉടനടി ഇടപെട്ട് പ്രസിഡന്റിനെയും വൈസ് പ്രസിഡന്റ് ജെ.ഡി വാൻസിനെയും മറ്റ് ഉന്നത ഉദ്യോഗസ്ഥരെയും സുരക്ഷിതമായി പുറത്തെത്തിച്ചു. വാഷിംഗ്ടൺ സ്വദേശിയായ മുപ്പത്തിയൊന്നുകാരൻ കോൾ തോമസ് അലൻ ആണ് ആക്രമണത്തിന്  പിന്നിലെന്ന് സിഎൻഎൻ റിപ്പോർട്ട് ചെയ്തു. ഇയാൾ സുരക്ഷാ വലയം ഭേദിച്ച് അതിക്രമിച്ചു കയറാൻ ശ്രമിക്കുന്നതിനിടെയാണ് വെടിയൊച്ചകൾ കേട്ടത്. പ്രതിയെ ഉടൻ തന്നെ കസ്റ്റഡിയിലെടുത്തതായി അധികൃതർ സ്ഥിരീകരിച്ചു. ആക്രമണത്തിനിടെ ഒരു സുരക്ഷാ ഉദ്യോഗസ്ഥന് പരിക്കേറ്റെങ്കിലും പ്രസിഡന്റും മറ്റ് അതിഥികളും പരിക്കേൽക്കാതെ രക്ഷപ്പെട്ടു.
 

രാഷ്ട്രീയ അതിക്രമങ്ങൾക്കെതിരെ ലോകമെമ്പാടുമുള്ള നേതാക്കൾ കടുത്ത പ്രതിഷേധവുമായി രംഗത്തെത്തി. ഭയാനകമായ ഈ വധശ്രമ വാർത്തയിൽ താൻ ഞെട്ടിപ്പോയെന്നും ജനാധിപത്യത്തിൽ അക്രമത്തിന് സ്ഥാനമില്ലെന്നും ഇന്ത്യൻ പ്രധാനമന്ത്രി നരേന്ദ്ര മോദി പ്രതികരിച്ചു. ട്രംപും കുടുംബവും സുരക്ഷിതരാണെന്നറിഞ്ഞതിൽ വലിയ ആശ്വാസമുണ്ടെന്നും അദ്ദേഹം കൂട്ടിച്ചേർത്തു. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു, ജപ്പാൻ പ്രധാനമന്ത്രി സനാലെ തകൈച്ചി, ഇറ്റാലിയൻ പ്രധാനമന്ത്രി ജോർജിയ മെലോണി എന്നിവരും സംഭവത്തെ ശക്തമായി അപലപിച്ചു. രാഷ്ട്രീയ വിദ്വേഷം ജനാധിപത്യ രാജ്യങ്ങളിൽ ഇത്തരത്തിൽ പ്രതിഫലിക്കുന്നത് അങ്ങേയറ്റം ആശങ്കാജനകമാണെന്ന് യൂറോപ്യൻ യൂണിയൻ പ്രതിനിധികളും വ്യക്തമാക്കി. സമാധാനവും ജനാധിപത്യപരമായ സംവാദങ്ങളും നിലനിൽക്കേണ്ട ഇടങ്ങൾ അക്രമം വഴി മലിനമാക്കാൻ അനുവദിക്കില്ലെന്ന് ആഗോള നേതാക്കൾ ഒറ്റക്കെട്ടായി പറഞ്ഞു. പരിക്കേറ്റ സുരക്ഷാ ഉദ്യോഗസ്ഥൻ വേഗത്തിൽ സുഖം പ്രാപിക്കട്ടെയെന്നും സീക്രട്ട് സർവീസിന്റെ സമയോചിതമായ ഇടപെടൽ വലിയൊരു ദുരന്തം ഒഴിവാക്കിയെന്നും വിവിധ രാഷ്ട്രത്തലവന്മാർ എക്സിലൂടെ പങ്കുവെച്ച സന്ദേശങ്ങളിൽ കുറിച്ചു.