തൃശൂർ കോടാലിയിൽ എട്ടു വയസ്സുകാരൻ പാമ്പുകടിയേറ്റ് മരിച്ചതിന്റെ നൊമ്പരം വിട്ടുമാറും മുൻപേ സംസ്ഥാനത്ത് മറ്റൊരു പാമ്പുകടി മരണം കൂടി. തിരുവനന്തപുരം കിളിമാനൂരിൽ വീട്ടുജോലികൾക്കിടെ പാമ്പുകടിയേറ്റ വീട്ടമ്മ മരണപ്പെട്ടു. കിളിമാനൂർ സ്വദേശി സുധർമ്മ (75) ആണ് മരണപ്പെട്ടത്.

​ഇന്ന് രാവിലെ 6.45-ഓടെയായിരുന്നു ദാരുണമായ സംഭവം നടന്നത്. വീടിനോട് ചേർന്നുള്ള കിണറിന് സമീപം വീട്ടുജോലികൾ ചെയ്യുന്നതിനിടെയാണ് സുധർമ്മയ്ക്ക് പാമ്പുകടിയേറ്റത്. വീട്ടിൽ മകൻ മാത്രമാണ് അപ്പോൾ ഉണ്ടായിരുന്നത്. പാമ്പുകടിയേറ്റ വിവരം സുധർമ്മ ഉടൻ തന്നെ മകനെ അറിയിച്ചതിനെത്തുടർന്ന്, ബന്ധുക്കൾ ചേർന്ന് അവരെ തൊട്ടടുത്തുള്ള ആശുപത്രിയിൽ എത്തിക്കുകയായിരുന്നു.

​തുടർന്ന് വിദഗ്ധ ചികിത്സയ്ക്കായി സുധർമ്മയെ തിരുവനന്തപുരം മെഡിക്കൽ കോളേജ് ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തിച്ച് പ്രാഥമിക ചികിത്സ നൽകിയെങ്കിലും ആരോഗ്യനില വഷളാവുകയായിരുന്നു. ഏത് ഇനം പാമ്പാണ് കടിച്ചതെന്ന് ഇതുവരെ സ്ഥിരീകരിക്കാനായിട്ടില്ല.