ഹിന്ദുക്കൾക്ക് എതിരായ വിദ്വേഷം അവസാനിപ്പിക്കാൻ ആ പ്രവണതയെ അപലപിക്കുന്ന പ്രമേയം മിനസോട്ട സെനറ്റിൽ അവതരിപ്പിച്ചു. ഹിന്ദുമത വിശ്വാസികൾക്കെതിരെ രാജ്യത്തിൻറെ പല ഭാഗങ്ങളിലും പ്രകടമാവുന്ന വിദ്വേഷത്തെ പ്രമേയം അപലപിച്ചു.

ഹിന്ദു വിദ്വേഷം തിരിച്ചറിയണം എന്ന് നിർദേശിക്കുന്ന പ്രമേയത്തിൽ സംസ്ഥാനം മത സ്വാതന്ത്ര്യത്തിനും സർവമത സൗഹാര്ദത്തിനും പരസ്പര ബഹുമാനത്തിനും ഉറച്ച പിന്തുണ നൽകുന്നു എന്നു വ്യക്തമാക്കുകയും ചെയ്യുന്നു.

കൊയാലിഷൻ ഓഫ് ഹിന്ദുസ് ഓഫ് നോർത്ത് അമേരിക്ക പ്രമേയത്തെ സ്വാഗതം ചെയ്തു. സമുദായ അംഗങ്ങളുടെ പരിശ്രമം കൊണ്ടാണ് ഇതു സാധിച്ചതെന്നു അവർ പറഞ്ഞു.

ഹിന്ദു വിദ്വേഷം നിലവിലുണ്ടെന്ന് അംഗീകരിക്കുന്നതാണ് പ്രമേയമെന്നു അവർ ചൂണ്ടിക്കാട്ടി. അതിനെ നേരിടണമെന്ന് ആഹ്വാനം ചെയ്യുന്നു.  

വിദ്വേഷം മൂലം ആരാധനാലയങ്ങൾക്കെതിരെ ഉണ്ടാവുന്ന ആക്രമണങ്ങൾ പ്രമേയത്തിൽ  എടുത്തു പറയുന്നുണ്ട്. രാജ്യത്തു അതു വർധിച്ചു വരികയാണെന്നു കൊയാലിഷൻ ചൂണ്ടിക്കാട്ടി.  

മിനസോട്ടയിൽ നടന്നിട്ടുള്ള അത്തരം ആക്രമണങ്ങളെ പ്രമേയത്തിൽ എടുത്തു കാണിക്കുന്നു. അവയെ അപലപിക്കാൻ നിർദേശവുമുണ്ട്.

Minnesota moves to condemn Hinduphobia