വാഷിംഗ്ടൺ: 2026ലെ അമേരിക്കൻ മിഡ്‌ടേം തെരഞ്ഞെടുപ്പുകൾക്ക് മുന്നോടിയായി സുപ്രധാനമായ രാഷ്ട്രീയ നീക്കവുമായി യു.എസ്. പ്രസിഡന്റ് ഡൊണാൾഡ് ട്രംപ് രംഗത്തെത്തി. വൈറ്റ് ഹൗസിലെ ഡെപ്യൂട്ടി ചീഫ് ഓഫ് സ്റ്റാഫ് (ലെജിസ്ലേറ്റീവ്, പൊളിറ്റിക്കൽ ആൻഡ് പബ്ലിക് അഫയേഴ്‌സ്) ആയ ജെയിംസ് ബ്ലെയർ താൽക്കാലിക അവധിയെടുത്ത് റിപ്പബ്ലിക്കൻ പാർട്ടിയുടെ  പ്രചാരണ പ്രവർത്തനങ്ങൾക്ക് നേതൃത്വം നൽകുമെന്ന് ട്രംപ് പ്രഖ്യാപിച്ചു.

ട്രൂത്ത് സോഷ്യലിൽ പങ്കുവെച്ച സന്ദേശത്തിൽ ബ്ലെയറെ രാജ്യത്തിലെ ഏറ്റവും കഴിവുള്ള രാഷ്ട്രീയ തന്ത്രജ്ഞരിൽ ഒരാൾ എന്നാണ്  ട്രംപ് വിശേഷിപ്പിച്ചത്. 2024ലെ തിരഞ്ഞെടുപ്പിൽ റിപ്പബ്ലിക്കൻ വിജയത്തിന് നിർണായക പങ്കുവഹിച്ച ബ്ലെയർ, 2026 മിഡ്‌ടേം തെരഞ്ഞെടുപ്പിലും പാർട്ടിയുടെ വിജയത്തിന് നേതൃത്വം നൽകുമെന്ന് ട്രംപ് വ്യക്തമാക്കി. തെരഞ്ഞെടുപ്പിന് ശേഷം അദ്ദേഹം വീണ്ടും വൈറ്റ് ഹൗസിലേക്ക് മടങ്ങിവരുമെന്നും പ്രസിഡന്റ് അറിയിച്ചു.

2026 നവംബർ 3-ന് നടക്കാനിരിക്കുന്ന മിഡ്‌ടേം തെരഞ്ഞെടുപ്പുകൾ ട്രംപിന്റെ രണ്ടാം പ്രസിഡൻഷ്യൽ കാലഘട്ടത്തിന്റെ നിർണായക രാഷ്ട്രീയ പരീക്ഷണമായി വിലയിരുത്തപ്പെടുന്നു. നിലവിൽ വൈറ്റ് ഹൗസും  സെനറ്റും ഹൗസ് ഓഫ് റെപ്രസെന്റേറ്റീവ്‌സും  ഉൾപ്പെടെ മൂന്ന് പ്രധാന അധികാരകേന്ദ്രങ്ങളും റിപ്പബ്ലിക്കൻ പാർട്ടിയുടെ നിയന്ത്രണത്തിലാണ്. ചരിത്രപരമായി പ്രസിഡന്റിന്റെ പാർട്ടിക്ക് മിഡ്‌ടേം തെരഞ്ഞെടുപ്പുകളിൽ സീറ്റുകൾ നഷ്ടപ്പെടുന്ന പ്രവണത നിലനിൽക്കുന്ന സാഹചര്യത്തിൽ,ഇത് മറികടക്കാനാണ് പുതിയ നീക്കമെന്നാണ് വിലയിരുത്തൽ.

ഹൗസിലെ 435 സീറ്റുകളും സെനറ്റിലെ 35 സീറ്റുകളും ഈ തിരഞ്ഞെടുപ്പിൽ വോട്ടർമാർ തീരുമാനിക്കും. ഡെമോക്രാറ്റുകൾക്ക് ഹൗസിൽ ഭൂരിപക്ഷം വീണ്ടെടുക്കാൻ വെറും മൂന്ന് സീറ്റുകളുടെ നേട്ടം മതിയാകുന്ന സാഹചര്യമാണ് നിലവിലുള്ളത്. അതേസമയം, 39 സംസ്ഥാനങ്ങളിലും പ്രദേശങ്ങളിലും ഗവർണർ തിരഞ്ഞെടുപ്പുകളും നടക്കും.

ജീവിതച്ചെലവ് വർധന, ഭവന പ്രതിസന്ധി, ആരോഗ്യചെലവ്, ഇറാൻ സംബന്ധമായ സൈനിക സംഘർഷത്തിന്റെ സാമ്പത്തിക പ്രതിഫലങ്ങൾ തുടങ്ങിയ വിഷയങ്ങൾ തിരഞ്ഞെടുപ്പിനെ സ്വാധീനിക്കുന്ന പ്രധാന ഘടകങ്ങളായി മാറിയിട്ടുണ്ട്. റിപ്പബ്ലിക്കൻ പാർട്ടി സ്ഥിരതയും ശക്തമായ നേതൃത്വവും മുന്നോട്ട് വയ്ക്കുമ്പോൾ, ഡെമോക്രാറ്റുകൾ ജീവിതച്ചെലവും സാമൂഹിക ക്ഷേമ വിഷയങ്ങളും കേന്ദ്രീകരിച്ചാണ് പ്രചാരണം ശക്തമാക്കുന്നത്.