സൗത്ത് കരോലിന: അമേരിക്കയിലെ സൗത്ത് കരോലിനയില്‍ മദ്യപിച്ച് വാഹനമോടിച്ച് രണ്ട് ആണ്‍കുട്ടികളെ ഇടിച്ചു കൊലപ്പെടുത്തിയ കേസില്‍ പ്രതിയായ മെക്‌സിക്കന്‍ സ്വദേശിയുടെ ജാമ്യാപേക്ഷ കോടതി നിഷേധിച്ചു. നിയമവിരുദ്ധമായി രാജ്യത്ത് പ്രവേശിച്ച എറി ഒട്ടോണിയല്‍ റോബ്ലെറോ പെരസ് എന്നയാള്‍ക്കെതിരെയാണ് കോടതി നടപടി.കേസിന്റെ അടുത്ത വാദം ജൂണ്‍ 18-ന് നടക്കും

ഏപ്രില്‍ 12-ന് സൗത്ത് കരോലിനയിലെ ഒരു നടപ്പാതയിലൂടെ സൈക്കിള്‍ ചവിട്ടുകയായിരുന്ന 12-ഉം 9-ഉം വയസ്സുള്ള രണ്ട് ആണ്‍കുട്ടികളെ പെരസ് ഓടിച്ച കാര്‍ നിയന്ത്രണം വിട്ട് ഇടിച്ചു തെറിപ്പിക്കുകയായിരുന്നു. കുട്ടികള്‍ രണ്ടുപേരും ആശുപത്രിയില്‍ വെച്ച് മരണപ്പെട്ടു.

പെരസ് കടുത്ത മദ്യലഹരിയിലായിരുന്നുവെന്നും സംസാരിക്കാന്‍ പോലും കഴിയാത്ത അവസ്ഥയിലായിരുന്നുവെന്നും പോലീസ് റിപ്പോര്‍ട്ട് ചെയ്തു. ലൈസന്‍സില്ലാതെ വാഹനമോടിച്ചതിനും ഇയാള്‍ക്കെതിരെ കേസുണ്ട്.

പ്രതി ഒരു യു.എസ് പൗരനല്ലാത്തതിനാല്‍ രാജ്യം വിട്ടുപോകാന്‍ സാധ്യതയുണ്ടെന്നും സമൂഹത്തിന് ഭീഷണിയാണെന്നും വിലയിരുത്തിയാണ് ജഡ്ജി ജാമ്യം നിഷേധിച്ചത്. ഓരോ കുറ്റത്തിനും 25 വര്‍ഷം വരെ തടവുശിക്ഷ ലഭിക്കാവുന്ന വകുപ്പുകളാണ് ഇയാള്‍ക്കെതിരെ ചുമത്തിയിരിക്കുന്നത്.

പ്രതി അനധികൃതമായാണ് അമേരിക്കയില്‍ എത്തിയതെന്ന് ഹോംലാന്‍ഡ് സെക്യൂരിറ്റി വിഭാഗം സ്ഥിരീകരിച്ചു. ഇയാള്‍ക്കെതിരെ ഐ.സി.ഇ (ICE) നടപടികള്‍ ആരംഭിച്ചിട്ടുണ്ട്.

മരിച്ച കുട്ടികളിലൊരാളുടെ അമ്മയുടെ സാന്നിധ്യത്തിലായിരുന്നു അപകടം നടന്നത്. ഇതേ വാഹനത്തിലുണ്ടായിരുന്ന രണ്ടാമത്തെയാള്‍ അപകടസ്ഥലത്ത് നിന്നും ഓടി രക്ഷപ്പെട്ടു, ഇയാള്‍ക്കായി തിരച്ചില്‍ തുടരുകയാണ്.