തിരുവനന്തപുരം: എം ആര്‍ അജിത്കുമാറിനെ ബവ്‌കോ സിഎംഡിയായി നിയമിച്ചു. ബെവ്‌കോ എംഡി ആയിരുന്ന ഹര്‍ഷിത അട്ടലൂരിയെ ട്രാഫിക് ഐജിയായും നിയമിച്ചു. കഴിഞ്ഞദിവസമാണ് അജിത് കുമാറിനെ എക്‌സൈസ്‌കമ്മീഷണര്‍ സ്ഥാനത്തു നിന്നും നീക്കിയത്.

കേന്ദ്ര അഡ്മിനിസ്ട്രേറ്റീവ് ട്രൈബ്യൂണല്‍ ഉത്തരവിന്റെ അടിസ്ഥാനത്തിലായിരുന്നു അജിത് കുമാറിനെ എക്‌സൈസ്‌കമ്മീഷണര്‍ സ്ഥാനത്തുനിന്ന് നീക്കിയത്. കേഡര്‍ തസ്തികകളില്‍ ഐഎഎസ് ഉദ്യോഗസ്ഥരെ മാത്രമേ നിയമിക്കാവൂ എന്ന് ട്രൈബ്യൂണല്‍ കഴിഞ്ഞ ദിവസം ഉത്തരവിറക്കിയിരുന്നു. ഇതോടെയാണ് ഐപിഎസുകാരനായ അജിത്കുമാറിനെ എക്സൈസ് കമ്മിഷണര്‍ സ്ഥാനത്തുനിന്ന് സര്‍ക്കാരിന് ഒഴിവാക്കേണ്ടിവന്നത്.

ഐഎഎസ് ഓഫിസേഴ്സ് അസോസിയേഷന്‍ നല്‍കിയ ഹര്‍ജിയിലായിരുന്നു സിഎടി ഉത്തരവ്. ശബരിമല ട്രാക്ടര്‍ വിവാദത്തെ തുടര്‍ന്നായിരുന്നു അജിത്കുമാറിനെ പൊലീസ് സേനയില്‍ നിന്നും എക്‌സൈസിലേക്ക് മാറ്റിയത്. കഴിഞ്ഞവര്‍ഷം ജൂലൈയിലായിരുന്നു നിയമനം.