മുൻ ഐഎഎസ് ഉദ്യോഗസ്ഥൻ കണ്ണൻ ഗോപിനാഥൻ ഓൾ ഇന്ത്യ പ്രൊഫഷണൽ കോൺഗ്രസിൽ (എഐപിസി) അംഗത്വം സ്വീകരിച്ചു. കോഴിക്കോട് ഡിസിസി ഹാളിൽ നടന്ന ചടങ്ങിൽ എഐപിസി സ്റ്റേറ്റ് പ്രസിഡന്റ് രഞ്ജിത്ത് ബാലനിൽ നിന്നാണ് അദ്ദേഹം ഔദ്യോഗികമായി മെമ്പർഷിപ്പ് ഏറ്റുവാങ്ങിയത്. എഐപിസി കേരള സ്‌പോർട്‌സ് വെർട്ടിക്കിളും കോഴിക്കോട് ജില്ലാ കമ്മിറ്റിയും സംയുക്തമായി സംഘടിപ്പിച്ച പരിപാടിയിലായിരുന്നു ഈ നിർണായകമായ അംഗത്വ വിതരണം നടന്നത്.

എഐപിസി സ്‌പോർട്‌സ് വെർട്ടിക്കൽ നടത്തിയ സംസ്ഥാനതല ‘റീൽസ് മത്സരത്തിലെ’ വിജയികളെ ആദരിക്കുന്ന ചടങ്ങിനോടനുബന്ധിച്ചാണ് കണ്ണൻ ഗോപിനാഥന്റെ മെമ്പർഷിപ്പ് സ്വീകരിക്കൽ നടന്നത്. രാജ്യത്തെ പ്രൊഫഷണലുകളെയും യുവതലമുറയെയും ജനാധിപത്യ പ്രക്രിയയുടെ ഭാഗമാക്കുന്നതിൽ എ.ഐ.പി.സി നടത്തുന്ന പ്രവർത്തനങ്ങൾ മാതൃകാപരമാണെന്ന് അദ്ദേഹം ചടങ്ങിൽ അഭിപ്രായപ്പെട്ടു. സഞ്ജയ് അലക്‌സ്, കെ. ജയന്ത്, ക്രിസ്റ്റി പേരായിൽ, സൈഫ് തൈക്കണ്ടി തുടങ്ങിയ പ്രമുഖ നേതാക്കൾ ഈ പരിപാടിയിൽ പങ്കെടുത്തു.

കോട്ടയം സ്വദേശിയായ കണ്ണൻ ഗോപിനാഥൻ 2012 ബാച്ച് ഐഎഎസ് ഉദ്യോഗസ്ഥനായിരുന്നു. കേന്ദ്രസർക്കാർ നയങ്ങളിൽ പ്രതിഷേധിച്ച് സർവീസിൽ നിന്നും രാജിവെച്ച അദ്ദേഹം 2025 ഒക്ടോബറിലാണ് എഐസിസി ജനറൽ സെക്രട്ടറി കെ.സി. വേണുഗോപാലിൽ നിന്നും കോൺഗ്രസ് അംഗത്വം സ്വീകരിച്ച് രാഷ്ട്രീയ പ്രവേശനം നടത്തിയത്. നിലവിൽ കോൺഗ്രസിന്റെ പ്രൊഫഷണൽ വിഭാഗമായ എഐപിസിയിലൂടെ തന്റെ പ്രവർത്തനങ്ങൾ കൂടുതൽ സജീവമാക്കുകയാണ് അദ്ദേഹം.