പി.എം. ശ്രീ പദ്ധതിയുമായി ബന്ധപ്പെട്ട് സി.പി.എം. എം.പി. ജോൺ ബ്രിട്ടാസിനെതിരെ കേന്ദ്രമന്ത്രി സുരേഷ് ഗോപി രൂക്ഷമായ വിമർശനവുമായി രംഗത്തെത്തി. ബ്രിട്ടാസിനെ 'മുന്ന' എന്ന് വിളിക്കണോ അതോ 'മുസാഫിർ' എന്ന് വിളിക്കണോ എന്ന് ജനങ്ങൾ ആലോചിച്ചാൽ മതിയെന്നും സുരേഷ് ഗോപി പറഞ്ഞു. പി.എം. ശ്രീ പദ്ധതിയിൽ കേന്ദ്രത്തിനും സംസ്ഥാനത്തിനും ഇടയിൽ പാലമായി നിന്നത് ബ്രിട്ടാസ് ആണെന്ന് കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാൻ വെളിപ്പെടുത്തിയതിന് പിന്നാലെയാണ് സുരേഷ് ഗോപിയുടെ ഈ പ്രതികരണം.

വിവിധ വിഷയങ്ങളിൽ അദ്ദേഹം നിലപാട് വ്യക്തമാക്കി. കൊച്ചി മെട്രോ കൊച്ചിക്കാർക്ക് മാത്രമുള്ളതാണെന്ന് അവഹേളിച്ചവരെ 'ഊളകൾ' എന്ന് സുരേഷ് ഗോപി വിശേഷിപ്പിച്ചു. മെട്രോ കോയമ്പത്തൂർ വരെ നീട്ടണമെന്നും അദ്ദേഹം ആവശ്യപ്പെട്ടു. കൂടാതെ, ശശി തരൂർ ഇന്ന് എഴുതിയ ലേഖനം സാധാരണ മനുഷ്യനായി എഴുതിയതാണെന്നും, അത് പ്രിൻ്റ് എടുത്ത് തൃപ്പൂണിത്തുറയിൽ വിതരണം ചെയ്യണമെന്നും അദ്ദേഹം പറഞ്ഞു.
എയിംസ് (AIIMS) വിഷയത്തിലും സുരേഷ് ഗോപി അഭിപ്രായം രേഖപ്പെടുത്തി. ആലപ്പുഴക്ക് വേണ്ടി മറ്റ് സഹോദര ജില്ലകൾ എയിംസ് വിട്ടുകൊടുക്കണം. നശിച്ച സമരങ്ങൾ കാരണം ആലപ്പുഴ താഴ്ന്നുനിൽക്കുകയാണ്. ആലപ്പുഴക്ക് എയിംസ് ലഭിക്കാൻ യോഗ്യതയുണ്ടെന്നും, അല്ലെങ്കിൽ നട്ടെല്ല് നിവർത്തി എയിംസ് വേണമെന്ന് പറയാൻ തൃശ്ശൂരിനാണ് അർഹതയെന്നും അദ്ദേഹം കൂട്ടിച്ചേർത്തു.

അതേസമയം, കേന്ദ്ര വിദ്യാഭ്യാസ മന്ത്രിയുടെ വെളിപ്പെടുത്തലിനോട് ജോൺ ബ്രിട്ടാസ് എം.പി. പ്രതികരിച്ചു. കേന്ദ്രമന്ത്രി പറഞ്ഞത് സത്യം തന്നെയാണെന്നും, കേരളത്തിൻ്റെ വിഷയം ഏറ്റെടുത്ത് മന്ത്രിയുടെ അടുത്ത് പോയതിൽ സന്തോഷമേയുള്ളൂ എന്നും അദ്ദേഹം പറഞ്ഞു. പലതവണ മന്ത്രിയെ കണ്ടിട്ടുണ്ട്, മധ്യസ്ഥം വഹിച്ചു എന്ന് പറഞ്ഞത് സത്യമാണ്. എന്നാൽ, പി.എം. ശ്രീ കരാർ ഒപ്പിടുന്നതിൽ താൻ മധ്യസ്ഥം വഹിച്ചിട്ടില്ല എന്നും ബ്രിട്ടാസ് വ്യക്തമാക്കി.

English summary:

Is John Brittas a 'Musafir' or a 'Munna'? Suresh Gopi against John Brittas on PM-SHRI scheme."