കൊച്ചി: തലശ്ശേരി ഫസൽ വധക്കേസിൽ സാക്ഷി വിസ്താരത്തിനിടെ എറണാകുളം സിബിഐ പ്രത്യേക കോടതിയിൽ അതിവൈകാരിക രംഗങ്ങൾ. വിചാരണ നടപടികളുടെ ഭാഗമായി തൊണ്ടിമുതലുകൾ തിരിച്ചറിയുന്നതിനിടെയാണ് കൊല്ലപ്പെട്ട ഫസലിന്റെ ഭാര്യ മറിയു കോടതിയിൽ പൊട്ടിക്കരഞ്ഞത്. ഭർത്താവിന്റെ രക്തം പുരണ്ട ഷർട്ട് കണ്ടതോടെ വിതുമ്പിയ മറിയു, വസ്ത്രം നെഞ്ചോടു ചേർത്തുപിടിച്ച് പൊട്ടിക്കരഞ്ഞു. കൃത്യസമയത്ത് ഫസലിന്റെ പക്കലുണ്ടായിരുന്ന ചെരുപ്പ്, ടോർച്ച് എന്നിവയും ആദ്യ നോട്ടത്തിൽത്തന്നെ ഇവർ തിരിച്ചറിഞ്ഞു. മറിയുവിന്റെ സാക്ഷി വിസ്താരം പൂർത്തിയായ കേസ് ഈ മാസം ആറിന് വീണ്ടും പരിഗണിക്കും.

​കേസന്വേഷണം വഴിതെറ്റിക്കാൻ പ്രതികൾ ഉപയോഗിച്ച രക്തം പുരണ്ട തൂവാല നേരത്തെ എറണാകുളം ചീഫ് ജുഡീഷ്യൽ മജിസ്ട്രേറ്റ് കോടതിയിൽ നിന്ന് കാണാതായതും പിന്നീട് കണ്ടെത്തിയതുമായ സംഭവം വിചാരണ കോടതി പരിശോധിച്ചു. ഈ തൊണ്ടിമുതൽ എലി കരണ്ട് നശിപ്പിച്ചു എന്നായിരുന്നു സിജെഎം കോടതി ജീവനക്കാർ ആദ്യം റിപ്പോർട്ട് നൽകിയിരുന്നത്. എന്നാൽ സംഭവത്തിൽ ദുരൂഹത നിലനിൽക്കുന്നതിനാൽ വിഷയത്തിൽ വിശദമായ അന്വേഷണം നടത്തി റിപ്പോർട്ട് സമർപ്പിക്കാൻ സിബിഐ പ്രത്യേക കോടതി ജഡ്ജി ഹാഫിസ് മുഹമ്മദ് ഉത്തരവിട്ടു.

​ദേശീയപാതയോരത്ത് വച്ച് നടന്ന നടുക്കുന്ന കൊലപാതകത്തിന്റെ വിചാരണയാണ് ഇപ്പോൾ പുരോഗമിക്കുന്നത്. എൻഡിഎഫ് പ്രവർത്തകനും 'തേജസ്' പത്ര ഏജന്ററുമായിരുന്ന തലശേരി പിലാക്കൂൽ ഒളിയിലക്കണ്ടി മുഹമ്മദ് ഫസലിനെ 2006 ഒക്ടോബർ 22-നാണ് ഒരു സംഘം വെട്ടിക്കൊലപ്പെടുത്തിയത്. പുലർച്ചെ പത്രം എടുക്കാൻ പോകുന്നതിനിടെ തലശേരി ജഗന്നാഥ ടെമ്പിൾ റോഡിലെ ലിബർട്ടി ക്വാർട്ടേഴ്സിന് മുന്നിൽ വച്ചായിരുന്നു അതിക്രൂരമായ ഈ ആക്രമണം നടന്നത്.