ബെയ്ജിംഗ്:  ഇറാനുമായി ബന്ധപ്പെട്ട കപ്പലുകൾക്കെതിരെ ഹോർമുസ് കടലിടുക്കിൽ സ്വീകരിച്ച സമുദ്ര ഉപരോധ നടപടികൾ പശ്ചിമേഷ്യയിലെ ഇതിനകം തന്നെ ദുർബലമായ സാഹചര്യം കൂടുതൽ വഷളാക്കുമെന്നു ചൈന മുന്നറിയിപ്പ് നൽകി.
 

ചൈനീസ് വിദേശകാര്യ മന്ത്രാലയ വക്താവ് ഗുവോ ജിയാകുൻ പ്രസ്താവിച്ചതനുസരിച്ച്, അമേരിക്കയുടെ  സൈനിക നടപടികളും കപ്പൽ ഗതാഗത ഉപരോധവും സംഘർഷം കുറയ്ക്കുന്നതിനുപകരം കൂടുതൽ കടുപ്പിക്കുമെന്നും നിലവിലുള്ള വെടിനിർത്തൽ കരാറിനെ ദുർബലപ്പെടുത്തുമെന്നും ചൂണ്ടിക്കാട്ടി.

അതേസമയം പശ്ചിമേഷ്യയിൽ സമാധാനവും സ്ഥിരതയും ഉറപ്പാക്കുന്നതിനായി നാല് കാര്യങ്ങളടങ്ങിയ സമാധാന നിർദ്ദേശം ചൈനീസ് പ്രസിഡന്റ് ജിൻപിങ് മുന്നോട്ടുവച്ചു.
ഈ നിർദ്ദേശങ്ങളിൽ സമാധാനപരമായ സഹവർത്തിത്വം, ദേശീയ പരമാധികാരം, അന്താരാഷ്ട്ര നിയമങ്ങളുടെ പാലനം, വികസനവും സുരക്ഷയും ഏകോപിപ്പിക്കൽ എന്നിവ ഉൾപ്പെടുന്നു. ഈ നിർദ്ദേശം അബുദാബി കിരീടാവകാശി ഷെയ്ഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാനുമായി ബെയ്ജിംഗിൽ നടത്തിയ കൂടിക്കാഴ്ചയിൽ അദ്ദേഹം അവതരിപ്പിച്ചു.

 അമേരിക്കൻ ഉപരോധത്തിനിടയിലും ഇറാനുമായി ബന്ധമുണ്ടെന്ന് ആരോപിക്കപ്പെടുന്ന ചൈനീസ് ഉടമസ്ഥതയിലുള്ള റിച്ച് സ്റ്റാറി എന്ന എണ്ണക്കപ്പൽ ഹോർമുസ് കടലിടുക്ക് വിജയകരമായി കടന്നുപോയതായി റിപ്പോർട്ടുകൾ പറയുന്നു. 2023 മുതൽ അമേരിക്കയുടെ ഉപരോധ പട്ടികയിൽ ഉൾപ്പെട്ടിരിക്കുന്ന ഈ കപ്പൽ മുമ്പ് ഹോങ്കോംഗ് പതാകയിൽ പ്രവർത്തിച്ചിരുന്നതാണ്.

അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാൻ തുറമുഖങ്ങൾക്ക് നേരെ നാവിക ഉപരോധം ഏർപ്പെടുത്തിയതിനെ തുടർന്ന്, പശ്ചിമേഷ്യൻ മേഖലയിൽ അമേരിക്കൻ നാവികസേനയുടെ ശക്തമായ സാന്നിധ്യം തുടരുന്നതായും റിപ്പോർട്ടുകളുണ്ട്. ഈ സാന്നിധ്യത്തിൽ യുഎസ്എസ് എബ്രഹാം ലിങ്കൺ ഉൾപ്പെടെ കുറഞ്ഞത് 15 യുദ്ധക്കപ്പലുകൾ വിന്യസിച്ചിരിക്കുന്നതായാണ് വിവരം.

പാകിസ്താനിൽ നടന്ന നീണ്ടുനിന്ന ചർച്ചകൾക്ക് ശേഷവും ധാരണയിലേക്കെത്താനാകാത്ത സാഹചര്യത്തിലാണ് അമേരിക്ക ഉപരോധ നടപടികൾ ശക്തമാക്കിയതെന്നാണ് വിലയിരുത്തൽ.