ചരിത്രത്തിൽ ഇതുവരെ മനുഷ്യർ എത്തിയതിലധികം ദൂരത്തിൽ ബഹിരാകാശയാത്ര നടത്തി മടങ്ങുന്ന നാസായുടെ ആർട്ടെമിസ്–II ദൗത്യത്തിലെ നാല് ബഹിരാകാശയാത്രികർ വെള്ളിയാഴ്ച അമേരിക്കയിലെ സാൻ ഡിയേഗോ തീരത്തിനു സമീപമുള്ള പസഫിക് സമുദ്രത്തിൽ സുരക്ഷിതമായി സ്പ്ലാഷ്‌ഡൗൺ ചെയ്യാനിരിക്കുകയാണ്. 10 ദിവസത്തെ ദൗത്യത്തിനിടെ ചന്ദ്രന്റെ മറുവശം ചുറ്റിയെത്തിയ സംഘം ബഹിരാകാശ ഗവേഷണത്തിന്റെ പുതിയ അധ്യായത്തിന് വഴിതെളിക്കുന്ന നിർണായക നേട്ടമാണ് കൈവരിച്ചത്.
 

റീഡ് വൈസ്മാൻ, വിക്ടർ ഗ്ലോവർ, ക്രിസ്റ്റിന കോച്ച് (നാസാ) എന്നിവരും കനേഡിയൻ സ്‌പേസ് ഏജൻസിയിലെ ജെറമി ഹാൻസൻ എന്നിവരും യാത്ര ചെയ്ത ഓറിയൺ ബഹിരാകാശയാനമാണ് ഭൂമിയിലേക്ക് മടങ്ങുന്നത്. 50 വർഷത്തിനുശേഷം മനുഷ്യർ പങ്കെടുത്ത ആദ്യ ചാന്ദ്രിക ദൗത്യത്തിന്റെ സമാപനമായ ഈ സ്പ്ലാഷ്‌ഡൗൺ, ഭാവിയിലെ ചന്ദ്രലാൻഡിംഗുകൾക്കും കൂടുതൽ ദൂരത്തേക്കുള്ള ബഹിരാകാശയാത്രകൾക്കും അടിത്തറയിടുന്ന പ്രധാനഘട്ടമായി വിലയിരുത്തപ്പെടുന്നു.

ഇന്ത്യൻ സമയം അനുസരിച്ച് ശനിയാഴ്ച രാവിലെ ഏകദേശം 5:37ഓടെ (അമേരിക്കൻ ഈസ്റ്റേൺ സമയം രാത്രി 8:07) സ്പ്ലാഷ്‌ഡൗൺ നടക്കുമെന്നാണ് നാസയുടെ കണക്കുകൂട്ടൽ. വൈകുന്നേരം 6:30 മുതൽ നാസയുടെ യൂട്യൂബ്, എക്‌സ്  അക്കൗണ്ടുകൾ, ഔദ്യോഗിക വെബ്സൈറ്റ്, സ്മാർട്ട് ടി.വി. ആപ്പുകൾ എന്നിവയിൽ മടങ്ങിവരവ് തത്സമയം കാണാൻ സാധിക്കും. ഓറിയൺ ക്യാപ്സ്യൂളിന്റെ വേഗവും ഭൂമിയിൽ നിന്ന് ഉള്ള ദൂരം ഉൾപ്പെടെയുള്ള വിവരങ്ങൾ AROW വെബ്സൈറ്റിലൂടെ തത്സമയം നിരീക്ഷിക്കാനാകും.

സ്പ്ലാഷ്‌ഡൗൺ നടപടിക്രമത്തിന്റെ ഭാഗമായി ക്രൂ മോഡ്യൂൾ സർവീസ് മോഡ്യൂളിൽ നിന്ന് വേർപെട്ട ശേഷം ഭൂമിയുടെ അന്തരീക്ഷത്തിലേക്ക് അതിവേഗത്തിൽ (ഏകദേശം മണിക്കൂറിൽ 24,000 മൈൽ) പ്രവേശിക്കും. അതിവേഗം കുറയ്ക്കാൻ പാരഷൂട്ടുകൾ വിന്യസിച്ച ശേഷം ക്യാപ്സ്യൂൾ സമുദ്രത്തിൽ പതിക്കും. തുടർന്ന് നാസയും അമേരിക്കൻ നാവികസേനയും ചേർന്ന രക്ഷാപ്രവർത്തക സംഘം ക്യാപ്സ്യൂൾ സ്ഥിരപ്പെടുത്തുകയും യാത്രികരെ ഹെലികോപ്റ്ററിലൂടെ യുദ്ധക്കപ്പലിലേക്ക് മാറ്റുകയും ചെയ്യും. അവിടെ ആരോഗ്യപരിശോധനകൾക്കുശേഷം അവർ ഹ്യൂസ്റ്റണിലെ ജോൺസൺ സ്പേസ് സെന്ററിലേക്ക് മടങ്ങും.

ഏപ്രിൽ 1-ന് ഫ്ലോറിഡയിൽ നിന്ന് വിക്ഷേപിച്ച ആർട്ടെമിസ്–II ദൗത്യത്തിൽ സംഘം ചന്ദ്രന്റെ മനുഷ്യർ ഇതുവരെ നേരിട്ട് കാണാത്ത പ്രദേശങ്ങൾ നിരീക്ഷിക്കുകയും നിരവധി ക്രേറ്ററുകളും സമതലങ്ങളും ഉൾപ്പെടെയുള്ള ഉപരിതല ഘടനകളുടെ ചിത്രങ്ങൾ പകർത്തുകയും ചെയ്തു. ഭാവിയിലെ ചന്ദ്രദൗത്യങ്ങൾക്കായി നിർണായകമായ വിവരങ്ങൾ ഈ പഠനങ്ങളിൽ നിന്ന് ലഭിക്കുമെന്ന് ശാസ്ത്രജ്ഞർ പ്രതീക്ഷിക്കുന്നു. കൂടാതെ 53 മിനിറ്റ് ദൈർഘ്യമുള്ള സൂര്യഗ്രഹണവും സംഘം ബഹിരാകാശത്തിൽ നിന്ന് നേരിൽ കണ്ടത് ഈ ദൗത്യത്തിന്റെ പ്രത്യേക നേട്ടമായി മാറി.