വാഷിംഗ്ടൺ: നാസായുടെ ചരിത്രപ്രാധാന്യമുള്ള ആർട്ടെമിസ് II ദൗത്യം വിജയകരമായി പൂർത്തിയായതിന് പിന്നാലെ, അമേരിക്കയുടെ അടുത്ത വലിയ ലക്ഷ്യം മാർസ് ദൗത്യം ആണെന്ന് യു.എസ്. പ്രസിഡന്റ് ഡോണാൾഡ് ട്രംപ് പ്രഖ്യാപിച്ചു. ആർട്ടെമിസ് II ബഹിരാകാശയാത്രികരെ അഭിനന്ദിച്ച അദ്ദേഹം ഉടൻ തന്നെ അവരെ വൈറ്റ് ഹൗസിലേക്ക് ക്ഷണിക്കുമെന്നും അറിയിച്ചു.
 

ട്രൂത്ത് സോഷ്യലിൽ പങ്കുവച്ച സന്ദേശത്തിൽ ദൗത്യം വിജയകരമായതിൽ അമേരിക്കൻ പ്രസിഡന്റായ തനിക്ക് അതിയായ അഭിമാനമുണ്ടെന്നും വീണ്ടും ഇത്തരം ദൗത്യങ്ങൾ നടത്തുമെന്നും  അടുത്ത ലക്ഷ്യം മാർസ് ആണെന്നും ട്രംപ് വ്യക്തമാക്കി.

പസഫിക് സമുദ്രത്തിൽ സ്പ്ലാഷ് ഡൗൺ നടത്തിയതിന് പിന്നാലെ ഒറിയൻ  ബഹിരാകാശവാഹനത്തിൽ നിന്ന് നാല് ബഹിരാകാശയാത്രികരെയും സുരക്ഷിതമായി പുറത്തെത്തിച്ചു. തുടർന്ന് അവരെ അമേരിക്കൻ നാവികസേനയുടെ  കപ്പലിലേക്ക് മാറ്റുകയും, ദൗത്യാനന്തര മെഡിക്കൽ പരിശോധനകൾക്കായി മെഡിക്കൽ ബേയിലേക്ക് കൊണ്ടുപോകുകയും ചെയ്തതായി നാസ അറിയിച്ചു.

മനുഷ്യരെ വീണ്ടും ചന്ദ്രനിലേക്കും തുടർന്ന് മാർസിലേക്കുമുള്ള ദീർഘകാല ദൗത്യങ്ങൾക്ക് വഴിയൊരുക്കുന്ന നിർണായക ഘട്ടമായാണ് ആർട്ടെമിസ് II  ദൗത്യം വിലയിരുത്തപ്പെടുന്നത്. ഭാവിയിലെ ആഴത്തിലുള്ള ബഹിരാകാശ അന്വേഷണങ്ങൾക്ക് ഇത് ശക്തമായ തുടക്കമാകുമെന്ന് വിദഗ്ധർ അഭിപ്രായപ്പെടുന്നു.