സാന്റാ ക്ലാര (കാലിഫോര്‍ണിയ) : പ്രമുഖ നെറ്റ്വര്‍ക്കിങ് കമ്പനിയായ 'അരിസ്റ്റ നെറ്റ്വര്‍ക്‌സ്' സി.ഇ.ഒ ജയശ്രീ ഉള്ളാല്‍, 2026-ലെ ഫോർബ്‌സിന്റെ അമേരിക്കയിലെ ഏറ്റവും ധനികരായ വനിതകളുടെ (America's Richest Self-Made Women) പട്ടികയില്‍ ഏഴാം സ്ഥാനം സ്വന്തമാക്കി. 6.8 ബില്യണ്‍ ഡോളര്‍ (ഏകദേശം 56,000 കോടിയിലധികം രൂപ) ആസ്തിയുള്ള അവര്‍, ഈ പട്ടികയില്‍ ഏറ്റവും ഉയര്‍ന്ന റാങ്ക് നേടുന്ന ഇന്ത്യന്‍ വംശജയാണ്.

ലണ്ടനില്‍ ജനിച്ച് ഡല്‍ഹിയില്‍ വളര്‍ന്ന ജയശ്രീ, 2008-ലാണ് അരിസ്റ്റ നെറ്റ്വര്‍ക്‌സിന്റെ പ്രസിഡന്റും സി.ഇ.ഒയുമായി ചുമതലയേല്‍ക്കുന്നത്. അന്ന് വരുമാനമൊന്നുമില്ലാതിരുന്ന ഒരു സ്റ്റാര്‍ട്ടപ്പ് കമ്പനിയെ ക്ലൗഡ് കമ്പ്യൂട്ടിങ്, ആര്‍ട്ടിഫിഷ്യല്‍ ഇന്റലിജന്‍സ് (AI) മേഖലകളിലെ അതിവേഗ നെറ്റ്വര്‍ക്കിങ് ഉപകരണങ്ങള്‍ നിര്‍മ്മിക്കുന്ന മുന്‍നിര ആഗോള കമ്പനിയാക്കി മാറ്റാന്‍ അവരുടെ തന്ത്രപരമായ നേതൃത്വത്തിന് സാധിച്ചു. 2024-ല്‍ കമ്പനിയുടെ വരുമാനം 9 ബില്യണ്‍ ഡോളറിലെത്തിയിരുന്നു.

മുന്‍കാല പരിചയം: അരിസ്റ്റയില്‍ എത്തുന്നതിന് മുന്‍പ് സിസ്‌കോ സിസ്റ്റംസില്‍  15 വര്‍ഷത്തോളം സീനിയര്‍ എക്‌സിക്യൂട്ടീവായി അവര്‍ സേവനമനുഷ്ഠിച്ചിട്ടുണ്ട്. കൂടാതെ ഫെയര്‍ചൈല്‍ഡ് സെമികണ്ടക്ടര്‍, എ.എം.ഡി  എന്നീ കമ്പനികളിലും പ്രവര്‍ത്തിച്ചിട്ടുണ്ട്. നിലവില്‍ ക്ലൗഡ് കമ്പനിയായ 'സ്‌നോഫ്‌ലേക്കിന്റെ'  ഡയറക്ടര്‍ ബോര്‍ഡ് അംഗം കൂടിയാണ്.

സാങ്കേതിക വൈദഗ്ധ്യവും ദീര്‍ഘവീക്ഷണമുള്ള നേതൃപാടഭവുമാണ് ജയശ്രീ ഉള്ളാലിനെ ആധുനിക സാങ്കേതികവിദ്യാ രംഗത്തെ ഏറ്റവും സ്വാധീനമുള്ള വ്യക്തികളില്‍ ഒരാളാക്കി മാറ്റിയത്.