വാഷിങ്ടൺ: ഇറാനുമായുള്ള യുദ്ധം 'അവസാനഘട്ടത്തിലേക്ക് നീങ്ങുകയാണ്' എന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചെങ്കിലും, യുദ്ധത്തിന്റെ അടുത്ത ഘട്ടം, ഭൂസേന വിന്യാസം, നയതന്ത്ര പാത, യുദ്ധാനന്തര പദ്ധതി എന്നിവയുമായി ബന്ധപ്പെട്ട നിർണായക ചോദ്യങ്ങൾക്ക് വ്യക്തത നൽകിയില്ലെന്ന് അമേരിക്കൻ മാധ്യമങ്ങൾ റിപ്പോർട്ട് ചെയ്തു.

പ്രൈംടൈം പ്രസംഗത്തിൽ  യുദ്ധം രണ്ട് മുതൽ മൂന്ന് ആഴ്ചയ്ക്കുള്ളിൽ അവസാനിക്കാനുള്ള സാധ്യത ട്രംപ് സൂചിപ്പിച്ചെങ്കിലും, ഇറാനിലേക്ക് അമേരിക്കൻ ഭൂസേന അയയ്ക്കുമോ എന്ന കാര്യത്തിൽ അദ്ദേഹം പ്രതികരിച്ചില്ല. യുദ്ധത്തിൽ നിന്ന് പുറത്ത് കടക്കാനുള്ള വ്യക്തമായ നയതന്ത്രത്തെക്കുറിച്ചും പ്രസംഗത്തിൽ അവതരിപ്പിച്ചില്ലെന്ന് റിപ്പോർട്ടുകൾ ചൂണ്ടിക്കാട്ടുന്നു.

ആഗോള എണ്ണവിതരണത്തിന് നിർണായകമായ ഹോർമുസ് കടലിടുക്കിനെക്കുറിച്ച് പരാമർശിച്ച ട്രംപ്, മിഡിൽ ഈസ്റ്റ് എണ്ണയിൽ ആശ്രയിക്കുന്ന രാജ്യങ്ങൾ തന്നെ അതിന്റെ സുരക്ഷ ഉറപ്പാക്കുന്നതിൽ മുൻകൈ എടുക്കണമെന്ന് അഭിപ്രായപ്പെട്ടു. അമേരിക്ക സഹായിക്കാൻ തയ്യാറാണെങ്കിലും മറ്റ് രാജ്യങ്ങൾ നേതൃത്വം നൽകണമെന്ന് അദ്ദേഹം പറഞ്ഞു.

സംയുക്ത സൈനിക നടപടികളിൽ പ്രധാന പങ്കാളിയായ ഇസ്രയേലിന്റെ പങ്കിനെക്കുറിച്ചും നാറ്റോ സഖ്യരാജ്യങ്ങളുമായുള്ള ഏകോപനത്തെക്കുറിച്ചും പ്രസംഗത്തിൽ വിശദീകരണം ഉണ്ടായില്ലെന്ന് അമേരിക്കൻ മാധ്യമങ്ങൾ റിപ്പോർട്ട് ചെയ്തു.

ഇറാനിലെ ഭരണക്രമത്തിൽ മാറ്റം വരുത്തുക അമേരിക്കയുടെ ലക്ഷ്യമല്ലെന്ന് ട്രംപ് പറഞ്ഞെങ്കിലും, പുതിയ നേതൃത്വഘടനയെക്കുറിച്ചോ ഉന്നത നേതാക്കളുടെ മരണത്തിന് ശേഷമുള്ള അധികാരമാറ്റത്തെക്കുറിച്ചോ വ്യക്തത നൽകിയില്ലെന്നും റിപ്പോർട്ടുകൾ പറയുന്നു.

ഇറാനിലെ ആണവസാമഗ്രികൾ സുരക്ഷിതമാക്കുന്നതിനുള്ള അമേരിക്കയുടെ പദ്ധതി എന്താണെന്ന ചോദ്യത്തിനും പ്രസംഗത്തിൽ മറുപടി ഉണ്ടായില്ല. ഭൂഗർഭത്തിൽ സൂക്ഷിച്ചിരിക്കുന്ന സമ്പുഷ്ട യൂറേനിയം പിടിച്ചെടുക്കാൻ അപകടസാധ്യതയേറിയ ഭൂസേനാ പ്രവർത്തനങ്ങൾ ആവശ്യമായേക്കാമെന്ന് വിദഗ്ധർ മുന്നറിയിപ്പ് നൽകിയിട്ടുണ്ട്.

ഇറാന്റെ സൈനിക ശേഷി ഗണ്യമായി തളർത്തിയതായി ട്രംപ് ആവർത്തിച്ചെങ്കിലും, മേഖലയിൽ ഇറാൻ തുടരുന്ന മിസൈൽ-ഡ്രോൺ ആക്രമണങ്ങളെക്കുറിച്ച് പ്രസംഗത്തിൽ വിശദീകരണം ഉണ്ടായില്ലെന്ന് വിലയിരുത്തപ്പെടുന്നു.

