തിരുവനന്തപുരം: കേരളത്തിൽ എൽഡിഎഫ് വൻ ഭൂരിപക്ഷത്തോടെ അധികാരം നിലനിർത്തുമെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ. നിയമസഭാ തെരഞ്ഞെടുപ്പിൽ തൊണ്ണൂറിലധികം സീറ്റുകൾ നേടി ഇടതുപക്ഷം ചരിത്രപരമായ തുടർച്ച കൈവരിക്കുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. സിപിഎം സംസ്ഥാന സെക്രട്ടേറിയേറ്റിന് ശേഷം നടത്തിയ വാർത്താസമ്മേളനത്തിലാണ് 2016-ലെയും 2021-ലെയും വിജയം ഇത്തവണയും ആവർത്തിക്കുമെന്ന് അദ്ദേഹം വ്യക്തമാക്കിയത്.

​വോട്ടിങ് ശതമാനം വർധിച്ചതിനാൽ യുഡിഎഫ് അധികാരത്തിൽ വരുമെന്ന പ്രചാരണം അടിസ്ഥാനരഹിതമാണെന്ന് എം വി ഗോവിന്ദൻ പറഞ്ഞു. വോട്ടർമാരുടെ എണ്ണത്തിൽ ഉണ്ടായ കുറവാണ് വോട്ടിങ് ശതമാനം ഉയരാൻ കാരണമായത്. സ്പെഷ്യൽ ഇന്റൻസീവ് റിവിഷൻ (SIR) വഴി ഇരട്ട വോട്ടുകളും അനർഹമായ വോട്ടുകളും നീക്കം ചെയ്തതോടെ സംസ്ഥാനത്തെ വോട്ടർമാരുടെ എണ്ണം 2.71 കോടിയായി ചുരുങ്ങി. 2021-നെ അപേക്ഷിച്ച് 94 മണ്ഡലങ്ങളിൽ വോട്ടർമാരുടെ എണ്ണം കുറഞ്ഞുവെന്നും എന്നാൽ പോളിങ് മികച്ച നിലയിലാണെന്നും അദ്ദേഹം ചൂണ്ടിക്കാട്ടി. 78.27 ശതമാനം പോളിങ് നടന്നത് ഇടതുപക്ഷത്തിന് അനുകൂലമായ തരംഗമാണെന്നും അദ്ദേഹം കൂട്ടിച്ചേർത്തു.

​തെരഞ്ഞെടുപ്പിൽ ബിജെപിയും യുഡിഎഫും പണമൊഴുക്കി വോട്ടർമാരെ സ്വാധീനിക്കാൻ ശ്രമിച്ചുവെന്നും അദ്ദേഹം ആരോപിച്ചു. ഉത്തരേന്ത്യൻ സംസ്ഥാനങ്ങളിൽ കണ്ടുവരുന്ന തരത്തിലുള്ള ജനാധിപത്യവിരുദ്ധമായ പ്രവർത്തനങ്ങളാണ് കേരളത്തിലും ഇവർ പയറ്റിയത്. എന്നാൽ ഇത്തരം സ്വാധീനങ്ങളെ മറികടന്ന് എൽഡിഎഫ് പ്രവർത്തകർ ആത്മാർഥമായി രംഗത്തിറങ്ങിയിട്ടുണ്ടെന്നും ഇതിന്റെ പ്രതിഫലനം വോട്ടെണ്ണുമ്പോൾ കാണാനാവുമെന്നും അദ്ദേഹം പറഞ്ഞു. രാഷ്ട്രീയമായ പോരാട്ടത്തിൽ ജനങ്ങൾ വികസനത്തിനും ക്ഷേമത്തിനുമൊപ്പം നിൽക്കുമെന്നും അദ്ദേഹം പ്രത്യാശ പ്രകടിപ്പിച്ചു.