വാഷിങ്ടൺ: അമേരിക്കൻ വൈസ് പ്രസിഡന്റ് ജെ ഡി വാൻസിന്റെ ഭാര്യയും രാജ്യത്തിന്റെ ആദ്യ ഇന്ത്യൻ വംശജയായ സെക്കൻഡ് ലേഡിയുമായ ഉഷ വാൻസ്, വൈസ് പ്രസിഡന്റിന്റെ ഔദ്യോഗിക വസതിയിലെ കുടുംബജീവിതം, രാഷ്ട്രീയ പങ്കാളിത്തം, സ്വന്തം പൊതുപ്രവർത്തനങ്ങൾ എന്നിവയെക്കുറിച്ച് അപൂർവമായ വ്യക്തിപരമായ അനുഭവങ്ങൾ പങ്കുവച്ചു.

അഭിഭാഷക ജീവിതത്തിൽ നിന്ന് പൊതുജീവിതത്തിലേക്ക് മാറിയത് തുടക്കത്തിൽ കുറച്ച് ആശയക്കുഴപ്പമുണ്ടാക്കിയ അനുഭവമായിരുന്നു എന്നാണ് എൻബിസി ന്യൂസിന് നൽകിയ അഭിമുഖത്തിൽ അവർ പറഞ്ഞത്. എന്നാൽ ഇപ്പോൾ കുടുംബജീവിതത്തിനും വിദ്യാഭ്യാസവുമായി ബന്ധപ്പെട്ട വിഷയങ്ങൾക്കും കൂടുതൽ സമയം നൽകാൻ കഴിയുന്നതായി അവർ വ്യക്തമാക്കി. വാൻസിന്റെ രാഷ്ട്രീയ ലക്ഷ്യങ്ങൾക്ക് പിന്തുണ നൽകുന്നതാണ് തന്റെ പ്രധാന ഉത്തരവാദിത്വമെന്നും അവർ കൂട്ടിച്ചേർത്തു.

വൈസ് പ്രസിഡന്റിന്റെ പ്രവർത്തനങ്ങളുമായി ബന്ധപ്പെട്ട കാര്യങ്ങളിൽ താൻ അനൗപചാരികമായെങ്കിലും സ്ഥിരമായി പങ്കാളിയാണെന്നും അവർ വ്യക്തമാക്കി.  അദ്ദേഹത്തെ എന്തെങ്കിലും കാര്യങ്ങൾ വിഷമിപ്പിക്കുമ്പോൾ താൻ കൂടുതൽ ഇടപെടാറുണ്ട് എന്നും അവർ പറഞ്ഞു.

സ്വന്തം രാഷ്ട്രീയ നിലപാടുകൾക്കുറിച്ചും അവർ പ്രതികരിച്ചു.

പൊതു ശ്രദ്ധയുടെ മദ്ധ്യേയും സാധാരണ ജീവിതശൈലി തുടരാൻ കഴിയുന്നുവെന്നും അവർ വ്യക്തമാക്കി. ജീൻസും ടി-ഷർട്ടും ധരിച്ച് കടകളിലേക്കോ ലൈബ്രറിയിലേക്കോ പോകാൻ ഇപ്പോഴും കഴിയുന്നുണ്ട് എന്നും അവർ പറഞ്ഞു. ഇപ്പോൾ നാലാമത്തെ കുഞ്ഞിനെ ഗർഭിണിയായിരിക്കുന്ന ഉഷ വാൻസ് മാതൃത്വവും പൊതുപ്രതീക്ഷകളും തമ്മിലുള്ള സമതുലനത്തെ കുറിച്ചും തുറന്നു സംസാരിച്ചു. കുടുംബത്തോടൊപ്പം കൂടുതൽ സമയം ചെലവഴിക്കാൻ കഴിയുന്നത് വലിയ ഭാഗ്യമാണെന്നും അവർ പറഞ്ഞു.

കുട്ടികളിൽ വായനാശീലം വളർത്തുന്നതിനായി ആരംഭിച്ച പുതിയ പോഡ്കാസ്റ്റ് സംരംഭത്തെക്കുറിച്ചും അവർ വിശദീകരിച്ചു. 'സ്റ്റോറി ടൈം വിത്ത് ദ സെക്കൻഡ് ലേഡി' എന്ന പേരിലുള്ള പരിപാടിയിലൂടെ കുട്ടികളെ പുസ്തകങ്ങളിലേക്ക് ആകർഷിക്കുകയാണ് ലക്ഷ്യമെന്ന് അവർ പറഞ്ഞു.

കുടുംബജീവിതം, പൊതുപ്രവർത്തനം, വിദ്യാഭ്യാസ മേഖലയിൽ ശ്രദ്ധ കേന്ദ്രീകരിച്ച ഇടപെടലുകൾ എന്നിവയെ സംയോജിപ്പിച്ചുള്ള വ്യത്യസ്തമായ ഒരു പൊതുപങ്കാളിത്ത മാതൃക രൂപപ്പെടുത്താനുള്ള ശ്രമമാണ് താൻ ലക്ഷ്യമിടുന്നതെന്നും ഉഷ വാൻസ് വ്യക്തമാക്കി.

Usha Vance opens up on life in vice president’s residence