യുദ്ധം രണ്ടാം മാസത്തിലേക്ക് കടന്ന സാഹചര്യത്തിൽ ഹോർമുസ് കടലിടുക്കിലെ തടസ്സങ്ങൾ ആഗോള ഊർജവിതരണത്തെയും വിപണികളെയും ഇതിനകം ബാധിച്ചിരിക്കുകയാണ്. ഭൂസേനാ വിന്യാസം, യുദ്ധാനന്തര ഭരണക്രമം, മേഖലയുടെ സ്ഥിരത എന്നിവയെക്കുറിച്ചുള്ള വ്യക്തതയില്ലായ്മ അടുത്ത ഘട്ടത്തെക്കുറിച്ചുള്ള അനിശ്ചിതത്വം തുടരുന്നതായി വിശകലനങ്ങൾ സൂചിപ്പിക്കുന്നു.

യുദ്ധം അവസാനിപ്പിക്കണമെന്ന് ആവശ്യപ്പെട്ടിട്ടില്ലെന്ന് ഇറാൻ; ട്രംപിന്റെ അവകാശവാദം 'അടിസ്ഥാനരഹിതം'

ടെഹ്‌റാൻ: അമേരിക്കയോട് യുദ്ധവിരാമം ആവശ്യപ്പെട്ടുവെന്ന പ്രസിഡന്റ് ഡൊണാൾഡ് ട്രംപിന്റെ അവകാശവാദം അടിസ്ഥാനരഹിതമാണെന്ന് ഇറാൻ വിദേശകാര്യ മന്ത്രാലയം വ്യക്തമാക്കി. ടെഹ്‌റാൻ വാഷിങ്ടണുമായി യാതൊരു യുദ്ധവിരാമ അഭ്യർത്ഥനയും നടത്തിയിട്ടില്ലെന്ന് മന്ത്രാലയ വക്താവ് പ്രതികരിച്ചു.

ഹോർമുസ് കടലിടുക്ക് തുറക്കുന്നതിനെ ആശ്രയിച്ചാണ് യുദ്ധവിരാമം പരിഗണിക്കുകയെന്ന് ട്രംപ് മുൻപ് പറഞ്ഞിരുന്നു. കടലിടുക്ക് തുറക്കാത്ത പക്ഷം ഇറാനെതിരെ ആക്രമണം തുടരുമെന്നും അദ്ദേഹം സാമൂഹ്യമാധ്യമ പോസ്റ്റിൽ മുന്നറിയിപ്പ് നൽകിയിരുന്നു.

ഇറാൻ പാർലമെന്റിന്റെ ദേശീയ സുരക്ഷാ കമ്മീഷൻ മേധാവി ഇബ്രാഹിം അസിസി ഹോർമുസ് കടലിടുക്കിൽ പുതിയ നിയന്ത്രണങ്ങൾ നടപ്പാക്കുമെന്നും അതനുസരിക്കാത്ത രാജ്യങ്ങൾക്ക് കടന്നുപോകൽ അനുവദിക്കില്ലെന്നും മുന്നറിയിപ്പ് നൽകിയതായി റിപ്പോർട്ടുകളുണ്ട്.

അതേസമയം, ഇറാൻ വിദേശകാര്യമന്ത്രി അബ്ബാസ് അരഗ്ചി അമേരിക്കയുമായി നയതന്ത്ര പുരോഗതിക്ക് സാധ്യതയില്ലെന്ന് വ്യക്തമാക്കി. ഇരുരാജ്യങ്ങൾക്കുമിടയിലെ വിശ്വാസനില പൂജ്യം ആണെന്നും അമേരിക്കയുമായുള്ള ചർച്ചകളിൽ നിന്ന് ഇറാന് നല്ല അനുഭവം ഉണ്ടായിട്ടില്ലെന്നും അദ്ദേഹം പറഞ്ഞു.

ഇറാന്റെ പുതിയ പരമോന്നത നേതാവായ മുജ്തബ ഖമിനെയി  അമേരിക്കയ്ക്കും ഇസ്രയേലിനുമെതിരെ  പോരാട്ടത്തിൽ വീരമൃത്യു വരിച്ച നേതാക്കളുടെ ത്യാഗങ്ങളെ അഭിനന്ദിച്ചു. ഹസൻ നസ്രള്ള, ഹാഷിം സഫെയ്ദ്ദിൻ എന്നിവരെയും ഇറാൻ റെവല്യൂഷണറി ഗാർഡ് കമാൻഡറായ  ഖാസിം സൊലൈമാനിയെയും അദ്ദേഹം അനുസ്മരിച്ചു. അമേരിക്കയ്ക്കും സയോണിസ്റ്റ് ഭരണകൂടത്തിനും എതിരായ പ്രതിരോധ പോരാട്ടത്തിന്റെ ശരിയായ വഴിയേ  ഈ നേതാക്കളുടെ ത്യാഗങ്ങൾ തെളിയിക്കുന്നുവെന്നും അദ്ദേഹം വ്യക്തമാക്കി.