വാഷിംഗ്‌ടൺ, ഡി.സി: യുഎസിലെ ജന്മാവകാശ പൗരത്വവുമായി ബന്ധപ്പെട്ട നിർണായക കേസിൽ സുപ്രീംകോടതി വാദം കേൾക്കുന്ന സാഹചര്യത്തിൽ, ഏപ്രിൽ 1നു സൗത്ത് ഏഷ്യൻ  അമേരിക്കൻ ജസ്റ്റിസ് കോളബറേറ്റീവിന്റെ (സാജ്‌കോ) നേതൃത്വത്തിൽ നൂറുകണക്കിന് സമൂഹാംഗങ്ങളും പ്രവർത്തകരും പങ്കാളികളും കോടതിക്കു പുറത്ത് പ്രതിഷേധ പ്രകടനം നടത്തി.

ഒരു സമൂഹത്തെ ബാധിക്കുന്ന വിഷയമാണെങ്കിൽ അത്  എല്ലാവരെയും ബാധിക്കുന്നതാണെന്നും  അതുകൊണ്ടാണ്  ഒരുമിച്ച് സംഘടിച്ചതെന്നും സാജ്‌കോ പ്രോഗ്രാം മാനേജർ ചിരാഗ് ഷാ പറഞ്ഞു.

ഈ കേസുമായി ബന്ധപ്പെട്ട് സാജ്‌കോ സുപ്രീംകോടതിയിൽ അമിക്കസ് ബ്രീഫ് സമർപ്പിക്കുകയും ചെയ്തു. യുഎസിലെ ദക്ഷിണേഷ്യൻ സമൂഹങ്ങളുടെ ദീർഘകാല സാന്നിധ്യവും സംഭാവനകളും ചൂണ്ടിക്കാട്ടിയ ഈ രേഖ, ദക്ഷിണേഷ്യക്കാർ 'എപ്പോഴും വിദേശികൾ' എന്ന ധാരണയ്ക്കെതിരെയുള്ള ശക്തമായ പ്രതികരണമാണ്. എക്സിക്യൂട്ടീവ് ഓർഡർ നിലനിൽക്കുകയാണെങ്കിൽ സമൂഹങ്ങൾ നേരിടേണ്ടി വരുന്ന പ്രത്യാഘാതങ്ങളും ഇതിൽ വിശദീകരിച്ചിട്ടുണ്ട്.

തിൻഡ് കേസിന് ശേഷം ദക്ഷിണേഷ്യക്കാരുടെ പൗരത്വം നഷ്ടപ്പെടുത്തിയ ചരിത്രവും ജന്മാവകാശ പൗരത്വത്തിലെ മാറ്റങ്ങൾ പിന്മാറ്റമായി ബാധിക്കുമോയെന്ന ആശങ്കയും സാജ്‌കോ  എക്സിക്യൂട്ടീവ് ഡയറക്ടർ കല്പന വി. പെദ്ദിഭൊത്ല ചൂണ്ടിക്കാട്ടി.പതിനാലാം ഭേദഗതിയിൽ പുതിയ വ്യവസ്ഥകൾ ചേർക്കാനുള്ള ശ്രമം തന്നെ ഗൗരവമായ ആശങ്കയാണ്. സർക്കാർ ചില നിയന്ത്രണങ്ങൾ ഉറപ്പുനൽകിയെങ്കിലും അവ ദീർഘകാലം നിലനിൽക്കുമോയെന്നത് സംശയമാണെന്നും അവർ പറഞ്ഞു.

‘താൽക്കാലിക സന്ദർശകർ’ എന്ന ആശയം ഉപയോഗിച്ചാണ് സർക്കാർ ജന്മാവകാശ പൗരത്വം താമസാവകാശവുമായി ബന്ധിപ്പിക്കാൻ ശ്രമിച്ചത്. എന്നാൽ വർഷങ്ങളായി എച്ച്-1 ബി വിസയിലോ അഭയാർത്ഥി പദവിയിലോ മറ്റ് നിയമപരമായ നിലകളിലോ കഴിയുന്ന കുടുംബങ്ങളെ ഇതു നേരിട്ട് ബാധിക്കുമെന്നും അവർ കൂട്ടിച്ചേർത്തു.

ഈ ഉത്തരവ് നിലനിൽക്കുകയാണെങ്കിൽ ഉണ്ടാകുന്ന ഭരണപരമായ ബുദ്ധിമുട്ടുകളെക്കുറിച്ച് സാജ്‌കോയുടെ ലീഗൽ ഡയറക്ടർ അനിസ റഹീം ആശങ്ക പ്രകടിപ്പിച്ചു. അമേരിക്കയിലെ രണ്ടാമത്തെ വേഗത്തിൽ വളരുന്ന കുടിയേറ്റ സമൂഹമായ ദക്ഷിണേഷ്യക്കാരുടെ നിരവധി കുഞ്ഞുങ്ങൾക്ക് ജനന സമയത്ത് തന്നെ പൗരത്വം നിഷേധിക്കപ്പെടാൻ ഇത് ഇടയാകും. കൂടാതെ ചില ദക്ഷിണേഷ്യൻ രാജ്യങ്ങൾ ഇത്തരം കുഞ്ഞുങ്ങൾക്ക് സ്വമേധയാ പൗരത്വം നൽകുന്നില്ല എന്നതിനാൽ അവർക്കു പൗരത്വം നഷ്ടപ്പെടാൻ സാധ്യതയുമുണ്ടെന്ന് അവർ അഭിപ്രായപ്പെട്ടു.

സതേൺ കലിഫോർണിയ ആസ്ഥാനമായ സൗത്ത് ഏഷ്യൻ നെറ്റ്‌വർക്കും രാജ്യത്തുടനീളമുള്ള നിരവധി സമൂഹ സംഘടനകളും ഈ പ്രതിഷേധത്തിൽ പങ്കെടുത്തു. ദക്ഷിണേഷ്യൻ അമേരിക്കക്കാർ, ഏഷ്യൻ അമേരിക്കക്കാർ, പസഫിക് ദ്വീപ് സമൂഹങ്ങൾ എന്നിവർ തലമുറകളായി ഭരണഘടനാ മൂല്യങ്ങൾ സംരക്ഷിക്കാൻ പ്രവർത്തിച്ചുവരുന്നു എന്ന് സംഘടനയുടെ  എക്സിക്യൂട്ടീവ് ഡയറക്ടർ ഷക്കീൽ സയ്യിദ് പറഞ്ഞു.  ദക്ഷിണേഷ്യൻ സമൂഹങ്ങളുടെ സംഭാവനകൾ അമേരിക്കൻ സമൂഹത്തെ കൂടുതൽ സമ്പന്നവും വൈവിധ്യമാർന്നതുമായതാക്കി മാറ്റിയിട്ടുണ്ടെന്നും അദ്ദേഹം ശ്രദ്ധയിൽപ്പെടുത്തി.

South Asians rally Outside Supreme Court Over Birthright Citizenship Case