വാഷിങ്ടോ ഡി സി : തന്റെ ആരോഗ്യസ്ഥിതിയെക്കുറിച്ച് വീണ്ടും വിചിത്രമായ അവകാശവാദവുമായി അമേരിക്കന്‍ പ്രസിഡന്റ് ഡൊണാള്‍ഡ് ട്രമ്പ്. താന്‍ ജങ്ക് ഫുഡ് ഒഴിവാക്കുകയാണെങ്കില്‍ 200 വയസ്സുവരെ ജീവിക്കാന്‍ കഴിയുമെന്ന് മുന്‍ വൈറ്റ് ഹൗസ് ഫിസിഷ്യന്‍ ഡോ. റോണി ജാക്‌സണ്‍ പറഞ്ഞതായാണ് ട്രമ്പ് അവകാശപ്പെട്ടത്. വൈറ്റ് ഹൗസില്‍ നടന്ന ഒരു ചടങ്ങിലായിരുന്നു അദ്ദേഹത്തിന്റെ ഈ പരാമര്‍ശം.

ഏറ്റവും ആരോഗ്യവാനായ പ്രസിഡന്റ്: മുന്‍ പ്രസിഡന്റുമാരായ ജോര്‍ജ്ജ് ഡബ്ല്യു. ബുഷ്, ബരാക് ഒബാമ എന്നിവരേക്കാള്‍ ആരോഗ്യവാന്‍ ട്രമ്പ് ആണെന്ന് ഡോക്ടര്‍ വിശേഷിപ്പിച്ചതായും അദ്ദേഹം പറഞ്ഞു. കഴിഞ്ഞ കുറച്ച് മാസങ്ങളായി ട്രമ്പിന്റെ കൈകളിലെ ചതവുകളും കാലിലെ നീരും വലിയ ചര്‍ച്ചയായിരുന്നു. പ്രായമായവരില്‍ കണ്ടുവരുന്ന 'ക്രോണിക് വീനസ് ഇന്‍സഫിഷ്യന്‍സി' എന്ന രക്തചംക്രമണ സംബന്ധമായ അസുഖം അദ്ദേഹത്തിനുണ്ടെന്ന് 2025 ജൂലൈയില്‍ വൈറ്റ് ഹൗസ് സ്ഥിരീകരിച്ചിരുന്നു.

മക്‌ഡൊണാള്‍ഡ്‌സ് പോലെയുള്ള ഫാസ്റ്റ് ഫുഡുകളോടും ഡയറ്റ് കോക്കിനോടുമുള്ള ട്രമ്പിന്റെ താല്‍പ്പര്യം പ്രശസ്തമാണ്. ട്രമ്പ് വളരെ മോശം ഭക്ഷണമാണ് കഴിക്കുന്നതെന്ന് യുഎസ് ഹെല്‍ത്ത് സെക്രട്ടറി റോബര്‍ട്ട് എഫ്. കെന്നഡി ജൂനിയര്‍ നേരത്തെ അഭിപ്രായപ്പെട്ടിരുന്നു. ട്രമ്പിന്റെ ആരോഗ്യത്തെക്കുറിച്ച് ഇത്തരമൊരു പരാമര്‍ശം നടത്തിയെന്ന് പറയപ്പെടുന്ന റോണി ജാക്‌സണ്‍ നേരത്തെ ഔദ്യോഗിക പദവിയിലിരിക്കെ അച്ചടക്ക ലംഘനത്തിന് നടപടി നേരിട്ടിട്ടുള്ള വ്യക്തിയാണ്.

വാര്‍ദ്ധക്യസഹജമായ അസുഖങ്ങള്‍ അലട്ടുന്നുണ്ടെങ്കിലും തന്റെ കരുത്തുറ്റ ശരീരപ്രകൃതിയെയും ആരോഗ്യത്തെയും പുകഴ്ത്താനാണ് ട്രമ്പ്ഈ വേദി ഉപയോഗിച്ചത്.