വാഷിങ്ടൺ: ചന്ദ്രനിൽ ദീർഘകാല മനുഷ്യസാന്നിധ്യം ഉറപ്പാക്കുന്നതിനും ചന്ദ്രന്റെ ദക്ഷിണ ധ്രുവ മേഖലയിൽ മനുഷ്യവാസ കേന്ദ്രം സ്ഥാപിക്കുന്നതിനും ആവശ്യമായ സാങ്കേതികവിദ്യകൾ വികസിപ്പിക്കാൻ നിർദേശങ്ങൾ ക്ഷണിച്ച് അമേരിക്കൻ ബഹിരാകാശ ഏജൻസിയായ നാസ. ചന്ദ്രോപരിതല പര്യവേക്ഷണത്തിനും അവിടെ ആവശ്യമായ അടിസ്ഥാന സൗകര്യങ്ങൾ ഒരുക്കുന്നതിനുമുള്ള നിർണായക സാങ്കേതികവിദ്യകളുടെ വികസനമാണ് പദ്ധതിയുടെ ലക്ഷ്യം.

ചന്ദ്രനിൽ വൈദ്യുതി ഉൽപ്പാദിപ്പിക്കുകയും സംഭരിക്കുകയും വിതരണം ചെയ്യുകയും ചെയ്യുന്നതിനുള്ള സംവിധാനങ്ങൾ, ചന്ദ്രന്റെ മണ്ണിൽനിന്ന് ഓക്സിജൻ വേർതിരിച്ചെടുക്കുന്നതിനുള്ള സാങ്കേതികവിദ്യ, ആണവോർജം ഉപയോഗിച്ച് വൈദ്യുതി ഉൽപ്പാദിപ്പിക്കുന്ന സംവിധാനങ്ങൾ, ഭൂമിയിൽനിന്നുള്ള നിരന്തര വിതരണത്തെ ആശ്രയിക്കാതെ ചന്ദ്രനിൽ തന്നെ ആവശ്യമായ വസ്തുക്കൾ നിർമ്മിക്കുന്ന സാങ്കേതികവിദ്യ എന്നിവയ്ക്കാണ് പ്രത്യേക പരിഗണന.

ചന്ദ്രപര്യവേക്ഷണത്തിന് ഉപയോഗിക്കാവുന്ന നൂതന നാനോ വസ്തുക്കളുടെ ഉൽപ്പാദനവും പദ്ധതിയുടെ പരിധിയിൽ ഉൾപ്പെടുത്തിയിട്ടുണ്ട്.

ചന്ദ്രനിൽ ദീർഘകാല മനുഷ്യപര്യവേക്ഷണത്തിന് ആവശ്യമായ പ്രധാന സാങ്കേതികവിദ്യകളുടെ വികസനം വേഗത്തിലാക്കുകയാണ് ലക്ഷ്യമെന്ന് നാസയുടെ അഡ്വാൻസ്ഡ് റിസർച്ച് ആൻഡ് ടെക്നോളജി വിഭാഗം ഡയറക്ടർ ഗ്രെഗ് സ്റ്റോവർ പറഞ്ഞു. വ്യവസായ മേഖലയുമായുള്ള സഹകരണം അമേരിക്കയുടെ സാങ്കേതിക ശേഷി ശക്തിപ്പെടുത്തുന്നതിനും ചന്ദ്രനിൽ സുസ്ഥിരമായ മനുഷ്യസാന്നിധ്യത്തിനുള്ള അടിസ്ഥാന സൗകര്യങ്ങൾ വികസിപ്പിക്കുന്നതിനും സഹായിക്കുമെന്നും അദ്ദേഹം വ്യക്തമാക്കി.

സ്വകാര്യ കമ്പനികൾ, സർവകലാശാലകളും ഗവേഷണ സ്ഥാപനങ്ങളും ഉൾപ്പെടെയുള്ള വിദ്യാഭ്യാസ സ്ഥാപനങ്ങൾ, ലാഭേച്ഛയില്ലാത്ത സംഘടനകൾ എന്നിവയ്ക്ക് നിർദേശങ്ങൾ സമർപ്പിക്കാം. അമേരിക്കയുടെ നേതൃത്വത്തിലുള്ള സംഘങ്ങളിൽ പങ്കെടുക്കുന്ന അന്താരാഷ്ട്ര പങ്കാളികൾക്കും പദ്ധതിയിൽ പങ്കാളികളാകാൻ അവസരമുണ്ട്.