ഒരു ആരോപണം അതും ചതിയിൽ മെനഞ്ഞെടുത്ത ഒന്ന് . ആ ചതിയിൽ പൊലിഞ്ഞുപോയത് ഒരാളുടെ ജീവിതമല്ല ഒരു കുടുംബത്തിന്റെ മുഴുവൻ സ്വപ്നങ്ങളും പ്രതീക്ഷകളുമായിരുന്നു . കോട്ടയം ആയാംകുടി സ്വദേശിയായ ജോമോൻ, താൻ ചെയ്യാത്ത കുറ്റത്തിന് ഏഴ് വർഷം നീണ്ട ദുരിത ജീവിതം അനുഭവിച്ചതിനെക്കുറിച്ച് മനസ്സ് തുറക്കുന്നു. 2017 ഡിസംബറിൽ സന്ധ്യാ പ്രാർത്ഥനയ്ക്ക് ശേഷം വീട്ടിലിരിക്കുമ്പോൾ പോലീസ് അറസ്റ്റ് ചെയ്ത ജോമോൻ, സ്വന്തം പാരാമെഡിക്കൽ സ്ഥാപനത്തിലെ വിദ്യാർത്ഥിനിയെ പീഡിപ്പിച്ചെന്ന കേസിലാണ് പ്രതിയായത്. മഹാരാഷ്ട്രയിൽ നഴ്സിംഗ് പരിശീലനത്തിന് കൊണ്ടുപോയപ്പോൾ ട്രെയിനിലും സ്ഥാപനത്തിലും വെച്ച് പീഡിപ്പിച്ചെന്നും, വിവരം പുറത്ത് പറഞ്ഞാൽ കൊല്ലുമെന്ന് ഭീഷണിപ്പെടുത്തിയെന്നും ആയിരുന്നു പരാതി.

ഒന്നര കിലോമീറ്ററോളം നടത്തിച്ചാണ് പോലീസ് സ്റ്റേഷനിൽ എത്തിച്ചത്. വെള്ളിയാഴ്ച അറസ്റ്റ് ചെയ്ത് ഞായറാഴ്ച വരെ ലോക്കപ്പിലിട്ടു. പരാതിക്കാരിയായ പെൺകുട്ടി ഒരു ആൺസുഹൃത്തുമായി പ്രണയത്തിലായിരുന്നെന്നും, അവൻ ഭീഷണിപ്പെടുത്തി പണം ആവശ്യപ്പെട്ടതിനെ തുടർന്നാണ് ജോമോനെതിരെ പരാതി നൽകിയതെന്നും പിന്നീട് വെളിപ്പെടുത്തി. ജോമോനും ഒരു പഴയ ബിസിനസ് പങ്കാളിയും തമ്മിലുണ്ടായ പ്രശ്നങ്ങളും ഇതിന് പിന്നിലുണ്ടായിരുന്നു.

തെളിവെടുപ്പിന് പോയപ്പോൾ പോലീസ് തനിക്ക് അനുകൂലമായ കാര്യങ്ങൾ രേഖപ്പെടുത്തിയില്ലെന്നും, കുറ്റം സമ്മതിക്കാൻ നിർബന്ധിച്ചെന്നും ജോമോൻ പറയുന്നു. ജയിലിൽ വെച്ചും പോലീസ് സ്റ്റേഷനിൽ വെച്ചും ഉപദ്രവം നേരിടേണ്ടി വന്നു. ഭാര്യയുടെ പിന്തുണയും താൻ നിരപരാധിയാണെന്ന ഉറച്ച വിശ്വാസവും മാത്രമാണ് ആത്മഹത്യ എന്ന ചിന്തയിൽ നിന്ന് പിന്തിരിപ്പിച്ചത്.

വർഷങ്ങൾക്ക് ശേഷം, പെൺകുട്ടി തന്റെ കൂട്ടുകാരികൾ വഴി ജോമോനെ ബന്ധപ്പെടുകയും താൻ ഭീഷണിക്ക് വഴങ്ങിയാണ് പരാതി നൽകിയതെന്ന് തുറന്നു പറയുകയും ചെയ്തു. പിന്നീട് പള്ളിയിൽ നാട്ടുകാരുടെ മുന്നിൽ വെച്ച് അവൾ ജോമോനോട് മാപ്പ് പറഞ്ഞു. എന്നാൽ, സമൂഹം ഇപ്പോഴും തന്നെ കുറ്റക്കാരനായി കാണുന്നുണ്ടെന്ന് ജോമോൻ വേദനയോടെ പറയുന്നു. താൻ അനുഭവിച്ച ദുരിതങ്ങൾ മറ്റൊരാൾക്ക് ഉണ്ടാകരുതെന്ന് കരുതി പെൺകുട്ടിക്കെതിരെ പരാതി നൽകാൻ ജോമോൻ തയ്യാറല്ല. ഈ കേസിൽ പ്രതിയായതിനെ തുടർന്ന് നാട്ടുകാരും ഇടവകക്കാരും അകറ്റി നിർത്തിയെന്നും, ജോലി ചെയ്യാൻ പോലും പറ്റാത്ത അവസ്ഥയായിരുന്നെന്നും ജോമോൻ ഓർക്കുന്നു. കുറ്റവിമുക്തനായെങ്കിലും, കുറ്റക്കാരനെന്ന നോട്ടം ഇപ്പോഴും പിന്തുടരുന്നുവെന്ന് അദ്ദേഹം കൂട്ടിച്ചേർത്തു.

English summary:

"‘Just agree to it,’ said the police; A complaint of abuse crafted through deceit; Eventually, a forced confession; Jomon opens up about a seven-year-long life of misery."

‘