പ്രശസ്ത അന്താരാഷ്ട്ര ബ്രാന്‍ഡായ വിക്ടോറിയാസ് സീക്രട്ടിന്റെ ഇന്ത്യയില്‍ നിന്നുള്ള ആദ്യ ഔദ്യോഗിക ബ്രാന്‍ഡ് അംബാസഡറായി ബോളിവുഡ് നടി തൃപ്തി ദിമ്രി നിയമിതയായി. ഒരു ഇന്ത്യന്‍ താരത്തെ ബ്രാന്‍ഡ് അംബാസഡറായി ഈ ലേബല്‍ ഔദ്യോഗികമായി നിയമിക്കുന്നത് ഇതാദ്യമായാണ്.

ഏപ്രില്‍ 9-നാണ് ഈ ചരിത്രപരമായ പ്രഖ്യാപനം ഉണ്ടായത്. ബ്രാന്‍ഡിന്റെ പുതിയ 'സമ്മര്‍ സിഗ്‌നേച്ചര്‍' (Summer Signature) ക്യാമ്പെയ്ന്റെ മുഖമായി തൃപ്തി എത്തും.

മുന്‍പ് വിക്ടോറിയാസ് സീക്രട്ട് ഫാഷന്‍ ഷോകളില്‍ ഇന്ത്യന്‍ മോഡലുകള്‍ പ്രത്യക്ഷപ്പെട്ടിട്ടുണ്ടെങ്കിലും, ഔദ്യോഗിക അംബാസഡര്‍ സ്ഥാനത്തേക്ക് ഒരു ഇന്ത്യന്‍ നടിയോ പ്രമുഖ വ്യക്തിയോ എത്തുന്നത് ആദ്യമാണ്.

ഇതൊരു 'സ്വപ്ന സാഫല്യം' ആണെന്നും തന്റെ കരിയറിലെ സുപ്രധാന നാഴികക്കല്ലാണെന്നും തൃപ്തി ദിമ്രി പറഞ്ഞു. ആത്മവിശ്വാസത്തിലും ആധികാരികതയിലും ഊന്നിയുള്ള ബ്രാന്‍ഡിന്റെ പുതിയ സൗന്ദര്യ സങ്കല്പം തനിക്ക് പ്രിയപ്പെട്ടതാണെന്നും താരം കൂട്ടിച്ചേര്‍ത്തു.

'അനിമല്‍' എന്ന ചിത്രത്തിലൂടെ വലിയ ജനപ്രീതി നേടിയ തൃപ്തിക്ക് ഈ നേട്ടം അന്താരാഷ്ട്ര തലത്തില്‍ വലിയ ശ്രദ്ധ നേടിക്കൊടുക്കും.