വാൽപ്പാറയിലെ ദാരുണമായ വാഹനാപകടത്തിൽ പൊലിഞ്ഞ ഒൻപത് ജീവനുകൾക്ക് പാങ്ങ് നാട് കണ്ണീരോടെ വിടചൊല്ലി. പൊള്ളാച്ചി സർക്കാർ ആശുപത്രിയിൽ പോസ്റ്റ്‌മോർട്ടം നടപടികൾ പൂർത്തിയാക്കിയ ശേഷം മൃതദേഹങ്ങൾ രാവിലെ ഒൻപത് മണിയോടെ പാങ്ങ് അമ്പലപ്പറമ്പ് ഹയർ സെക്കൻഡറി സ്കൂളിൽ പൊതുദർശനത്തിന് വെച്ചു. തങ്ങളുടെ പ്രിയപ്പെട്ടവരെ അവസാനമായി ഒരുനോക്ക് കാണാൻ സമൂഹത്തിന്റെ നാനാതുറകളിലുള്ള ആയിരക്കണക്കിന് ആളുകളാണ് സ്കൂൾ അങ്കണത്തിൽ തടിച്ചുകൂടിയത്.

​വിദ്യാഭ്യാസ മന്ത്രി വി. ശിവൻകുട്ടി പൊതുദർശന വേദിയിലെത്തി അന്തിമോപചാരം അർപ്പിച്ചു. ഇവരെ കൂടാതെ കെ.ടി. ജലീൽ, പി.കെ. കുഞ്ഞാലിക്കുട്ടി, മഞ്ഞളാംകുഴി അലി, പാണക്കാട് സാദിഖലി ശിഹാബ് തങ്ങൾ തുടങ്ങി രാഷ്ട്രീയ സാമൂഹിക രംഗത്തെ നിരവധി പ്രമുഖർ ദുഃഖത്തിൽ പങ്കുചേരാൻ എത്തിയിരുന്നു. ഒരു മണിക്കൂർ നീണ്ട പൊതുദർശനത്തിന് ശേഷമാണ് ഔദ്യോഗിക ബഹുമതികളോടെ സംസ്കാര ചടങ്ങുകൾ ആരംഭിച്ചത്.

​പാങ്ങ് ജി.എൽ.പി സ്കൂളിലെ വിനോദയാത്ര സംഘം സഞ്ചരിച്ച വാഹനം ഇന്നലെ വൈകിട്ട് 5.20-ഓടെയാണ് വാൽപ്പാറ ചുരം റോഡിലെ പതിമൂന്നാം ഹെയർപിൻ വളവിൽ നിന്ന് 300 അടി താഴ്ചയിലേക്ക് മറിഞ്ഞത്. കാഴ്ചകൾ കണ്ട് മടങ്ങുന്നതിനിടെ നിയന്ത്രണം വിട്ട വാഹനം പലതവണ കീഴ്മേൽ മറിഞ്ഞ് ഒൻപതാം വളവിലേക്ക് പതിക്കുകയായിരുന്നു. പെരിന്തൽമണ്ണയിൽ നിന്ന് വാടകയ്ക്കെടുത്ത ടൂറിസ്റ്റ് വാനിൽ ഡ്രൈവർ ഉൾപ്പെടെ 13 പേരാണ് യാത്രയിലുണ്ടായിരുന്നത്. മരിച്ചവരിൽ ഏഴ് സ്ത്രീകളും ഒരു കുട്ടിയും ഉൾപ്പെടുന്നു.

​അപകടത്തിൽ പരിക്കേറ്റ ടൂറിസ്റ്റ് വാൻ ഡ്രൈവർ മുഹമ്മദ് ഫാഹിസ് (21), അധ്യാപിക ഷക്കീന (37), പാചകത്തൊഴിലാളിയായ സാജിതയുടെ മകൻ ഷഹദീൻ എന്നിവർ ഗുരുതരാവസ്ഥയിൽ കോയമ്പത്തൂർ മെഡിക്കൽ കോളേജ് ആശുപത്രിയിൽ ചികിത്സയിലാണ്. ഇവർക്കൊപ്പം പരിക്കേറ്റ മസ്‌നീൻ (10) പൊള്ളാച്ചി ആശുപത്രിയിൽ നിരീക്ഷണത്തിലാണ്. നാടിനെയാകെ കണ്ണീരിലാഴ്ത്തിയ വലിയൊരു ദുരന്തത്തിന്റെ ആഘാതത്തിലാണ് പാങ്ങ് നിവാസികൾ ഇപ്പോൾ.