വാഷിങ്ടൺ, മാർച്ച് 19 : ഭീകരവിരുദ്ധ നടപടികൾ, നിരീക്ഷണ സംവിധാനം, സുരക്ഷാ ഭീഷണികൾ എന്നിവയെക്കുറിച്ച് സെനറ്റർമാർ ഉയർത്തിയ ചോദ്യങ്ങൾക്ക് ശക്തമായി മറുപടി നൽകി എഫ്‌ബിഐ ഡയറക്ടർ കാഷ് പട്ടേൽ. സെനറ്റ് ഇന്റലിജൻസ് കമ്മിറ്റി ഹിയറിംഗിൽ ആത്മവിശ്വാസത്തോടെയും കടുത്ത നിലപാടോടെയും അദ്ദേഹം പ്രതികരിച്ചു.

ഇന്ത്യൻ വംശജനായ പട്ടേൽ, എഫ്‌ബിഐയുടെ കർശനമായ സുരക്ഷാ നടപടികൾ ഫലപ്രദമാണെന്ന് ചൂണ്ടിക്കാട്ടി. എഫ്‌ബിഐ നാല് ഭീകരാക്രമണങ്ങൾ തടഞ്ഞു എന്നും അതിൽ മൂന്നെണ്ണം ഐസിസിന്റേതായിരുന്നെന്നും  അദ്ദേഹം പറഞ്ഞു.

ഭീകരസംഘടനകൾ ഇപ്പോൾ ഓൺലൈൻ പ്ലാറ്റ്‌ഫോമുകൾ വഴി അംഗങ്ങളെ ചേർക്കുന്ന രീതിയിലേക്ക് മാറിയതായി അദ്ദേഹം വ്യക്തമാക്കി. ഡിജിറ്റൽ പ്ലാറ്റ്‌ഫോമുകൾ വഴി പ്രവർത്തനം വ്യാപിച്ചതോടെ ഭീഷണി കൂടുതൽ ശക്തമായി എന്നും പട്ടേൽ കൂട്ടിച്ചേർത്തു.

സെനറ്റർ റോൺ വൈഡൻ ഉയർത്തിയ നിരീക്ഷണവുമായി ബന്ധപ്പെട്ട ആശങ്കകൾക്ക് മറുപടിയായി, നിയമപരിധിക്കുള്ളിൽ തന്നെയാണ് എല്ലാ വിവരശേഖരണവും നടക്കുന്നതെന്ന് പട്ടേൽ ഉറപ്പുനൽകി.

രാജ്യമൊട്ടാകെ 59 ഹോംലാൻഡ് സെക്യൂരിറ്റി ടാസ്ക് ഫോഴ്സുകൾ സ്ഥാപിച്ചിട്ടുണ്ടെന്നും ഫെഡറൽ, സംസ്ഥാന ഏജൻസികളുമായി സഹകരണം ശക്തമാക്കിയതായും അദ്ദേഹം പറഞ്ഞു.

ഇന്റലിജൻസ് ശേഖരണത്തിലും ബയോമെട്രിക് ഡാറ്റ ശേഖരണത്തിലും 'ഡബിൾ ഡിജിറ്റ്' വർധനയുണ്ടായതായും അതിലൂടെ ഭീഷണികളെ കൂടുതൽ കൃത്യമായി തിരിച്ചറിയാൻ സാധിക്കുന്നുവെന്നും പട്ടേൽ കൂട്ടിച്ചേർത്തു.

സൈബർ കുറ്റകൃത്യങ്ങളും അന്താരാഷ്ട്ര തട്ടിപ്പുകളും വലിയ വെല്ലുവിളിയായി മാറിയതായും അദ്ദേഹം ചൂണ്ടിക്കാട്ടി. തെക്കുകിഴക്കൻ ഏഷ്യയിൽ ആസ്ഥാനമുള്ള തട്ടിപ്പ് നെറ്റ്വർക്കുകൾ അമേരിക്കക്കാരെ വഞ്ചിക്കുന്നുണ്ടെന്നും അവയെ തകർക്കാൻ വിദേശ രാജ്യങ്ങളുമായി സഹകരിക്കുന്നതായും അദ്ദേഹം പറഞ്ഞു.

ഡിജിറ്റൽ കാലഘട്ടത്തിൽ വേഗത്തിൽ മാറുന്ന ഭീഷണികളെ നേരിടാൻ എഫ്‌ബിഐയുടെ സമീപനം കൂടുതൽ സജീവവും സാങ്കേതികവിദ്യാധിഷ്ഠിതവുമാകേണ്ടതുണ്ടെന്നും അദ്ദേഹം വ്യക്തമാക്കി.

ഹോംലാൻഡ് സെക്യൂരിറ്റി വകുപ്പ് ഉൾപ്പെടെയുള്ള മറ്റ് ഏജൻസികളുമായുള്ള സഹകരണം ശക്തിപ്പെടുത്തുന്നത് അനിവാര്യമാണെന്നും, കൂടുതൽ മനുഷ്യശേഷിയും സംയുക്ത വിവര പങ്കിടലും സുരക്ഷാ പ്രവർത്തനങ്ങൾക്ക് നിർണായകമാണെന്നും പട്ടേൽ പറഞ്ഞു.