യുവതിയെ ബലാത്സംഗം ചെയ്യുകയും ഗർഭഛിദ്രത്തിന് പ്രേരിപ്പിക്കുകയും ചെയ്ത കേസിൽ രാഹുൽ മാങ്കൂട്ടത്തിലിൻ്റെ മുൻകൂർ ജാമ്യം നിരസിച്ചതോടെ, കേസിൽ വാദിച്ച പബ്ലിക് പ്രോസിക്യൂട്ടർ അഡ്വ. ടി. ഗീനാകുമാരിയെക്കുറിച്ചുള്ള തിരച്ചിലിലാണ് മലയാളി സൈബർലോകം. കേരളം ചർച്ച ചെയ്ത ഒട്ടേറെ നിർണ്ണായക കേസുകൾ വാദിച്ച അഭിഭാഷകയും അക്കാദമിക് രംഗത്തെ പ്രമുഖയുമാണ് ഗീന. എസ്.എഫ്.ഐ.യുടെ പഴയ 'പുലിക്കുട്ടി', കൂത്തുപറമ്പ് കേസിൽ അന്നത്തെ സർക്കാരിനെ വിറപ്പിച്ച വിപ്ലവനായിക, നാഷണൽ ലോ യൂണിവേഴ്സിറ്റിയിൽ നിന്ന് ആദ്യമായി പി.എച്ച്.ഡി. നേടിയ വ്യക്തി എന്നീ വിശേഷണങ്ങളാൽ അവർ ശ്രദ്ധേയയാണ്.

വിദ്യാർഥി കാലം മുതൽ തന്നെ ഗീനാകുമാരി രാഷ്ട്രീയത്തിൽ സജീവമായിരുന്നു. 1990-കളുടെ ആദ്യകാലത്ത് നിലമേൽ എൻ.എസ്.എസ്. കോളജിൽ ഗണിതത്തിൽ ബിരുദ വിദ്യാർഥിയായിരിക്കെ കേരള സർവകലാശാല യൂണിയൻ ചെയർപേഴ്സണായി തിരഞ്ഞെടുക്കപ്പെട്ടു. എസ്.എഫ്.ഐ.യുടെ സംസ്ഥാന ജോയിൻ്റ് സെക്രട്ടറിയായും അവർ പ്രവർത്തിച്ചു. തുടർന്ന് കേരള ലോ അക്കാദമിയിൽ നിന്ന് എൽ.എൽ.ബി.യും കേരള സർവകലാശാലയിൽ നിന്ന് എൽ.എൽ.എമ്മും പൂർത്തിയാക്കി.

സമര രംഗത്തെ പോരാട്ട ചരിത്രവും അവർക്കുണ്ട്. 1993-ൽ യൂണിവേഴ്സിറ്റി യൂണിഫൈഡ് ആക്റ്റിനെതിരെയും യൂണിവേഴ്സിറ്റി കോളജ് കാര്യവട്ടത്തേക്ക് മാറ്റുന്നതിനെതിരെയും നടന്ന സമരങ്ങളിൽ പങ്കെടുത്ത ഗീനയ്ക്ക് പരിക്കേൽക്കുകയും വലതുകൈ ഒടിയുകയും ചെയ്തു. 1994-ലെ കൂത്തുപറമ്പ് വെടിവെപ്പിനെ തുടർന്നുള്ള വിദ്യാർഥി പ്രക്ഷോഭത്തിൽ പങ്കെടുത്തതിന് അവർക്ക് പോലീസ് മർദ്ദനമേറ്റിരുന്നു. 29 വർഷങ്ങൾക്ക് ശേഷം, അന്ന് മർദ്ദിച്ച പാലക്കാട് റെയിൽവേ പോലീസ് സ്റ്റേഷൻ സബ് ഇൻസ്‌പെക്ടർ ജോർജ് ഗീനയെ കണ്ട് ക്ഷമാപണം ചെയ്ത സംഭവം വാർത്തകളിൽ വലിയ ശ്രദ്ധ നേടിയിരുന്നു.

ഗീനാകുമാരി പബ്ലിക് പ്രോസിക്യൂട്ടർ ആയി പ്രവർത്തിച്ച ശ്രദ്ധേയമായ കേസുകളിൽ ചിലതാണ് 2021-ലെ പോത്തൻകോട് സുധീഷ് വധക്കേസ് (11 പ്രതികൾക്കും ജീവപര്യന്തം ശിക്ഷ ലഭിച്ചു), 2020-ലെ വെഞ്ഞാറമ്മൂട് ഇരട്ടക്കൊലപാതകം, ഏറ്റവും ഒടുവിൽ 2024 നവംബർ 29-ന് വിധി വന്ന മനോരമ വധക്കേസ് (പ്രതിയായ ആദം അലിക്ക് ജീവപര്യന്തം). അഡിഷണൽ ഗവൺമെൻ്റ് പ്ലീഡർ, പബ്ലിക് പ്രോസിക്യൂട്ടർ തസ്തികകളിലും അവർ പ്രവർത്തിച്ചിട്ടുണ്ട്.

English summary:

From ‘Pulikutty’ to Prosecutor: Who is Adv. Geenakumari, who denied bail to Rahul Mankootathil?"