​ന്യൂഡൽഹി: രാജ്യത്തിന്റെ നിയമനിർമ്മാണ സഭകളിൽ വനിതകൾക്ക് മൂന്നിലൊന്ന് സംവരണം ഉറപ്പാക്കുന്ന ചരിത്രപരമായ ബില്ലുകൾ ചർച്ച ചെയ്യുന്നതിനായി പാർലമെന്റിന്റെ പ്രത്യേക സമ്മേളനം നാളെ ആരംഭിക്കും. 2029-ലെ പൊതുതിരഞ്ഞെടുപ്പ് ലക്ഷ്യമിട്ട് കേന്ദ്രസർക്കാർ അവതരിപ്പിക്കുന്ന ഈ ഭേദഗതി ബിൽ ഇന്ത്യൻ രാഷ്ട്രീയത്തിൽ വലിയ മാറ്റങ്ങൾക്ക് വഴിതുറക്കും. ലോക്‌സഭയിലും വിവിധ സംസ്ഥാന നിയമസഭകളിലും 33 ശതമാനം സീറ്റുകൾ സ്ത്രീകൾക്കായി മാറ്റിവെക്കുന്നതാണ് നിർദ്ദിഷ്ട നിയമം.

​പുതിയ ഭേദഗതി പ്രകാരം ലോക്‌സഭയിലെ ആകെ അംഗബലം 850 ആയി ഉയർത്താനാണ് കേന്ദ്ര നീക്കം. ഇതിൽ വനിതാ പ്രാതിനിധ്യം 284 സീറ്റുകൾ വരെയായി വർധിക്കും. പട്ടികജാതി-പട്ടികവർഗ വിഭാഗങ്ങളിൽ നിന്നുള്ള വനിതകൾക്കും ഇതിൽ അർഹമായ പ്രാതിനിധ്യം ഉറപ്പാക്കിയിട്ടുണ്ട്. 15 വർഷത്തേക്കാണ് പ്രാഥമികമായി സംവരണം ഏർപ്പെടുത്തുന്നത്. ഓരോ തിരഞ്ഞെടുപ്പിലും റൊട്ടേഷൻ വ്യവസ്ഥയിലായിരിക്കും വനിതാ സംവരണ മണ്ഡലങ്ങൾ നിശ്ചയിക്കുക.

​ബില്ലിന്മേൽ ലോക്‌സഭയിൽ 18 മണിക്കൂറും രാജ്യസഭയിൽ 16 മണിക്കൂറുമാണ് ചർച്ച നിശ്ചയിച്ചിരിക്കുന്നത്. ചർച്ചയുടെ ആദ്യ ദിനമായ നാളെ പ്രധാനമന്ത്രി നരേന്ദ്ര മോദി സഭയെ അഭിസംബോധന ചെയ്യും. ഈ മാസം 18 വരെ നീണ്ടുനിൽക്കുന്ന സമ്മേളനത്തിൽ വനിതാ സംവരണവുമായി ബന്ധപ്പെട്ട് മൂന്ന് പ്രധാന ഭേദഗതി ബില്ലുകളാണ് സർക്കാർ അവതരിപ്പിക്കുന്നത്. പ്രതിപക്ഷം ബില്ലിനോട് എന്ത് നിലപാട് സ്വീകരിക്കും എന്നത് രാഷ്ട്രീയ കേന്ദ്രങ്ങൾ ഉറ്റുനോക്കുന്നു.

​131-ാം ഭരണഘടനാ ഭേദഗതി ബിൽ, ഡിലിമിറ്റേഷൻ ബിൽ, കേന്ദ്രഭരണ പ്രദേശ ഭേദഗതി ബിൽ എന്നിവയാണ് സമ്മേളനത്തിന്റെ മുഖ്യ അജണ്ട. 2011-ലെ സെൻസസിന്റെ അടിസ്ഥാനത്തിൽ മണ്ഡലങ്ങൾ പുനഃക്രമീകരിക്കാനാണ് (ഡിലിമിറ്റേഷൻ) നീക്കം. ജനസംഖ്യാനുപാതികമായി മണ്ഡലങ്ങളുടെ എണ്ണം വർധിപ്പിക്കുന്നതോടെ ഓരോ സംസ്ഥാനത്തെയും വനിതാ സീറ്റുകളുടെ കാര്യത്തിലും കൃത്യമായ ധാരണയാകും. സംസ്ഥാനങ്ങളിലെ പട്ടിക വിഭാഗ സംവരണവും ഇതോടൊപ്പം റൊട്ടേഷൻ അടിസ്ഥാനത്തിൽ പുനർനിർണ്ണയിക്കും.