ഷിക്കാഗോ: ഇല്ലിനോയിസ് ഗവര്‍ണര്‍ സ്ഥാനത്തേക്ക് മൂന്നാം തവണയും ഡെമോക്രാറ്റിക് സ്ഥാനാര്‍ത്ഥിയായി ജെ.ബി. പ്രിറ്റ്സ്‌കര്‍ മത്സരിക്കും. റിപ്പബ്ലിക്കന്‍ പ്രൈമറിയില്‍ വിജയിച്ച ഡാരന്‍ ബെയ്ലിയാണ് നവംബറില്‍ നടക്കുന്ന പൊതുതിരഞ്ഞെടുപ്പില്‍ പ്രിറ്റ്സ്‌കറുടെ പ്രധാന എതിരാളി. 2022-ലെ തിരഞ്ഞെടുപ്പിലും ഇരുവരും തമ്മിലായിരുന്നു പോരാട്ടം 

ഹയാത്ത് ഹോട്ടല്‍ ശൃംഖലയുടെ അവകാശിയും ശതകോടീശ്വരനുമായ പ്രിറ്റ്സ്‌കര്‍, 2028-ലെ അമേരിക്കന്‍ പ്രസിഡന്റ് തിരഞ്ഞെടുപ്പില്‍ മത്സരിക്കാന്‍ ലക്ഷ്യമിടുന്നതായി രാഷ്ട്രീയ വൃത്തങ്ങള്‍ സൂചിപ്പിക്കുന്നു. ട്രമ്പ് ഭരണകൂടത്തിന്റെ കുടിയേറ്റ നയങ്ങള്‍ക്കെതിരെ ശക്തമായ നിലപാട് സ്വീകരിച്ചതിലൂടെ അദ്ദേഹം ദേശീയതലത്തില്‍ ശ്രദ്ധേയനായിരുന്നു.

സംസ്ഥാനത്തെ മിനിമം വേതനം മണിക്കൂറിന് 15 ഡോളറായി ഉയര്‍ത്താനുള്ള നിയമത്തില്‍ ഒപ്പുവെച്ചു. അമേരിക്കയില്‍ ആദ്യമായി 'ക്യാഷ് ബെയ്ല്‍' (പണമിടപാടിലൂടെയുള്ള ജാമ്യം) നിര്‍ത്തലാക്കിയ സംസ്ഥാനമായി ഇല്ലിനോയിസിനെ മാറ്റി. ഇത് വലിയ രാഷ്ട്രീയ വിവാദങ്ങള്‍ക്ക് വഴിവെച്ചിരുന്നു.

സാമ്പത്തിക കരുത്ത്: സ്വന്തം സമ്പാദ്യം ഉപയോഗിച്ച് തിരഞ്ഞെടുപ്പ് പ്രചാരണങ്ങളെ സഹായിക്കുന്ന പ്രിറ്റ്സ്‌കര്‍, തന്റെ ലഫ്റ്റനന്റ് ഗവര്‍ണര്‍ ജൂലിയാന സ്ട്രാറ്റന്റെ സെനറ്റ് പോരാട്ടത്തിനായി 14.8 ദശലക്ഷം ഡോളറാണ് ചിലവഴിച്ചത്.