വാഷിങ്ടൺ: പ്രപഞ്ചത്തിലെ 'ഡാർക്ക് മാറ്റർ', 'ഡാർക്ക് എനർജി' എന്നിവയെക്കുറിച്ച് കൂടുതൽ മനസ്സിലാക്കുന്നതിനും സൗരയൂഥത്തിന് പുറത്തുള്ള ഗ്രഹങ്ങളെ കണ്ടെത്തുന്നതിനുമായി നാസയുടെ നാൻസി ഗ്രേസ് റോമൻ സ്പേസ് ടെലിസ്കോപ്പ് വിക്ഷേപിച്ചു. ഓഗസ്റ്റ് 30ന് ഫ്ലോറിഡയിലെ കെന്നഡി സ്പേസ് സെന്ററിലെ ലോഞ്ച് കോംപ്ലക്സ് 39എയിൽനിന്ന് സ്പേസ് എക്സിന്റെ ഫാൽക്കൺ ഹെവി റോക്കറ്റിലായിരുന്നു വിക്ഷേപണം. രാവിലെ 7.26ന് ഇഡിടിയിലായിരുന്നു വിക്ഷേപണം.

ഭൂമിയിൽനിന്ന് ഏകദേശം 1 മില്യൺ മൈൽ അകലെയുള്ള രണ്ടാം സൺ-എർത്ത് ലാഗ്രാഞ്ച് പോയിന്റായ എൽ2ലേക്കാണ് റോമൻ ടെലിസ്കോപ്പ് സഞ്ചരിക്കുന്നത്. അന്തിമ ഭ്രമണപഥത്തിലെത്താൻ ഏകദേശം മൂന്ന് മാസം വേണ്ടിവരും. വിക്ഷേപണത്തിന് ഏഴ് മിനിറ്റിനകം നാസയുടെ ഗൊഡാർഡ് സ്പേസ് ഫ്ലൈറ്റ് സെന്ററിലെ നിയന്ത്രണസംഘത്തിന് ടെലിമെട്രി വിവരങ്ങൾ ലഭിച്ചു. വിക്ഷേപണത്തിന് 31 മിനിറ്റിന് ശേഷം ടെലിസ്കോപ്പ് റോക്കറ്റിൽനിന്ന് വേർപെട്ടു.

വിശാലമായ ആകാശമേഖലയും ഇൻഫ്രാറെഡ് നിരീക്ഷണ ശേഷിയും ഉപയോഗിച്ച് പ്രപഞ്ചചരിത്രത്തിന്റെ ആഴങ്ങളിലേക്ക് നിരീക്ഷണം നടത്തുകയാണ് റോമന്റെ പ്രധാന ദൗത്യം. ഡാർക്ക് മാറ്റർ, ഡാർക്ക് എനർജി, സൗരയൂഥത്തിന് പുറത്തുള്ള എക്സോപ്ലാനറ്റുകൾ എന്നിവയെക്കുറിച്ചുള്ള പഠനങ്ങൾക്ക് ദൂരദർശിനിയുടെ നിരീക്ഷണങ്ങൾ സഹായകമാകും.

വിക്ഷേപണത്തിന് ഒരു മണിക്കൂറും 23 മിനിറ്റും കഴിഞ്ഞപ്പോൾ റോമന്റെ സോളാർ പാനലുകളും താഴത്തെ ഇൻസ്ട്രുമെന്റ് സൺ ഷെയ്ഡും വിജയകരമായി വിന്യസിച്ചു. വരും ദിവസങ്ങളിൽ ഹൈ-ഗെയിൻ ആന്റിനയും വിന്യസിക്കും. ഭാവിയിൽ ഭൂമിയെപ്പോലുള്ള ഗ്രഹങ്ങളിൽ ജീവന്റെ സാന്നിധ്യം കണ്ടെത്താൻ ഉപയോഗിക്കാവുന്ന സാങ്കേതികവിദ്യ വികസിപ്പിക്കുന്നതിന്റെ ഭാഗമായി കൊറോണഗ്രാഫ് ഇൻസ്ട്രുമെന്റും പ്രവർത്തനസജ്ജമാക്കും.

റോമന്റെ പ്രധാന ഉപകരണമായ വൈഡ് ഫീൽഡ് ഇൻസ്ട്രുമെന്റ് ഏതാനും ആഴ്ചകൾക്കകം പ്രവർത്തനം ആരംഭിക്കും. 300 മെഗാപിക്സൽ ഇൻഫ്രാറെഡ് ക്യാമറയുള്ള ഈ ഉപകരണത്തിൽ 18 4കെ ഡിറ്റക്ടറുകളാണുള്ളത്. ഹബിൾ സ്പേസ് ടെലിസ്കോപ്പിനേക്കാൾ ആയിരം മടങ്ങ് വേഗത്തിൽ പ്രപഞ്ചത്തെ സർവേ ചെയ്യാൻ റോമൻ രൂപകൽപ്പന ചെയ്തിട്ടുണ്ട്.

മൂന്ന് മാസത്തെ കമ്മീഷനിങ് ഘട്ടത്തിൽ വിവിധ ഉപകരണങ്ങളുടെ പരിശോധനകളും കാലിബ്രേഷനും നടക്കും. റോമൻ ടെലിസ്കോപ്പിന്റെ ആദ്യ ചിത്രങ്ങൾ 2027ന്റെ തുടക്കത്തിൽ പുറത്തുവിടാനാണ് നാസയുടെ പ്രതീക്ഷ. പ്രതിദിനം 1.4 ടെറാബൈറ്റ് ഡാറ്റയാണ് ടെലിസ്കോപ്പ് കൈമാറുക.

സ്പേസ് എക്സ് ഫാൽക്കൺ ഹെവി റോക്കറ്റിൽ നാസ വിക്ഷേപിക്കുന്ന നാലാമത്തെ പ്രധാന ദൗത്യമാണ് റോമൻ ടെലിസ്കോപ്പ്. നാസ ഗൊഡാർഡിന്റെ നേതൃത്വത്തിലുള്ള ദൗത്യത്തിൽ ജെറ്റ് പ്രൊപ്പൽഷൻ ലബോറട്ടറി, കാൽടെക്/ഐപാക്, സ്പേസ് ടെലിസ്കോപ്പ് സയൻസ് ഇൻസ്റ്റിറ്റ്യൂട്ട് തുടങ്ങിയ സ്ഥാപനങ്ങളും വിവിധ രാജ്യങ്ങളിലെ ശാസ്ത്രസംഘങ്ങളും പങ്കാളികളാണ്.