പാലക്കാട് നിയമസഭാ തെരഞ്ഞെടുപ്പിന് തലേന്ന് വോട്ടര്‍ക്ക് പണം നല്‍കിയെന്ന ആരോപണത്തില്‍ ജില്ലാ തെരഞ്ഞെടുപ്പ് ഉദ്യോഗസ്ഥ കൂടിയായ കളക്ടർ അന്വേഷണം ശക്തമാക്കി. ആരോപണവിധേയരായ സ്ഥാനാര്‍ഥികളുള്‍പ്പെടെയുള്ളവരുടെ മൊഴിയാണ് കളക്ടറുടെ നേതൃത്വത്തില്‍ നേരിട്ട് രേഖപ്പെടുത്തിയത്. ബിജെപി സ്ഥാനാര്‍ഥി ശോഭാ സുരേന്ദ്രന്‍, എല്‍ഡിഎഫ് സ്ഥാനാര്‍ഥി എന്‍.എം.ആര്‍. റസാക്ക് എന്നിവരടക്കമുള്ളവര്‍ മൊഴി നല്‍കാനായി ഹാജരായവരില്‍പ്പെടുന്നു.

​തെരഞ്ഞെടുപ്പ് പെരുമാറ്റച്ചട്ട ലംഘനം നടന്നുവെന്നാരോപിച്ച് യുഡിഎഫ് സ്ഥാനാര്‍ഥി രമേഷ് പിഷാരടിയുടെ മുഖ്യ തെരഞ്ഞെടുപ്പ് ഏജന്റ് സി. ബാലന്‍, സ്വതന്ത്ര സ്ഥാനാര്‍ഥി എന്‍.എം.ആര്‍. റസാക്ക് എന്നിവരാണ് പരാതിയുമായി മുന്നോട്ടുവന്നത്. ഇവരെക്കൂടാതെ പാലക്കാട് നഗരസഭാ മുന്‍ അധ്യക്ഷ പ്രമീളാ ശശിധരന്‍, കോണ്‍ഗ്രസ് മണ്ഡലം കമ്മിറ്റി കണ്‍വീനര്‍ എന്‍. വിനേഷ്, മറ്റ് പ്രാദേശിക നേതാക്കള്‍, മാധ്യമപ്രവര്‍ത്തകര്‍ എന്നിവരുടെയും മൊഴികള്‍ അന്വേഷണ സംഘം രേഖപ്പെടുത്തിയിട്ടുണ്ട്.

​അതേസമയം, സംഭവത്തില്‍ പണം കൈപ്പറ്റിയതായി പരാതിയില്‍ പറയുന്ന കണ്ണാടി തരുവക്കുറുശ്ശി പടിഞ്ഞാമുറി നാകുണ്ണിനിവാസില്‍ ദേവു, മകന്‍ പ്രകാശന്‍ എന്നിവര്‍ മൊഴിനല്‍കാന്‍ ഹാജരായില്ല. തെരഞ്ഞെടുപ്പ് കോഴയെച്ചൊല്ലിയുള്ള വിവാദത്തില്‍ നിര്‍ണായകമായേക്കാവുന്ന ഈ സാക്ഷികളുടെ അസാന്നിധ്യം കേസില്‍ തുടര്‍നടപടികള്‍ക്ക് വെല്ലുവിളിയാകുമോ എന്ന ആശങ്കയുണ്ട്.

​നേരത്തെ ഈ വിഷയത്തില്‍ കളക്ടർ പ്രാഥമിക റിപ്പോര്‍ട്ട് സമര്‍പ്പിച്ചിരുന്നു. ഇതിന്റെ അടിസ്ഥാനത്തില്‍ മുഖ്യ തെരഞ്ഞെടുപ്പ് കമ്മീഷന്‍ ആവശ്യപ്പെട്ടത് പ്രകാരമാണ് ഇപ്പോള്‍ വിശദമായ അന്വേഷണം നടക്കുന്നത്. മൊഴികളെല്ലാം പരിശോധിച്ച ശേഷം തയ്യാറാക്കുന്ന വിശദമായ റിപ്പോര്‍ട്ട് ഒരാഴ്ചയ്ക്കകം മുഖ്യ തെരഞ്ഞെടുപ്പ് കമ്മീഷണര്‍ക്ക് കൈമാറാനാണ് ജില്ലാ കളക്ടറുടെ തീരുമാനം.