മയാമി:  പ്രസിഡന്റ് ഡൊണാൾഡ് ട്രംപ് തന്റെ ഭാവിയിലെ പ്രസിഡൻഷ്യൽ ലൈബ്രറിയുടെ ദൃശ്യരൂപം പുറത്തുവിട്ടു. മയാമി നഗരമധ്യത്തിൽ നിർമിക്കാൻ പദ്ധതിയിടുന്ന ഈ ലൈബ്രറി സമുച്ചയം ലോകത്തിലെ ഏറ്റവും ശ്രദ്ധേയമായ പ്രസിഡൻഷ്യൽ ലൈബ്രറികളിലൊന്നാകുമെന്ന് വൈറ്റ് ഹൗസ് വൃത്തങ്ങൾ വ്യക്തമാക്കി.

ഏകദേശം രണ്ട് മിനിറ്റ് ദൈർഘ്യമുള്ള വീഡിയോ അവതരണത്തിലൂടെ പുറത്തുവിട്ട രൂപകൽപ്പനയിൽ ചുവപ്പ്-വെള്ളി-നീല നിറങ്ങളുള്ള ഉയർന്ന ഗോപുരം, സ്വർണ്ണ എസ്കലേറ്റർ, കെട്ടിടത്തിന്റെ മുൻവശത്ത് വലിയ അമേരിക്കൻ പതാക, ട്രംപ് എന്ന് ഇംഗ്ലീഷിൽ സ്വർണ്ണ അക്ഷരങ്ങളിലുള്ള  എഴുത്ത് തുടങ്ങിയ പ്രത്യേകതകൾ ഉൾപ്പെടുത്തിയിട്ടുണ്ട്. കെട്ടിടത്തിന്റെ പ്രവേശന കവാടത്തിൽ പ്രസിഡൻഷ്യൽ മുദ്ര പതിച്ച സ്വർണ്ണ വളയവും സന്ദർശകരെ സ്വാഗതം ചെയ്യുന്ന രീതിയിൽ രൂപകൽപ്പന ചെയ്തിരിക്കുന്നു.

ലൈബ്രറി സമുച്ചയത്തിനുള്ളിൽ എയർ ഫോഴ്‌സ് വൺ വിമാനത്തിന്റെ മാതൃകയും ട്രംപിന്റെ പ്രസംഗങ്ങൾ പ്രദർശിപ്പിക്കുന്ന ഡിജിറ്റൽ സ്ക്രീനുകളും ഉൾപ്പെടുത്തിയിട്ടുണ്ടെന്നാണ് ദൃശ്യങ്ങളിൽ കാണുന്നത്. കൂടാതെ വൈറ്റ് ഹൗസ് റോസ് ഗാർഡന്റെ മാതൃകയും 400 മില്യൺ ഡോളർ ചെലവിൽ നിർമിക്കാൻ പദ്ധതിയിട്ട 90,000 ചതുരശ്ര അടി വിസ്തീർണ്ണമുള്ള ബോൾറൂമിന്റെ രൂപകൽപ്പനയും ഉൾപ്പെടുത്തിയിട്ടുണ്ട്.

ട്രംപ് പ്രസിഡൻഷ്യൽ ലൈബ്രറി ലോകത്തിലെ ഏറ്റവും ഭംഗിയാർന്ന കെട്ടിടങ്ങളിലൊന്നായിരിക്കുമെന്ന് വൈറ്റ് ഹൗസ് വക്താവ് ഡേവിസ് ഇംഗ്ലെ വ്യക്തമാക്കി.

മയാമി ആസ്ഥാനമായ ആർക്കിടെക്ചർ സ്ഥാപനമാണ് കെട്ടിടത്തിന്റെ രൂപകൽപ്പന നിർവഹിക്കുന്നത്. അമേരിക്കയിലെ ഏറ്റവും ഉയരം കൂടിയ പ്രസിഡൻഷ്യൽ ലൈബ്രറിയായി ഇത് മാറുമെന്നും നിർമാണം ദക്ഷിണ ഫ്ലോറിഡയിലെ വ്യാപാര മേഖലയ്ക്ക് സാമ്പത്തിക ഉണർവ്വ് നൽകുമെന്നും പദ്ധതിയുമായി ബന്ധപ്പെട്ടവർ അറിയിച്ചു.

ഫ്ലോറിഡ ഗവർണർ റോൺ ഡിസാന്റിസിന്റെ നേതൃത്വത്തിൽ മയാമി നഗരമധ്യത്തിലുള്ള സർക്കാർ ഉടമസ്ഥതയിലുള്ള ഏകദേശം 2.63 ഏക്കർ ഭൂമി ലൈബ്രറി പദ്ധതിക്കായി അനുവദിച്ചിരുന്നു. ബിസ്കെയ്ൻ ബേയ്ക്ക്  സമീപമുള്ള ഈ ഭൂമിയുടെ മൂല്യം നൂറുകോടികൾ ഡോളറുകൾ വരെയാണെന്നാണ് വിലയിരുത്തൽ.

അതേസമയം ഭൂമി കൈമാറ്റ നടപടിക്കെതിരെ നിയമപരമായ വെല്ലുവിളികളും ഉയർന്നിട്ടുണ്ട്. പൊതുസമ്പത്തായ ഭൂമി യാതൊരു പ്രതിഫലവും കൂടാതെ കൈമാറിയത് നിയമവിരുദ്ധമാണെന്നാരോപിച്ച് ചിലർ കോടതിയെ സമീപിച്ചിട്ടുണ്ട്. പദ്ധതിയിലൂടെ പ്രസിഡന്റിന് സാമ്പത്തിക നേട്ടമുണ്ടാകുമെന്ന ആരോപണവും ഉയർന്നിട്ടുണ്ട്.

അടുത്ത അഞ്ച് വർഷത്തിനുള്ളിൽ നിർമ്മാണ പ്രവർത്തനങ്ങൾ ആരംഭിക്കാനാണ് പദ്ധതി. ലൈബ്രറി, മ്യൂസിയം എന്നിവയ്‌ക്കൊപ്പം ഹോട്ടൽ, കോൺഡോമിനിയം തുടങ്ങിയ വാണിജ്യ വികസനങ്ങൾക്കും സ്ഥലത്തിന്റെ ഭാഗം ഉപയോഗിക്കാനാകും എന്നതും പദ്ധതിയുടെ പ്രത്യേകതയാണ്.