വാഷിംഗ്ടൺ: നാസയുടെ നോർത്രോപ്പ് ഗ്രമ്മൻ കൊമേഴ്ഷ്യൽ റീസപ്ലൈ സർവീസസ്-24 (സിആർഎസ്-24) ദൗത്യത്തിന്റെ ഭാഗമായി ശാസ്ത്രീയ പരീക്ഷണ സാമഗ്രികളും സാങ്കേതിക ഉപകരണങ്ങളും ബഹിരാകാശയാത്രികർക്കുള്ള ആവശ്യ സാധനങ്ങളുമായി സിഗ്നസ് എക്സ് എൽ കാർഗോ ബഹിരാകാശവാഹനം വിജയകരമായി വിക്ഷേപിച്ചു. ഫ്ലോറിഡയിലെ കേപ്പ് കാനവെറൽ സ്‌പേസ് ഫോഴ്‌സ് സ്റ്റേഷനിലെ സ്‌പേസ് ലോഞ്ച് കോംപ്ലക്സ്-40ൽ നിന്ന് സ്‌പേസ്‌എക്സിന്റെ ഫാൽക്കൺ 9 റോക്കറ്റിലൂടെയാണ് വിക്ഷേപണം നടന്നത്.
 

ഏകദേശം 11,000 പൗണ്ട് ഭാരമുള്ള ശാസ്ത്രീയ ഉപകരണങ്ങളും സാങ്കേതിക പരീക്ഷണങ്ങളും ഉൾപ്പെടുന്ന ചരക്കുകളാണ് സിഗ്നസ് എക്സ് എൽ  അന്താരാഷ്ട്ര ബഹിരാകാശ നിലയമായ ഇന്റർനാഷണൽ സ്‌പേസ് സ്റ്റേഷനിലേക്ക് എത്തിക്കുന്നത്. ഏപ്രിൽ 13-ന് ഉച്ചയ്ക്ക് ക്യാനഡാം2 റോബോട്ടിക് കൈ ഉപയോഗിച്ച് ബഹിരാകാശവാഹനം പിടിച്ചെടുത്ത് യൂണിറ്റി മോഡ്യൂളിന്റെ എർത്-ഫേസിങ് പോർട്ടിൽ ഘടിപ്പിച്ച് ചരക്കുകൾ ഇറക്കുമതി ചെയ്യുമെന്ന് നാസ അറിയിച്ചു. ഈ പ്രവർത്തനം നാസ ബഹിരാകാശയാത്രികരായ ജാക്ക് ഹാതവേയും ക്രിസ് വില്യംസും നിയന്ത്രിക്കും.

സിആർഎസ്-24 ദൗത്യത്തിലൂടെ ക്വാണ്ടം സയൻസ് മുന്നോട്ട് കൊണ്ടുപോകാൻ സഹായിക്കുന്ന പുതിയ മോഡ്യൂൾ ഉൾപ്പെടെ നിരവധി പരീക്ഷണ സാമഗ്രികൾ അയച്ചിട്ടുണ്ട്. ഇത് ഭാവിയിലെ കമ്പ്യൂട്ടിംഗ് സാങ്കേതികവിദ്യ വികസിപ്പിക്കാനും ഡാർക്ക് മാറ്റർ സംബന്ധിച്ച പഠനങ്ങൾക്കുമുള്ള സാധ്യതകൾ വർധിപ്പിക്കുമെന്നാണ് വിലയിരുത്തൽ. കൂടാതെ രക്തരോഗങ്ങളും കാൻസറും സംബന്ധിച്ച ചികിത്സാ ഗവേഷണങ്ങൾക്ക് സഹായകരമായ സ്റ്റം സെൽ ഉൽപ്പാദന ഉപകരണങ്ങളും ഗട്ട് മൈക്രോബയോം പഠനത്തിനുള്ള മോഡൽ ജീവികളും സ്പേസ് വെതർ നിരീക്ഷണം മെച്ചപ്പെടുത്താൻ സഹായിക്കുന്ന ഉപകരണങ്ങളും ഉൾപ്പെടുത്തിയിട്ടുണ്ട്.

എക്സ്പെഡിഷൻ 74/75 ദൗത്യത്തിനിടയിൽ ഈ പരീക്ഷണങ്ങൾ നടപ്പിലാക്കും. സിഗ്നസ് എക്സ് എൽ  ഒക്ടോബർ വരെ ബഹിരാകാശ നിലയത്തിൽ തുടരുമെന്നും പിന്നീട് ആയിരക്കണക്കിന് പൗണ്ട് മാലിന്യങ്ങൾ ഉൾപ്പെടുത്തി ഭൂമിയുടെ അന്തരീക്ഷത്തിൽ വീണ്ടും പ്രവേശിച്ച് സുരക്ഷിതമായി കത്തി നശിപ്പിക്കുമെന്നും നാസ അറിയിച്ചു.

മുൻ നാസ ബഹിരാകാശയാത്രികനായ സ്റ്റീവൻ ആർ. നാഗലിന്റെ സ്മരണാർത്ഥം ഈ ബഹിരാകാശവാഹനത്തിന് എസ്.എസ്. സ്റ്റീവൻ ആർ. നാഗൽ എന്ന പേരാണ് നൽകിയിരിക്കുന്നത്. മനുഷ്യരാശിയുടെ ശാസ്ത്രീയ മുന്നേറ്റങ്ങൾക്കും ഭാവിയിലെ ബഹിരാകാശ ദൗത്യങ്ങൾക്കും നിർണായകമായ പിന്തുണ നൽകുന്ന കാർഗോ ദൗത്യങ്ങളിലൊന്നായാണ് സിആർഎസ്-24 വിലയിരുത്തപ്പെടുന്നത്.