2027 മാർച്ച് മുതൽ ഇന്ത്യക്ക് ഏകീകൃത ഔദ്യോഗിക സമയം നിലവിൽ വരുന്നു . ഔദ്യോഗികവും വാണിജ്യപരവും ഡിജിറ്റലുമായ എല്ലാ ഇടപാടുകൾക്കും ഏകീകൃതവും നിയമപരവുമായ ഒറ്റ സമയക്രമത്തിലേക്ക്  2027 മാർച്ച് മുതൽ ഇന്ത്യ മാറുന്നു. രാജ്യത്തെ നിയമപരവും ഭരണപരവും വാണിജ്യപരവുമായ എല്ലാ കാര്യങ്ങൾക്കും ഇന്ത്യൻ സ്റ്റാൻഡേർഡ് ടൈം (IST) പൊതു റഫറൻസാക്കി കേന്ദ്ര സർക്കാർ 'ലീഗൽ മെട്രോളജി (ഇന്ത്യൻ സ്റ്റാൻഡേർഡ് ടൈം) റൂൾസ്, 2026' വിജ്ഞാപനം ചെയ്തു.

ഓഗസ്റ്റ് 27-ന് പുറപ്പെടുവിച്ച ഈ ചട്ടങ്ങൾ ഔദ്യോഗിക ഗസറ്റിൽ പ്രസിദ്ധീകരിച്ച് 180 ദിവസങ്ങൾക്ക് ശേഷം പ്രാബല്യത്തിൽ വരും. തങ്ങളുടെ സിസ്റ്റങ്ങൾ ഇതിനനുസരിച്ച് മാറ്റിയെടുക്കാൻ സ്ഥാപനങ്ങൾക്ക് സമയം നൽകാനാണ് ഈ സാവകാശം. 

സർക്കാറിന്റെ ‘ഒരു രാജ്യം, ഒരു സമയം’ (One Nation, One Time) എന്ന വിശാലമായ ലക്ഷ്യത്തിന്റെ ഭാഗമാണിത്. ഇന്ത്യ നേരത്തെയും ഐഎസ്ടി തന്നെയാണ് പിന്തുടർന്നിരുന്നതെങ്കിലും, ബാങ്കിംഗ്, ഡിജിറ്റൽ നെറ്റ്‌വർക്കുകൾ, മറ്റ് ഇടപാടുകൾ എന്നിവ വിദേശ സമയ സ്രോതസ്സുകളെ ആശ്രയിക്കാതെ ഔദ്യോഗികമായ ഇന്ത്യൻ സമയ സ്രോതസ്സുമായി കൃത്യമായി ഏകോപിപ്പിക്കുന്നു എന്ന് ഉറപ്പുവരുത്താനാണ് പുതിയ നിയമം.