തൃശൂർ പൂരത്തിന്റെ ഔദ്യോഗിക തുടക്കം കുറിച്ച് കൊണ്ട് ഇന്ന് പൂരം വിളംബരം നടക്കും. എറണാകുളം ശിവകുമാർ എന്ന കൊമ്പന്റെ പുറത്തേറി നെയ്തലക്കാവിലമ്മ വടക്കുംനാഥ ക്ഷേത്രത്തിലേക്ക് എഴുന്നള്ളുന്നതോടെയാണ് ഇത്തവണത്തെ ആഘോഷങ്ങൾക്ക് തുടക്കമാകുന്നത്. രാവിലെ 8.30-ന് പുറപ്പെടുന്ന തിടമ്പേറ്റിയുള്ള എഴുന്നള്ളിപ്പ് 11 മണിയോടെ വടക്കുംനാഥ സന്നിധിയിലെത്തും. 11.30-ന് തെക്കേഗോപുര നട തുറന്ന് ശ്രീമൂലസ്ഥാനത്തിന് സമീപമുള്ള നിലപാട് തറയിലെത്തി വിളംബരം നടത്തുന്നതോടെ പൂരത്തിന്റെ ആദ്യ ഘടകപൂരത്തിന് തുടക്കമാകും.

​നാദസ്വരത്തിന്റെ അകമ്പടിയോടെയുള്ള ഭഗവതിയുടെ വരവിനെ ഭക്തർ വീടുകൾക്ക് മുന്നിൽ പറ സമർപ്പിച്ച് ഭക്തിപൂർവ്വം വരവേൽക്കും. കിഴക്കൂട്ട് അനിയൻ മാരാരുടെ നേതൃത്വത്തിൽ നടക്കുന്ന പാണ്ടിമേളത്തിന് ശേഷം ഭഗവതി വടക്കുംനാഥനെ വലം വെക്കും. പൂരദിനത്തിൽ കണിമംഗലം ശാസ്താവിന് പ്രവേശിക്കാൻ തെക്കേഗോപുര വാതിൽ തുറന്നിടുന്ന പ്രൗഢമായ കാഴ്ചയ്ക്ക് ഇത്തവണയും സാക്ഷിയാകും. ശേഷം നിലപാട് തറയിൽ വിളംബരം നടത്തി ഭഗവതി തട്ടകത്തിലേക്ക് മടങ്ങും.

​അതേസമയം, മുണ്ടത്തിക്കോട് വെടിപ്പുര ദുരന്തത്തിന്റെ പശ്ചാത്തലത്തിൽ അതീവ ലളിതമായാണ് ഇത്തവണത്തെ പൂരച്ചടങ്ങുകൾ. വെടിക്കെട്ട് പൂർണ്ണമായും ഒഴിവാക്കി. ആഘോഷങ്ങൾക്കും കടുത്ത നിയന്ത്രണമേർപ്പെടുത്തിയിട്ടുണ്ട്. ഒരു മണിക്കൂർ നീളുന്ന കുടമാറ്റം 15 മിനിറ്റായി ചുരുക്കി, പരമാവധി 10 സെറ്റ് കുടകൾ മാത്രമേ മാറ്റാൻ അനുവദിക്കൂ. എന്നാൽ, മഠത്തിൽ വരവ് പഞ്ചവാദ്യവും ഇലഞ്ഞിത്തറ മേളവും തിരുവമ്പാടി-പാറമേക്കാവ് വിഭാഗങ്ങളുടെ മേളവും സമയപരിധികളില്ലാതെ അതേ പ്രൗഢിയോടെ തന്നെ നടക്കുമെന്ന് സംഘാടകർ അറിയിച്ചു.