വാഷിംഗ്ടൺ/ടെഹ്റാൻ: ഇറാന്റെ ആണവപ്രവർത്തനങ്ങൾ താൽക്കാലികമായി നിർത്തിവെക്കുന്നതിനുള്ള വിഷയത്തിൽ അമേരിക്കയും ഇറാനും തമ്മിൽ പാകിസ്ഥാനിൽ നടന്ന വാരാന്ത്യ ചർച്ചകളിൽ നിർദേശങ്ങൾ കൈമാറിയെങ്കിലും കരാറിന്റെ കാലാവധിയിൽ  വലിയ ഭിന്നത തുടരുന്നതായി ഇരുരാജ്യങ്ങളിലെയും ഉദ്യോഗസ്ഥർ അറിയിച്ചു.
 

യുറേനിയം സമ്പുഷ്ടീകരണം പരമാവധി അഞ്ച് വർഷത്തേക്ക് നിർത്തിവെക്കാമെന്നാണ് ഇറാൻ മുന്നോട്ടുവച്ച നിർദേശം. എന്നാൽ 20 വർഷത്തെ നിർത്തിവെക്കലാണ് അമേരിക്ക ആവശ്യപ്പെട്ടതെന്ന് ഇറാനും അമേരിക്കയും നിന്നുള്ള ഉദ്യോഗസ്ഥർ വ്യക്തമാക്കി. എന്നിരുന്നാലും സമാധാനകരാറിലേക്കുള്ള വഴികൾ ഇപ്പോഴും തുറന്നുകിടക്കുന്നതായി ചർച്ചകൾ സൂചിപ്പിക്കുന്നു.

ഇതിനിടെ, ചർച്ചകൾ പുരോഗമിക്കുമ്പോൾ തന്നെ ഇറാനിലെ തുറമുഖങ്ങളെ ലക്ഷ്യമിട്ട് അമേരിക്ക നാവിക ഉപരോധം ആരംഭിച്ചു. ഇതോടെ ഏകദേശം ഒരാഴ്ചയായി നിലനിൽക്കുന്ന വെടിനിർത്തൽ ധാരണയ്ക്ക് ഭീഷണിയുണ്ടായി.

ഉന്നതതല ചർച്ചകൾ വാരാന്ത്യത്തിൽ പരാജയപ്പെട്ടതിനെ തുടർന്ന് പ്രസിഡന്റ് ഡോണാൾഡ് ട്രംപ് ഉപരോധം പ്രഖ്യാപിച്ചിരുന്നു. മറ്റ് രാജ്യങ്ങളും ഉപരോധത്തിൽ പങ്കെടുക്കുമെന്ന് അദ്ദേഹം പറഞ്ഞെങ്കിലും നിരവധി യൂറോപ്യൻ നേതാക്കൾ ഈ നീക്കത്തെ പിന്തുണയ്ക്കുന്നില്ല. അതേസമയം ഇറാനുമായി ബന്ധമുള്ള ഒരു എണ്ണക്കപ്പൽ ഉപരോധം അവഗണിച്ചതായും റിപ്പോർട്ടുണ്ട്.

ഉപരോധം പ്രാബല്യത്തിൽ വന്നതിന് പിന്നാലെ ഇറാൻ ശക്തമായ തിരിച്ചടി മുന്നറിയിപ്പ് നൽകി. ഇറാന്റെ റെവല്യൂഷണറി ഗാർഡ്സ് പുതിയ യുദ്ധരീതികൾ അവതരിപ്പിക്കുമെന്നാണ് മുന്നറിയിപ്പ് നൽകിയിരിക്കുന്നത്. ഇറാന്റെ തുറമുഖങ്ങൾക്കെതിരെ ഭീഷണി തുടരുകയാണെങ്കിൽ  ഗൾഫിലും ഒമാൻ കടലിലും ഉള്ള ഒരു തുറമുഖവും സുരക്ഷിതമാകില്ലെന്നും സൈനിക വക്താവ് ഇബ്രാഹിം സോൾഫഗാരി പറഞ്ഞു.

ഇറാന്റെ എണ്ണ കയറ്റുമതിയിൽ നിന്ന് ലഭിക്കുന്ന വരുമാനം തടയുകയും അമേരിക്ക മുന്നോട്ടുവച്ച വ്യവസ്ഥകൾ അംഗീകരിക്കാൻ സമ്മർദം ചെലുത്തുകയും ചെയ്യുന്നതാണ് ഉപരോധത്തിന്റെ പ്രധാന ലക്ഷ്യമെന്ന് അമേരിക്കൻ സൈന്യം വ്യക്തമാക്കി. ഇറാനിലെ തുറമുഖങ്ങളിലേക്കോ അവിടെ നിന്ന് പുറപ്പെടുന്ന കപ്പലുകളെയോ തടയുന്നതിനാണ് നിയന്ത്രണം ബാധകമാകുക. എന്നാൽ ഹോർമുസ് കടലിടുക്കിലൂടെ മറ്റ് രാജ്യങ്ങളിലേക്കുള്ള സാധാരണ ഗതാഗതത്തിന് ഇപ്പോഴും അനുമതിയുണ്ടെന്ന് അറിയിച്ചു.

യുദ്ധം ഫെബ്രുവരി അവസാനം ആരംഭിച്ചതിന് പിന്നാലെ ആഗോള എണ്ണവിലയിൽ വലിയ വർധനയുണ്ടായി. ചില ഘട്ടങ്ങളിൽ 50 ശതമാനത്തിലധികം വർധിച്ച എണ്ണവില, തിങ്കളാഴ്ച ബ്രെന്റ് ക്രൂഡ് ബാരലിന് 102 ഡോളർ വരെ ഉയർന്ന് പിന്നീട് ഏകദേശം 99 ഡോളറായി കുറഞ്ഞു.