കെഎസ്ആർടിസിയുടെ അത്യാധുനിക സൗകര്യങ്ങളോടുള്ള ‘ബിസിനസ് ക്ലാസ്’ ബസുകൾ ഈ മാസം 15-ന് നിരത്തിലിറങ്ങുമെന്ന് ഗതാഗത മന്ത്രി കെ.ബി. ഗണേഷ് കുമാർ അറിയിച്ചു. എമിറേറ്റ്‌സ് വിമാനങ്ങളിലെ ബിസിനസ് ക്ലാസ് സീറ്റുകൾക്ക് സമാനമായ സൗകര്യങ്ങളോടെ എത്തുന്ന വോൾവോയുടെ രണ്ട് ബസുകളാണ് ഈ സർവീസിനായി ഉപയോഗിക്കുന്നത്. കൊച്ചിയിൽ നിന്ന് തിരുവനന്തപുരത്തേക്കും തിരിച്ചുമായിരിക്കും ആദ്യഘട്ടത്തിൽ സർവീസ് നടത്തുക. എറണാകുളം കെഎസ്ആർടിസി ഡിപ്പോയുടെ നവീകരണ ഉദ്ഘാടന ചടങ്ങിലാണ് മന്ത്രി ഇക്കാര്യം വ്യക്തമാക്കിയത്.

പാൻട്രി, ടോയ്‌ലറ്റ് ഉൾപ്പെടെയുള്ള അത്യാധുനിക സംവിധാനങ്ങൾ അടങ്ങിയ ഈ ബസിൽ 35 സീറ്റുകളുണ്ടാകും. യാത്രക്കാർക്ക് ഭക്ഷണവും മറ്റ് സേവനങ്ങളും നൽകാനായി പ്രത്യേക ബസ് ഹോസ്റ്റുമാരെയും നിയമിച്ചിട്ടുണ്ട്. ഹോസ്റ്റുമാരുടെ സേവനം അന്താരാഷ്ട്ര നിലവാരത്തിൽ ഉറപ്പാക്കാനാണ് സർക്കാർ ലക്ഷ്യമിടുന്നത്. 

റോഡ് പണികൾ പൂർത്തിയാകുന്നതോടെ സർവീസ് തൃശ്ശൂർ വരെ ദീർഘിപ്പിക്കുമെന്നും, യാത്രാസമയം വെറും മൂന്നര മണിക്കൂറായി ചുരുങ്ങുമെന്നും മന്ത്രി പറഞ്ഞു.