വാഷിംഗ്ടൺ: കോവിഡ് മഹാമാരിക്കാലത്ത് ചെറുകിട ബിസിനസുകൾക്കായി വിതരണം ചെയ്ത സാമ്പത്തിക സഹായത്തിൽ വൻതോതിലുള്ള തട്ടിപ്പുകൾ നടന്നതായി സംശയിക്കുന്നുണ്ടെന്നും അവ ശിക്ഷിക്കപ്പെടാതെ പോകാൻ സാധ്യതയുണ്ടെന്നുമുള്ള മുന്നറിയിപ്പുമായി അമേരിക്കൻ സെനറ്റർമാർ രംഗത്തെത്തി. കേസ് എടുക്കുന്നതിനുള്ള നിയമപരമായ കാലാവധി കോൺഗ്രസ് അടിയന്തരമായി നീട്ടിയില്ലെങ്കിൽ, ബില്യൺ കണക്കിന് ഡോളറിന്റെ ദുരുപയോഗം ശിക്ഷിക്കപ്പെടാതെ പോകാമെന്നാണ് മുന്നറിയിപ്പ്. ഇത് റെസ്റ്റോറന്റ്, ഹോസ്പിറ്റാലിറ്റി മേഖലകളിലെ ആയിരക്കണക്കിന് സംരംഭകർ ഉൾപ്പെടെയുള്ള ഇന്ത്യൻ വംശജരെയും ബാധിക്കാനിടയുണ്ട്.

സെനറ്റ് ചെറുകിട ബിസിനസ്–സംരംഭകത്വ സമിതി നടത്തിയ ഹിയറിങ്ങിൽ, കോവിഡ് സഹായധനം വേഗത്തിൽ വിതരണം ചെയ്തതും ആവശ്യമായ മേൽനോട്ടക്കുറവും ദുരുപയോഗത്തിന് വഴിവച്ചതായി സെനറ്റർ ജോണി ഏണസ്റ്റ് ആരോപിച്ചു.

ഏകദേശം $200 ബില്യൺ വരെ തട്ടിപ്പുകാർ കൈക്കലാക്കിയിരിക്കാമെന്നാണ് അനുമാനം. ഒരു മാസത്തിനകം ചില സഹായപദ്ധതികളിൽ തട്ടിപ്പ് നടത്തിയവർക്കെതിരെ കേസ് എടുക്കാൻ കഴിയാത്ത അവസ്ഥയാകുമെന്നും സെനറ്റർ പറഞ്ഞു.

ഇപ്പോൾ നടക്കുന്ന അന്വേഷണം വളരെ പരിമിതമാണെന്നും, സമയപരിധി നീട്ടിയില്ലെങ്കിൽ നിലവിലുള്ള അന്വേഷണങ്ങളും ഫലശൂന്യമാകാനിടയുണ്ടെന്നും ഇൻസ്പെക്ടർ ജനറൽ വില്യം കിർക്ക് മുന്നറിയിപ്പ് നൽകി.

കേസെടുക്കാനുള്ള കാലാവധി 10 വർഷമായി നീട്ടാനുള്ള ബിൽ ഇതിനകം ഹൗസിൽ പാസായിട്ടുണ്ട്. ഇത് സെനറ്റിൽ പരിഗണനയിലാണ്. കൂടുതൽ സമയം ലഭിച്ചാൽ കൂടുതൽ തട്ടിപ്പുകാർ പിടിയിലാകുമെന്നും കൂടുതൽ ശിക്ഷാ നടപടികൾ ഉണ്ടാകുമെന്നും പാൻഡെമിക് റെസ്പോൺസ് അക്കൗണ്ടബിളിറ്റി കമ്മിറ്റി അറിയിച്ചു.  എഐ സാങ്കേതിക വിദ്യ ഉപയോഗിച്ച് അപേക്ഷകളിലെ അസാധാരണ പ്രവണതകൾ കണ്ടെത്താനാകുമെന്ന് അവർ വ്യക്തമാക്കി.

മഹാമാരി കാലത്ത് പേചെക്ക് പ്രൊട്ടക്ഷൻ പ്രോഗ്രാം വഴിയും  എക്കണോമിക് ഇഞ്ചുറി ഡിസാസ്റ്റർ ലോൺ പ്രോഗ്രാമിലൂടെയും  ട്രില്യൺ ഡോളറിലധികം സഹായധനം വിതരണം ചെയ്തിരുന്നു. ഈ സഹായം ആയിരക്കണക്കിന് ചെറുകിട സ്ഥാപനങ്ങളെ അടച്ചുപൂട്ടലിൽ നിന്ന് രക്ഷിച്ചെങ്കിലും, ഇതിന്റെ മറവിൽ സംഘടിത തട്ടിപ്പുകൾ നടന്നതായി പിന്നീട് ഫെഡറൽ മേൽനോട്ടത്തിലുള്ള ഏജൻസികൾ കണ്ടെത്തിയിരുന്നു.

യഥാർത്ഥമായി സഹായം ആവശ്യമായ സംരംഭകരെ ബുദ്ധിമുട്ടിലാക്കാതെ തട്ടിപ്പുകാർക്കെതിരെ നടപടി ഉറപ്പാക്കുക എന്നതാണ് നിലവിലെ വെല്ലുവിളി.

Covid fraud deadline looms for small firms in US