ന്യൂ യോർക്ക്: ഐക്യരാഷ്ട്രസഭയുടെ പുതിയ സെക്രട്ടറി ജനറലിനെ തിരഞ്ഞെടുക്കാനുള്ള നടപടികൾ അടുത്ത മാസം ആരംഭിക്കുമെന്ന് ജനറൽ അസംബ്ലി പ്രസിഡന്റായ അനലീന ബെയർബോക്ക് അറിയിച്ചു. ഇതുവരെ അഞ്ച് സ്ഥാനാർത്ഥികളാണ് രംഗത്തുള്ളത്.

തിരഞ്ഞെടുപ്പ് നടപടികൾ ഏപ്രിൽ 20-നാണ് ആരംഭിക്കുന്നത്. ഓരോ സ്ഥാനാർത്ഥിക്കും മൂന്ന് മണിക്കൂർ നീണ്ട  സംവാദത്തിൽ പങ്കെടുക്കേണ്ടി വരും. ഈ സെഷനുകളിൽ അവർ അവരുടെ ദർശനവും പദ്ധതികളും അവതരിപ്പിക്കുകയും അംഗരാജ്യങ്ങളുടെയും സിവിൽ സൊസൈറ്റി സംഘടനകളുടെയും ചോദ്യങ്ങൾക്ക് മറുപടി നൽകുകയും ചെയ്യണം. പരിപാടി ഓൺലൈനായി സംപ്രേഷണം ചെയ്യുകയും ചെയ്യും.

കഴിഞ്ഞ വർഷം തന്നെ സ്ഥാനാർത്ഥികളെ നാമനിർദ്ദേശം ചെയ്യാൻ ആഹ്വാനം ചെയ്തിരുന്നു. 80 വർഷത്തെ ചരിത്രത്തിനുശേഷം ആദ്യമായി ഒരു വനിത ഐക്യരാഷ്ട്രസഭയുടെ സെക്രട്ടറി ജനറലാകണമെന്ന്  ശക്തമായ ആവശ്യം ഉയർന്ന സാഹചര്യത്തിൽ വനിതാ സ്ഥാനാർത്ഥികൾക്കും ആഹ്വാനം നൽകിയിരുന്നു.

നാമനിർദ്ദേശം ചെയ്യപ്പെട്ട അഞ്ചുപേരിൽ മൂന്നു വനിതകളുണ്ട്. ചിലിയുടെ മുൻ പ്രസിഡന്റും മുൻ യുഎൻ മനുഷ്യാവകാശ ഹൈക്കമ്മീഷണറുമായ മിഷേൽ ബാഷെലെറ്റ്, കോസ്റ്ററിക്കയുടെ മുൻ വൈസ് പ്രസിഡന്റും നിലവിൽ യുഎൻ ട്രേഡ് ആൻഡ് ഡെവലപ്‌മെന്റ് സെക്രട്ടറി ജനറലുമായ റെബേക്ക ഗ്രിൻസ്പാൻ, യുഎന്നിൽ ഉന്നത പദവികൾ വഹിച്ച അർജന്റീന സ്വദേശിനി വിർജീനിയ ഗാംബ എന്നിവർ.

പുരുഷന്മാരിൽ അർജന്റീനയിൽ നിന്നുള്ള റാഫേൽ ഗ്രോസ്സിയും സെനഗലിന്റെ മുൻ പ്രസിഡന്റും പ്രധാനമന്ത്രിയുമായ മാക്കി സാലുമാണ് മത്സരിക്കുന്നത്.

സ്ഥാനാർത്ഥികളെ നാമനിർദ്ദേശം ചെയ്യാനുള്ള അവസാന തീയതി ഏപ്രിൽ 1 ആണ്. അതിനാൽ കൂടുതൽ സ്ഥാനാർത്ഥികൾ രംഗത്തെത്താൻ സാധ്യതയുണ്ട്.

അവസാന തിരഞ്ഞെടുപ്പിൽ ജനറൽ അസംബ്ലിയിലെ ഭൂരിപക്ഷ പിന്തുണ ആവശ്യമായിരുന്നാലും, സെക്യൂരിറ്റി കൗൺസിലിന്റെ ശുപാർശയാണ് നിർണായകമാകുക. കാരണം സ്ഥിരാംഗങ്ങളായ അഞ്ചു രാജ്യങ്ങൾക്ക് വീറ്റോ അധികാരം ഉള്ളതിനാൽ അവരുടെ തീരുമാനം തന്നെ തിരഞ്ഞെടുപ്പിൽ നിർണായകമാണ്.

അടുത്ത സെക്രട്ടറി ജനറൽ സമാധാനവും സുരക്ഷയും, സുസ്ഥിര വികസനവും  മനുഷ്യാവകാശങ്ങളും എന്നീ മൂന്ന് പ്രധാന മേഖലകളിൽ ശക്തമായ നേതൃത്വവും ഭരണപരമായ കഴിവും തെളിയിക്കേണ്ടതുണ്ടെന്ന് ബെയർബോക്ക് പറഞ്ഞു.

നിലവിലെ സെക്രട്ടറി ജനറലായ പോർച്ചുഗലിന്റെ മുൻ പ്രധാനമന്ത്രി ആന്റോണിയോ ഗുട്ടറസ് തന്റെ രണ്ടാം കാലാവധി ഈ വർഷം പൂർത്തിയാക്കുകയാണ്. അദ്ദേഹത്തിന്റെ പിൻഗാമിയെ തിരഞ്ഞെടുക്കാനുള്ള നടപടികളാണ് ഇപ്പോൾ ആരംഭിക്കുന്നത്.

Election of new UN Secretary-General to start