പ്രശസ്തമായ ക്രോസ്‌വേഡ് ബുക്ക് അവാർഡ് ഇത്തവണ മൂന്ന് മലയാളി എഴുത്തുകാർക്ക് ലഭിച്ചു. മനോജ് കുറൂർ, മനു എസ്. പിള്ള, ജെ. ദേവിക എന്നിവരാണ് വിവിധ വിഭാഗങ്ങളിലായി പുരസ്‌കാരത്തിന് അർഹരായത്. അവരുടെ ശ്രദ്ധേയമായ സാഹിത്യ സംഭാവനകൾക്കുള്ള അംഗീകാരമാണിത്.

നോൺ ഫിക്ഷൻ വിഭാഗത്തിലാണ് മനു എസ്. പിള്ളയ്ക്ക് അവാർഡ് ലഭിച്ചത്. അദ്ദേഹത്തിന്റെ 'ഗോഡ്‌സ് - ഗൺസ് ആന്റ് മിഷനറീസ്' (Gods - Guns and Missionaries) എന്ന കൃതിയാണ് പുരസ്‌കാരത്തിന് അർഹമായത്. വിവർത്തന വിഭാഗത്തിൽ, മനോജ് കുറൂരിൻ്റെ നോവലായ 'നിലം പൂത്തുമലർന്ന നാളിൻ്റെ' ഇംഗ്ലീഷ് പരിഭാഷയ്ക്ക് പുരസ്‌കാരം ലഭിച്ചു. ഈ നോവൽ 'ദ് ഡേ, ദ എർത്ത് ബ്ലൂംഡ്' (The Day, the Earth Bloomed) എന്ന പേരിൽ ഇംഗ്ലീഷിലേക്ക് വിവർത്തനം ചെയ്ത ജെ. ദേവികയും ഈ അവാർഡ് പങ്കിട്ടു.

ഇതോടൊപ്പം, മഹാരാഷ്ട്രയിൽ നിന്നുള്ള എഴുത്തുകാരിയും മാധ്യമപ്രവർത്തകയുമായ ശാന്ത ഗോഖലെ ക്രോസ്‌വേഡ് ലൈഫ് ടൈം അച്ചീവ്‌മെൻ്റ് പുരസ്‌കാരത്തിന് അർഹയായി. രുചിർ ജോഷി, വർഷ ശേഷൻ, ദുവ്വൂരി സുബ്ബറാവു, പ്രജക്ത കോലി, മോഹർ ബസു, സുധാ മൂർത്തി തുടങ്ങിയ പ്രമുഖരും വിവിധ വിഭാഗങ്ങളിലായി ഇത്തവണ ക്രോസ്‌വേഡ് പുരസ്‌കാരങ്ങൾ നേടി.

English summary:

Malayali brilliance at the Crossword Book Award ceremony; Writers Manoj Kuroor, Manu S. Pillai, and J. Devika receive the award.